យោងតាមAljazeera នៅថ្ងៃទី៣០ខែកញ្ញា បានអោយដឹងថា ខ្មាន់កាំភ្លើងបានបើកការបាញ់ប្រហារលើឡានក្រុងមួយគ្រឿងនៅភាគខាងលិចប្រទេសស៊ីរី ដោយបានសម្លាប់មនុស្សយ៉ាងហោចណាស់ប្រាំពីរនាក់ ប៉ុន្មានម៉ោងបន្ទាប់ពីការផ្ទុះ និងអគ្គីភ័យនៅបំពង់បង្ហូរឧស្ម័នមួយក្បែរទីក្រុងដាម៉ាស បានបង្ខំឱ្យរោងចក្រថាមពលចំនួនបីត្រូវបិទ។
ទីភ្នាក់ងារសារព័ត៌មាន Sana បាននិយាយថា “ជនវាយប្រហារដែលមិនស្គាល់អត្តសញ្ញាណ” បានវាយប្រហារឡានក្រុងនេះកាលពីថ្ងៃពុធ ខណៈពេលដែលវាឆ្លងកាត់ស្ពាន Masyaf ក្នុងទីក្រុង Homs ដោយបានសម្លាប់ និងធ្វើឱ្យមនុស្សមួយចំនួនរងរបួស។ ទីភ្នាក់ងារនេះបាននិយាយថា កងកម្លាំងសន្តិសុខបានបើកការស៊ើបអង្កេត និងបានបោះពុម្ពផ្សាយរូបថតរបស់មន្ត្រីដែលកំពុងពិនិត្យឡានក្រុងតូចមួយ។
ឧត្តមសេនីយ៍ឯក Bassem Muhammad Shaaban ប្រធានសន្តិសុខផ្ទៃក្នុងនៃទីក្រុង Homs បាននិយាយថា រថយន្តនេះគឺជារថយន្តក្រុងស៊ីវិលដែលដឹកបុគ្គលិករបស់ក្រុមហ៊ុនមួយពីកន្លែងធ្វើការត្រឡប់ទៅផ្ទះវិញ។
លោកត្រូវបានដកស្រង់សម្តីថា “យើងចាត់ទុកការវាយប្រហារដ៏កំសាកនេះថាជាការប៉ុនប៉ងធ្វើឱ្យប៉ះពាល់ដល់សន្តិសុខ និងស្ថិរភាពនៃខេត្ត Homs”។ “ឧក្រិដ្ឋកម្មនេះនឹងមិនត្រូវបានលើកលែងទោសឡើយ។ សន្តិសុខផ្ទៃក្នុងនឹងបន្តតាមចាប់ជនល្មើសរហូតដល់ពួកគេត្រូវបានចាប់ខ្លួន និងនាំខ្លួនទៅតុលាការដើម្បីទទួលទោសតាមច្បាប់”។
រូបថត: Getty
