ខេត្តកំពង់ឆ្នាំង៖ នៅក្នុងពិធីប្រកាសចៅអធិការវត្តស្តីទី វត្តថ្នល់អណ្តែត ក្នុងឃុំស្វាយជ្រុំ ស្រុករលាប្អៀរ ដែលមានការចូលរួមពីមន្ត្រីសង្ឃស្រុក និង មន្ត្រីមន្ទីរធម្មការ និងកិច្ចសាសនាខេត្តកាលពីព្រឹកថ្ងៃទី៦ ខែសីហា ឆ្នាំ២០១៥នោះ ស្រាប់តែមានការភ្ញាក់ផ្អើល ស្រឡាំងកាំងទាំងអស់គ្នា ដោយនឹកស្មានមិនដល់ក្នុងពេលដែលពិធីចាប់ផ្តើម ស្រាប់តែប្រជាពលរដ្ឋដែលចូលរួមបានលើកជាបដា សឹងតែគ្រប់គ្នា ជំទាស់នឹងការតែងតាំងព្រះចៅអធិការវត្តស្តីទី ព្រះនាមជន្ម សារិទ្ធ ។
ក្នុងពេលនោះ ប្រជាពលរដ្ឋដែលលើកបដាបាននិយាយថា ការតែងតាំងព្រះចៅ អធិកាវត្តស្តីទីនេះគឺមានភាពមិនប្រក្រតី ដោយសារតែជាការៀបចំឡើង ដោយគណៈកម្មការវត្តចំនួន២នាក់ ជាមួយលោកស្រី យិន សុខុម ដែលជាប្រធាន ការិយាល័យធម្មការស្រុករលាប្អៀរ ។
ប្រជាពលរដ្ឋលើកឡើងថា ព្រះតេជគុណ ស៊ូ ហៀម មានព្រះជន្មច្រើន វស្សា និងបានគង់នៅក្នុងទីអារ៉ាមនេះជាច្រើនឆ្នាំ ព្រមទាំងបានកសាងនូវសមិទ្ធិផលជាច្រើន ធ្វើអោយពុទ្ធិបរិស័ទជិតឆ្ងាយគោរពស្រឡាញ់រាប់អានជាច្រើន ប៉ុន្តែបែរជា ព្រះអង្គមិនបានត្រូវតែងតាំងជាចៅអធិកាវត្តទៅវិញ ហើយនិមន្តព្រះតេជគណ ជន្ម សារិទ្ធ ដែលទើបនឹងនិមន្តមកពីខេត្តបន្ទាយមានជ័យ ហើយមានព្រះជន្មតិចជាង ធ្វើជាចៅ អធិការវត្តទៅវិញ ។ មិនតែប៉ុណ្ណោះ គេមានគម្រោងនិមន្តព្រះតេជគណ ស៊ូ ហៀម ចេញពីវត្តទៀតផង ។
ប្រជាពលរដ្ឋបានសំណូមពរ ដល់មន្ត្រីសង្ឃគ្រប់ឋានានុក្រម និង អភិបាលខេត្តកំពង់ឆ្នាំង មេត្តាជួយពិនិត្យមើលភាពមិប្រក្រតីនៃការតែងតាំងព្រះចៅអធិកាវត្តនេះផង និង សំណូមពរអោយរុះរើគណកម្មកាអាចារ្យវត្តនេះសារជាថ្មីវិញផង ព្រោះគណៈកម្មការ នេះបង្កើតឡើងយូរហើយ តែមិនដែលឃើញដោះដូរនោះទេ ធ្វើអោយទីអារាមនេះ មានតែផលវិបាក បង្កបក្ខពួកជាច្រើនបក្ខ ដែលធ្វើអោយពុទ្ធិបរិស័ទ សឹងអស់ជំនឿចូលក្នុងទីអារាមនេះទៀតហើយ ។
បើទោះបីជាប្រជាពលរដ្ឋលើបដា និង ស្នើសុំរៀបចំសារជាថ្មីក៍ដោយ ក៍កម្មវិធីប្រកាសចៅអធិកាវត្តស្តីទី បានប្រព្រឹទ្ធទៅឡើងចប់ចុងចប់ដើមដែរ ។
ផ្តល់បទសំភាសន៍ជាមួយនឹងអ្នកសារពត៌មាន លោកស្រី យិន សុខុម ប្រធានការិយាល័យធម្មការ និងសាសនាស្រុករលាប្អៀរ បានបញ្ជាក់ប្រាប់ថា ការតែងតាំងព្រះចៅអធិការវត្ត គឺជាភារកិច្ចរបស់មន្ត្រីសង្ឃ ដែលធ្វើឡើងយ៉ាងត្រឹមត្រូវទៅតាមនីតិវិធី គ្មានការឃុបឃិតគ្នាឡើយ ។ ដោយឡែកប្រជាពលរដ្ឋដែលតវ៉ាគឺជាសិទ្ធរបស់ប្រជាពលរដ្ឋក្នុងការបញ្ចេញមតិ ហើយនឹងទទួលយកនូវការចូលរួមផ្តល់មតិរបស់ប្រជាពលរដ្ឋនាពេលនេះ ប៉ុន្តែអ្វីដែលជាការរៀបចំរបស់មន្ត្រីសង្ឃស្រុកគឺនឹងប្រព្រឹត្តទៅជាធម្មតា ៕
ដោយ៖ ចន្ថា
