ប្រធានក្រុមហ៊ុន Vingroup លោក Pham Nhat Vuong និងភរិយា លោកស្រី Pham Thu Huong គឺជាបុគ្គលមានទ្រព្យសម្បត្តិច្រើនជាងគេបំផុតពីររូបនៅវៀតណាម ដោយមានទ្រព្យសម្បត្តិសរុបរួមគ្នា 40.6 ពាន់លានដុល្លារ ដែលស្មើនឹងជិត 74.5% នៃទ្រព្យសម្បត្តិសរុបរបស់មហាសេដ្ឋីទាំង 8 រូបរបស់ប្រទេសវៀតណាម។

 

មហាសេដ្ឋីវៀតណាមទាំង 8 រូប ដែលស្ថិតក្នុងចំណាត់ថ្នាក់មហាសេដ្ឋីពិភពលោកតាមពេលវេលាជាក់ស្តែងរបស់ Forbes មានទ្រព្យសម្បត្តិសរុប 54.5 ពាន់លានដុល្លារ។

 

លោក Vuong ឈរនៅលំដាប់កំពូលជាមួយទ្រព្យសម្បត្តិ 36.5 ពាន់លានដុល្លារ ដែលធ្វើឱ្យលោកក្លាយជា មហាសេដ្ឋីមានទ្រព្យសម្បត្តិច្រើនជាងគេបំផុតនៅអាស៊ីអាគ្នេយ៍។

 

ប្រធាន Vingroup វ័យ 58 ឆ្នាំរូបនេះ ឈរនៅលំដាប់ទី 60 ក្នុងពិភពលោក ហើយមានទ្រព្យសម្បត្តិច្រើនជាងមហាសេដ្ឋីមានទ្រព្យសម្បត្តិច្រើនជាងគេទីពីរនៅអាស៊ីអាគ្នេយ៍ គឺមហាសេដ្ឋីឥណ្ឌូណេស៊ី Low Tuck Kwong ដែលជាអ្នកជំនួញក្នុងវិស័យធ្យូងថ្ម ដល់ទៅ 16.6 ពាន់លានដុល្លារ។ គិតត្រឹមថ្ងៃទី 30 ខែសីហា លោក Low មានទ្រព្យសម្បត្តិប្រមាណ 19.9 ពាន់លានដុល្លារ។

 

លោក Vuong បានបង្កើនទ្រព្យសម្បត្តិរបស់ខ្លួនរហូតដល់ 2.3 ពាន់លានដុល្លារ ក្នុងថ្ងៃតែមួយ គឺថ្ងៃទី 27 ខែសីហា ដែលធ្វើឱ្យលោកក្លាយជាមនុស្សម្នាក់ក្នុងចំណោម អ្នកមានទ្រព្យសម្បត្តិកើនឡើងខ្លាំងបំផុត 5 រូបក្នុងពិភពលោក នៅថ្ងៃនោះ រួមជាមួយមហាសេដ្ឋីបច្ចេកវិទ្យាអាមេរិក Elon Musk, Larry Ellison, Michael Dell និង Mark Zuckerberg។

 

ភរិយារបស់លោក Vuong គឺ លោកស្រី Pham Thu Huong អនុប្រធាន Vingroup វ័យ 57 ឆ្នាំ បានឡើងមកឈរនៅលំដាប់ទី 2 ក្នុងចំណោមអ្នកមានបំផុតនៅវៀតណាមនាពេលថ្មីៗនេះ ដោយមានទ្រព្យសម្បត្តិ 4.1 ពាន់លានដុល្លារ ដោយបានវ៉ាដាច់ប្រធានក្រុមហ៊ុនអាកាសចរណ៍ Vietjet លោកស្រី Nguyen Thi Phuong Thao ដែលមានទ្រព្យសម្បត្តិប្រមាណ 4 ពាន់លានដុល្លារ។

 

លោកស្រី Huong បានចូលក្នុងបញ្ជីមហាសេដ្ឋីពិភពលោកប្រចាំឆ្នាំរបស់ទស្សនាវដ្តី Forbes ជាលើកដំបូងកាលពីខែកុម្ភៈ រួមជាមួយប្អូនស្រីរបស់លោកស្រីគឺ Pham Thuy Hang អាយុ 51 ឆ្នាំ ដែលបច្ចុប្បន្នឈរនៅលំដាប់ទី 4 ក្នុងចំណោមអ្នកមានបំផុតនៅវៀតណាម ដោយមានទ្រព្យសម្បត្តិ 2.9 ពាន់លានដុល្លារ។

 

លោកស្រី Huong កាន់កាប់ភាគហ៊ុនប្រមាណ 4.4% ក្នុង Vingroup និងបានធ្វើការរួមជាមួយលោក Vuong តាំងពីដំណាក់កាលដំបូងនៃអាជីវកម្មរបស់លោកនៅប្រទេសអ៊ុយក្រែន។

 

ប្រធានក្រុមហ៊ុន Hoa Phat Group លោក Tran Dinh Long អាយុ 65 ឆ្នាំ ឈរនៅលំដាប់ទី 5 ក្នុងចំណោមអ្នកមានបំផុតនៅវៀតណាម ដោយមានទ្រព្យសម្បត្តិប្រមាណ 2.5 ពាន់លានដុល្លារ។

 

លោកបានបង្កើត Hoa Phat ជាក្រុមហ៊ុនចែកចាយឧបករណ៍ និងគ្រឿងបន្លាស់នៅទីក្រុងហាណូយ ក្នុងឆ្នាំ 1992 មុនពេលអភិវឌ្ឍក្រុមហ៊ុននេះរហូតក្លាយជា ក្រុមហ៊ុនផលិតដែកថែបធំបំផុតនៅវៀតណាម។

 

បន្ទាប់មកគឺប្រធាន Techcombank លោក Ho Hung Anh អាយុ 56 ឆ្នាំ ដែលមានទ្រព្យសម្បត្តិប្រមាណ 2.3 ពាន់លានដុល្លារ។

 

លោក Ho Hung Anh និងប្រធាន Masan Group លោក Nguyen Dang Quang អាយុ 63 ឆ្នាំ គឺជាដៃគូអាជីវកម្មរយៈពេលយូរ។ អ្នកទាំងពីរបានសិក្សានៅប្រទេសរុស្ស៊ី មុនពេលត្រឡប់មកវៀតណាម និងបង្កើតអាជីវកម្មក្នុងវិស័យធនាគារ និងផលិតផលប្រើប្រាស់។

 

ប្រធាន VPBank លោក Ngo Chi Dung អាយុ 58 ឆ្នាំ មានទ្រព្យសម្បត្តិប្រមាណ 1.2 ពាន់លានដុល្លារ ខណៈលោក Nguyen Dang Quang បិទបញ្ចប់បញ្ជីមហាសេដ្ឋី ដោយមានទ្រព្យសម្បត្តិ 1 ពាន់លានដុល្លារ បន្ទាប់ពីលោកបានបាត់បង់ឋានៈជាមហាសេដ្ឋីក្នុងរយៈពេលខ្លីកាលពីខែកក្កដា ដោយសារតម្លៃភាគហ៊ុនរបស់ក្រុមហ៊ុនលោកបានធ្លាក់ចុះ។

 

Forbes គណនាទ្រព្យសម្បត្តិរបស់បុគ្គលម្នាក់ៗជាចម្បង ដោយផ្អែកលើចំនួន និងតម្លៃទីផ្សារនៃភាគហ៊ុនដែលពួកគេកាន់កាប់នៅពេលជាក់លាក់ណាមួយ។ ប៉ុន្តែ Forbes ក៏រាប់បញ្ចូលទ្រព្យសម្បត្តិផ្សេងទៀតផងដែរ ដូចជា ភាគហ៊ុននៅក្នុងក្រុមហ៊ុនឯកជន អចលនទ្រព្យ ស្នាដៃសិល្បៈ និងទូកប្រណីត៕