ខេត្តមណ្ឌលគិរី+ក្រចេះ+ស្ទឹងត្រែង៖ យ៉ាងតិចមានរថយន្តដឹកជញ្ជូនឈើល្មើសច្បាប់ចំនួន៥គ្រឿង និងមនុស្ស៣នាក់ត្រូវបានកម្លាំង ក្រុមការងារចុះស្រាវជ្រាវព័ត៌មាន និងបង្រ្កាបបទល្មើសព្រៃឈើ របស់កងរាជអាវុធហត្ថលើផ្ទៃប្រទេសឃាត់ចាប់ កាលពីយប់ថ្ងៃ២៧ ខែកញ្ញា ឆ្នាំ២០១៦និងរសៀលថ្ងៃទី២៨ បានចំនួនបួនគោលដៅផ្សេងៗគ្នា ដោយមានការសម្របសម្រួលពីតំណាងអយ្យការ ពាក់ព័ន្ធករណីប្រមូលទិញ ដឹកជញ្ជូន ផលព្រៃឈើដោយគ្មានលិខិតអនុញ្ញាតពីរដ្ឋបាលព្រៃឈើ ។
សមត្ថកិច្ចបានអោយដឹងថាៈ នៅវេលាម៉ោង៦និង៥០យប់ថ្ងៃ២៧ ខែកញ្ញាឆ្នាំ២០១៦ខាងលើសមត្ថកិច្ចឈជើងនៅខេត្តមណ្ឌលគិរីបានបង្ក្រាបរថយន្តឡង់គ្រីស័រមួយគ្រឿងពណ៍ស្លែ ពាក់ស្លាកលេខ បាត់ដំបង 2A-0274 និងឃាត់ខ្លួនអ្នកបើកបរម្នាក់ឈ្មោះ ស៊ុំ សែន ភេទប្រុស អាយុ៥៨ ឆ្នាំ ក្នុងបទល្មើសជាក់ស្តែង ផ្ទុកឈើប្រណិតប្រភេទបេងចំនួន២២ដុំ ស្មើនិង១,៣២០ម៉ែត្រគូប នៅចំណុចភូមិអណ្តូងក្រឡឹង ឃុំសែនមនោរម្យ ស្រុកអូរាំង ខេត្តមណ្ឌលគិរី ហើយនៅវេលាម៉ោង១រសៀលថ្ងៃទី២៨ ខែកញ្ញា ឆ្នាំ២០១៦កម្លាំងដដែលនេះបន្តបង្ក្រាបរថយន្តកាមរីដឹកឈើមួយគ្រឿងទៀត នៅចំណុច ភូមិស្នែង ឃុំស្រែខ្ទុម ស្រុកកែវសីមា ខេត្តបណ្ឌលគីរី មានឈើចំនួន៣៤ដុំ ប្រវែង១,២ម៉ែត្រគូប។
សមត្ថកិច្ចបន្តថាៈ នៅវេលាម៉ោង១១យប់ថ្ងៃទី២៧ ខែកញ្ញា ឆ្នាំ២០១៦ កម្លាំងបានបង្ក្រាបរថយន្តដឹកឈើប្រណិតមួយគ្រឿងម៉ាកសាំយ៉ុង នៅចំណុចផ្លូវបំបែក(អូរពងមាន់) ស្ថិតក្នងភូមិរាជានុកូល សង្កាត់ ក្រុង ខេត្តស្ទឹងត្រែង ចាប់យកឈើប្រណិតប្រភេទធ្នង់ចំនួន៩៨ដុំ ស្មើនិង១,៥៤០ម៉ែត្រគូប។ ដោយឡែកនៅខេត្តក្រចេះសមត្ថកិច្ចក៏ឃាត់ចាប់រថយន្តបានចំនួន២គ្រឿង គឺរថយន្តសាំយ៉ុងមួយគ្រឿងពណ៍ស ពាក់ស្លាកលេខភ្នំពេញ 2R-4131 ចាប់យកឈើធ្នង់ និងសុក្រំបានចំនួន ៥,៤៣១ ម៉ែត្រគូប និងរថយន្តយីឌុបពាក់ស្លាកលេខភ្នំពេញ 3B-6854 ដោយប្រើរូបភាពដាក់កៅស៊ូក្រែបពីលើ មានឈើពីក្រោមសមត្ថកិច្ចកម្លាំងអាវុធហត្ថនិងជំនាញរដ្ឋបាលព្រៃឈើកំពុងធ្វើការវាស់វែង និងមនុស្សពីរនាក់ត្រូវឃាត់ខ្លួន។
បច្ចុប្បន្នទាំងវត្ថុតាងឈើ រថយន្តជាមធ្យោបាយដឹកបទល្មើសចាប់យកនិងជនសង្ស័យសមត្ថកិច្ចកំពុងរក្សាទុកនិងសាកសួរតាមនីតិវិធី ដើម្បីកសាងសំណុំរឿងប្រគល់ឲ្យជំនាញរដ្ឋបាលព្រៃឈើបញ្ជូនទៅសាលាដំបូងខេត្តចាត់ការបន្ត៕
ដោយ៖សុខ ខេមរា
