អាជ្ញាធរប្រកួតប្រជែងរបស់វៀតណាម បានស្នើឱ្យក្រុមហ៊ុន Grab ដែលជាក្រុមហ៊ុនផ្តល់សេវាកម្មហៅយានយន្តតាមកម្មវិធីឈានមុខមួយ ពន្យល់អំពីរបៀបកំណត់ថ្លៃសេវា កម្រៃ និងកម្រៃជើងសារ បន្ទាប់ពីអ្នកបើកបរបានត្អូញត្អែរថា ប្រាក់ចំណូលធ្លាក់ចុះ និងបានអំពាវនាវឱ្យមានការធ្វើកូដកម្ម។

 

គណៈកម្មការប្រកួតប្រជែងជាតិ (National Competition Commission) ក្រោមក្រសួងឧស្សាហកម្ម និងពាណិជ្ជកម្មវៀតណាម បានឱ្យដឹងកាលពីថ្ងៃសុក្រថា ខ្លួនកំពុងពិនិត្យ និងផ្ទៀងផ្ទាត់បណ្តឹងពាក់ព័ន្ធនឹងគោលការណ៍កំណត់តម្លៃ និងថ្លៃសេវារបស់ Grab ដែលមានទីស្នាក់ការកណ្តាលនៅប្រទេសសិង្ហបុរី និងផ្តល់សេវាហៅយានយន្តនៅវៀតណាម ព្រមទាំងប្រទេសជាច្រើនទៀតក្នុងតំបន់អាស៊ីអាគ្នេយ៍។

 

អាជ្ញាធរបានឱ្យដឹងថា តាមរយៈរបាយការណ៍ពីអ្នកបើកបរជាច្រើន តម្លៃធ្វើដំណើរមួយចំនួនត្រូវបានកំណត់ទាប ឬត្រូវបានកាត់បន្ថយ ខណៈអ្នកបើកបរនៅតែត្រូវទទួលបន្ទុកលើថ្លៃដើមប្រតិបត្តិការ រួមទាំងថ្លៃសេវា កម្រៃជើងសារ និងការកាត់ប្រាក់ផ្សេងៗដែលកំណត់ដោយ Grab។ កត្តាទាំងនេះបានប៉ះពាល់ដល់ប្រាក់ចំណូលពិតប្រាកដដែលអ្នកបើកបរទទួលបាន។

 

អ្នកបើកបរបានស្នើឱ្យមានការបញ្ជាក់ឱ្យច្បាស់អំពីរបៀបកំណត់ និងកែសម្រួល ថ្លៃធ្វើដំណើរ ថ្លៃសេវា កម្រៃជើងសារ និងការកាត់ប្រាក់ ព្រមទាំងរបៀបដែល Grab ជូនដំណឹងដល់អ្នកបើកបរ នៅពេលមានការផ្លាស់ប្តូរគោលការណ៍របស់ក្រុមហ៊ុន។

 

ជាការឆ្លើយតប គណៈកម្មការប្រកួតប្រជែងជាតិបានជួបជាមួយ Grab កាលពីថ្ងៃទី ៨ ខែកញ្ញា និងបានស្នើឱ្យក្រុមហ៊ុនផ្តល់ព័ត៌មាន និងឯកសារពាក់ព័ន្ធនឹងគោលការណ៍កំណត់ថ្លៃសេវា ថ្លៃសេវាកម្ម និងកម្រៃជើងសាររបស់ខ្លួន។

 

គណៈកម្មការក៏បានស្នើឱ្យក្រុមហ៊ុនផ្តល់សេវាហៅយានយន្តតាមកម្មវិធីផ្សេងៗនៅវៀតណាម ផ្តល់ឯកសារស្រដៀងគ្នា ដើម្បីធ្វើការប្រៀបធៀប និងវាយតម្លៃ។ អាជ្ញាធរបានបញ្ជាក់ថា ដំណើរការប្រមូល និងផ្ទៀងផ្ទាត់ព័ត៌មានកំពុងដំណើរការ។

 

បន្ទាប់ពីបញ្ចប់ការពិនិត្យ អាជ្ញាធរនឹងវាយតម្លៃលើបញ្ហានេះ ហើយអាចចាត់វិធានការបន្ថែម ឬបើកការស៊ើបអង្កេត ប្រសិនបើរកឃើញសញ្ញានៃការរំលោភច្បាប់ស្តីពីការប្រកួតប្រជែង។

 

គណៈកម្មការប្រកួតប្រជែងជាតិក៏បានស្នើឱ្យវេទិកាហៅយានយន្តទាំងអស់ ពិនិត្យ និងបង្ហាញជាមុននូវគោលការណ៍កំណត់តម្លៃ ថ្លៃសេវា និងកម្រៃជើងសាររបស់ខ្លួន ដើម្បីធានាតម្លាភាព និងរក្សាតុល្យភាពផលប្រយោជន៍រវាងក្រុមហ៊ុន អ្នកបើកបរ និងអ្នកប្រើប្រាស់។

 

បច្ចុប្បន្ន Grab អនុវត្ត កម្រៃជើងសារ 20% សម្រាប់សេវាកម្មយានយន្តពីររង្វង់ និង 25% សម្រាប់សេវាកម្មយានយន្តបួនរង្វង់។ ចំនួនទឹកប្រាក់ដែលអតិថិជនត្រូវបង់ រួមមានថ្លៃធ្វើដំណើរមូលដ្ឋាន បូកជាមួយថ្លៃសេវាវេទិកា និងថ្លៃបន្ថែម ដែលអាស្រ័យលើទីតាំង និងពេលវេលា។

 

ចំនួនទឹកប្រាក់សរុបនៃការធ្វើដំណើរដែលបង្ហាញនៅលើកម្មវិធីរបស់អតិថិជន តែងតែខ្ពស់ជាងថ្លៃដឹកជញ្ជូនមូលដ្ឋាន។ ចំណែកប្រាក់ដែលអ្នកបើកបរទទួលបានជាក់ស្តែង ត្រូវគណនាដោយដកកម្រៃជើងសារថេរ ព្រមទាំងកាតព្វកិច្ចពន្ធ និងថ្លៃសេវាពាក់ព័ន្ធចេញពីចំណូលនៃការធ្វើដំណើរ។ ដូច្នេះ មានភាពខុសគ្នាគួរឱ្យកត់សម្គាល់រវាងប្រាក់ដែលអតិថិជនបង់ និងប្រាក់ដែលអ្នកបើកបរទទួលបាន។

 

ដោយលើកឡើងពី ថ្លៃធ្វើដំណើរទាប និងកម្រៃជើងសារខ្ពស់ អ្នកបើកបរ Grab ជាច្រើននៅទីក្រុងហាណូយ និងទីក្រុងហូជីមិញ បានអំពាវនាវឱ្យអ្នកបើកបររួមអាជីព ចាកចេញពីប្រព័ន្ធ (Log off) នៅថ្ងៃសៅរ៍ និងថ្ងៃអាទិត្យ ដើម្បីដាក់សម្ពាធឱ្យក្រុមហ៊ុនពិនិត្យ និងកែសម្រួលគោលការណ៍របស់ខ្លួន។

 

ប្រភពមួយបានបន្ថែមថា អ្នកបើកបរជាច្រើនមានការមិនពេញចិត្ត ដោយសារការកាត់ប្រាក់សរុបអាចឡើងដល់ 30%–50% អាស្រ័យលើពេលវេលាដែលពួកគេបើកបរ ខណៈអ្នកបើកបរត្រូវទទួលខុសត្រូវដោយខ្លួនឯងលើថ្លៃប្រេងឥន្ធនៈ និងការខូចខាត ឬការសឹករេចរឹលរបស់យានយន្ត។

 

អ្នកនាំពាក្យរបស់ Grab បានប្រាប់សារព័ត៌មាន VnExpress កាលពីល្ងាចថ្ងៃព្រហស្បតិ៍ថា ប្រតិបត្តិការរបស់ក្រុមហ៊ុននៅតែដំណើរការជាធម្មតា។ ក្រុមហ៊ុនបានដឹងអំពីការពិភាក្សារបស់អ្នកបើកបរនៅលើបណ្តាញសង្គម និងកំពុងវាយតម្លៃស្ថានការណ៍យ៉ាងយកចិត្តទុកដាក់។ អ្នកនាំពាក្យបានបន្ថែមថា Grab តែងតែផ្តល់អាទិភាពដល់ ជីវភាពរបស់អ្នកបើកបរ និងគុណភាពសេវាកម្ម៕