ភោជនីយដ្ឋាន និងតូបលក់អាហារនៅតាមមជ្ឈមណ្ឌលលក់អាហារតាមចិញ្ចើមផ្លូវទូទាំងប្រទេសសិង្ហបុរី កំពុងប្រឈមនឹងការធ្លាក់ចុះនៃអាជីវកម្មដោយសារស្ថានភាពផ្សែងអ័ព្ទ ដោយអាជីវកម្មមួយចំនួនរាយការណ៍ថា ការលក់បានធ្លាក់ចុះរហូតដល់ ៧០% ទៅ ៨០%។

 

នៅវេលាប្រហែលម៉ោង ១១ ព្រឹកថ្ងៃអាទិត្យ មជ្ឈមណ្ឌលលក់អាហារ Jurong West Hawker Centre មានសភាពស្ងប់ស្ងាត់ខុសពីធម្មតា ដោយមានតុតែប៉ុន្មានប៉ុណ្ណោះដែលមានអតិថិជនអង្គុយ ខណៈពេលធម្មតាទីតាំងនេះតែងតែមានមនុស្សមមាញឹក។

 

តូបលក់អាហារមួយចំនួននៅទីនោះបាននិយាយថា អាជីវកម្មរបស់ពួកគេធ្លាក់ចុះប្រហែលពាក់កណ្តាល ហើយតូបមួយទៀតរាយការណ៍ពីការធ្លាក់ចុះខ្លាំងជាងនេះបន្ថែមទៀត នេះបើយោងតាមសារព័ត៌មាន Channel News Asia។

 

លោក Yong Tham Foo អាយុ ៣៤ ឆ្នាំ ដែលធ្វើការនៅតូបលក់មីហ៊ុនក្វេធ្វើដោយដៃ Traditional Handmade Mee Hoon Kway បានឱ្យដឹងថា ការលក់ក្នុងចុងសប្តាហ៍មុនបានធ្លាក់ចុះរហូតដល់ ៨០% ខណៈប្រាក់ចំណូលពីការលក់ក្នុងថ្ងៃធ្វើការធ្លាក់ចុះជាមធ្យម ៤០%។

 

សារព័ត៌មាននេះក៏បានរាយការណ៍ដែរថា អាជីវកម្មផ្នែកអាហារ និងភេសជ្ជៈមួយចំនួននៅក្នុងប្រទេសសិង្ហបុរី បានប្រឈមនឹងការធ្លាក់ចុះនៃការលក់រហូតដល់ ៧០%។

 

លោក Sahil SK ម្ចាស់ភោជនីយដ្ឋាន និងបារឥណ្ឌា Shahi Maharaja បាននិយាយថា អាជីវកម្មរបស់លោកធ្លាក់ចុះ ៦០% ដោយសារអតិថិជនលុបចោលការកក់តុ ហើយចំនួនអតិថិជនដែលដើរចូលមកដោយមិនបានកក់ទុកជាមុនក៏មានការថយចុះដែរ។

 

លោក Sahil បាននិយាយថា៖ «អាជីវកម្មរបស់យើងពឹងផ្អែកយ៉ាងខ្លាំងលើភ្ញៀវទេសចរ។ ប្រសិនបើខ្ញុំជាភ្ញៀវទេសចរនៅប្រទេសណាមួយ ហើយឃើញថាផ្សែងអ័ព្ទនៅខាងក្រៅខ្លាំងបែបនេះ ខ្ញុំក៏មិនចង់ចេញពីបន្ទប់សណ្ឋាគារដែរ»។

 

តូបលក់អាហារ និងភោជនីយដ្ឋានជាច្រើនផ្សេងទៀត ក៏បានរាយការណ៍ពីការធ្លាក់ចុះនៃអាជីវកម្មចន្លោះពី ២០% ទៅ ៤០% ផងដែរ នៅពេលសារព័ត៌មានក្នុងស្រុក The Straits Times ចុះសម្ភាសកាលពីថ្ងៃសុក្រសប្តាហ៍មុន។

 

នៅពេលនោះ សិង្ហបុរីបានប្រឈមនឹងការអានសន្ទស្សន៍ស្តង់ដារបំពុលបរិយាកាស (PSI) ក្នុងកម្រិតមិនល្អចំពោះសុខភាពជាប់ៗគ្នារយៈពេល ១២ ថ្ងៃ គិតចាប់ពីថ្ងៃទី៥ ខែតុលា ដែលជារយៈពេលបន្តយូរបំផុតចាប់តាំងពីឆ្នាំ២០១៥។

 

ផ្សែងអ័ព្ទដែលមានប្រភពពីភ្លើងឆេះព្រៃ និងដីព្រៃល្បាប់នៅប្រទេសឥណ្ឌូណេស៊ី បានធ្វើឱ្យសិង្ហបុរីក្លាយជាទីក្រុងធំមួយក្នុងចំណោមទីក្រុងដែលមានការបំពុលបរិយាកាសខ្ពស់បំផុតនៅក្នុងចំណាត់ថ្នាក់បន្តផ្ទាល់របស់ IQAir។ យោងតាមទីភ្នាក់ងារសារព័ត៌មាន AFP សិង្ហបុរីថែមទាំងបានឡើងឈរលេខមួយក្នុងចំណាត់ថ្នាក់នេះកាលពីថ្ងៃសុក្រសប្តាហ៍មុនផងដែរ។

 

ស្ថានភាពនេះក៏បានធ្វើឱ្យប្រជាពលរដ្ឋស្នាក់នៅក្នុងផ្ទះញឹកញាប់ជាងមុន ដែលបណ្តាលឱ្យអាជីវកម្មផ្នែកអាហារ និងភេសជ្ជៈបាត់បង់អតិថិជន។

 

លោកស្រី Zaiton Bee អាយុ ៧៣ ឆ្នាំ ដែលបានដំណើរការតូបលក់ម្ហូបអាហារមូស្លីមនៅមជ្ឈមណ្ឌល Tekka Centre អស់រយៈពេល ១០ ឆ្នាំ បាននិយាយថា ចំនួនអតិថិជនប្រចាំថ្ងៃរបស់លោកស្រីបានធ្លាក់ចុះពីប្រហែល ៥០០ នាក់មុនពេលមានផ្សែងអ័ព្ទ មកនៅត្រឹម ២០០ នាក់ប៉ុណ្ណោះនាពេលបច្ចុប្បន្ន។

 

លោកស្រីកំពុងប្រឈមនឹងការកើនឡើងនៃចំណាយប្រតិបត្តិការរួចទៅហើយ ហើយឥឡូវនេះកំពុងពិចារណាបិទតូប ដោយសារផ្សែងអ័ព្ទបន្តអូសបន្លាយ ចំនួនអតិថិជនថយចុះ និងវ័យចំណាស់របស់លោកស្រី។

 

លោកស្រីបាននិយាយថា៖ «ឥឡូវនេះគ្មានអតិថិជនទេ គួរឱ្យធុញទ្រាន់ណាស់។ យើងចង់បិទហាងហើយ។ ប្រសិនបើយើងមិនអាចបន្តអាជីវកម្មបានទេ ប្រហែលជាក្នុងរយៈពេលប៉ុន្មានខែទៀត ឬនៅឆ្នាំក្រោយ យើងនឹងបោះបង់វាចោល»។

 

ភោជនីយដ្ឋានជាច្រើនក៏កំពុងប្រឈមនឹងការខ្វះខាតកម្លាំងពលកម្មផងដែរ ដោយសារបុគ្គលិកសុំច្បាប់ឈប់សម្រាកក្នុងអំឡុងពេលមានផ្សែងអ័ព្ទ។ សមាគមភោជនីយដ្ឋានសិង្ហបុរីបានព្រមានក្នុងសេចក្តីថ្លែងការណ៍ថ្មីៗនេះថា ស្ថានភាពផ្សែងអ័ព្ទដែលកំពុងវិវឌ្ឍន៍អាចប៉ះពាល់ដល់លទ្ធភាពរកបុគ្គលិក ការប្រើប្រាស់កន្លែងអង្គុយក្រៅអគារ និងសេវាដឹកជញ្ជូនអាហារ។

 

ផលប៉ះពាល់មិនស្មើគ្នាតាមវិស័យ

 

អ្នកសេដ្ឋកិច្ចបានព្រមានថា ប្រសិនបើផ្សែងអ័ព្ទបន្តអូសបន្លាយ វាអាចធ្វើឱ្យការចំណាយរបស់អ្នកប្រើប្រាស់ថយចុះ និងរំខានដល់សកម្មភាពអាជីវកម្ម។ ទោះជាយ៉ាងណា ផលប៉ះពាល់ត្រូវបានរំពឹងថានឹងខុសគ្នាទៅតាមវិស័យនីមួយៗ។

 

លោក Suan Teck Kin ប្រធានផ្នែកស្រាវជ្រាវនៅធនាគារ UOB បាននិយាយថា វិស័យសំណង់ទំនងជាស្ថិតក្នុងចំណោមវិស័យដែលរងផលប៉ះពាល់ខ្លាំងបំផុត ដោយសារការងារភាគច្រើនត្រូវធ្វើនៅខាងក្រៅអគារ។

 

លោកបានប្រាប់សារព័ត៌មាន The Business Times ថា៖ «វិស័យដែលពឹងផ្អែកលើអតិថិជនផ្ទាល់ ដូចជាពាណិជ្ជកម្មលក់រាយ សណ្ឋាគារ និងអាជីវកម្មអាហារ និងភេសជ្ជៈ ក៏អាចរងសម្ពាធផងដែរ ដោយសារចំនួនភ្ញៀវទេសចរមកដល់ថយចុះ»។

 

លោកបានបន្ថែមថា៖ «ភ្ញៀវទេសចរអាចប្តូរគម្រោងវិស្សមកាលរបស់ពួកគេទៅកាន់គោលដៅផ្សេងៗនៅអាស៊ី ដូចជា កូរ៉េខាងត្បូង តៃវ៉ាន់ ជប៉ុន និងចិន ដែលមិនរងផលប៉ះពាល់ពីផ្សែងអ័ព្ទនេះ»។

 

ទោះជាយ៉ាងណា អាជីវកម្មមួយចំនួនបានទទួលផលប្រយោជន៍ពីស្ថានភាពនេះ ដោយសារអ្នកប្រើប្រាស់ចំណាយពេលនៅក្នុងផ្ទះកាន់តែច្រើន និងងាកទៅទិញផលិតផលដូចជា ម៉ាស៊ីនបន្សុទ្ធខ្យល់ និងម៉ាស់ការពារផ្សែងអ័ព្ទ។

 

អ្នកនាំពាក្យក្រុមហ៊ុន Xiaomi បានប្រាប់ Bloomberg តាមអ៊ីមែលថា ការលក់ម៉ាស៊ីនបន្សុទ្ធខ្យល់របស់ក្រុមហ៊ុននៅក្នុងប្រទេសសិង្ហបុរីបានកើនឡើងជាង ១៩ ដង បើធៀបនឹងរយៈពេលដូចគ្នាកាលពីឆ្នាំមុន ក្នុងអំឡុងពាក់កណ្តាលដំបូងនៃខែតុលា។ ការកើនឡើងនេះបានធ្វើឱ្យហាងទាំង ១៨ របស់ Xiaomi នៅសិង្ហបុរីអស់ស្តុក។

 

អ្នកនាំពាក្យរូបនេះបានបន្ថែមថា ក្រុមហ៊ុនកំពុងពន្លឿនការបំពេញស្តុកឡើងវិញ និងកែសម្រួលការផ្គត់ផ្គង់ ដើម្បីឆ្លើយតបនឹងតម្រូវការដែលកំពុងកើនឡើងយ៉ាងខ្លាំង។

 

គិតត្រឹមថ្ងៃព្រហស្បតិ៍សប្តាហ៍មុន គេហទំព័ររបស់ក្រុមហ៊ុន Dyson ក៏បានបង្ហាញថា ម៉ាស៊ីនបន្សុទ្ធខ្យល់ម៉ូដែលមួយចំនួនរបស់ខ្លួនអស់ស្តុកផងដែរ។ ចំណែកក្រុមហ៊ុនលក់គ្រឿងប្រើប្រាស់ក្នុងផ្ទះ Gain City បានឱ្យដឹងថា ការលក់ផលិតផលនេះបានកើនឡើងដល់ប្រហែល ៩ ដង ចាប់តាំងពីរដូវកាលមានផ្សែងអ័ព្ទចាប់ផ្តើមក្នុងខែសីហា។

 

ទន្ទឹមនឹងនេះ ការផ្សព្វផ្សាយលក់ម៉ាស់ N95 នៅលើគេហទំព័រឱសថស្ថាន និងហាងលក់ថ្នាំតាមអ៊ីនធឺណិតមួយចំនួន ក៏ត្រូវបានសម្គាល់ថា «អស់ស្តុក» ឬ «នឹងមានទំនិញឆាប់ៗនេះ» ផងដែរ។

 

ទោះបីអាជីវកម្មមួយចំនួនកំពុងរងសម្ពាធក៏ដោយ លោក Brian Lee អ្នកសេដ្ឋកិច្ចនៅធនាគារ Maybank បាននិយាយថា ផ្សែងអ័ព្ទទំនងជាមិនប៉ះពាល់ខ្លាំងដល់កំណើនសេដ្ឋកិច្ចសរុបរបស់សិង្ហបុរីនោះទេ ព្រោះវិស័យដែលពឹងផ្អែកលើសកម្មភាពជួបជុំផ្ទាល់មានចំណែកតិចតួចប៉ុណ្ណោះ គឺត្រឹមភាគរយមួយខ្ទង់ទាបនៃផលិតផលក្នុងស្រុកសរុប (GDP) របស់ប្រទេស។

 

លោក Lee បានបញ្ជាក់ថា៖ «វិស័យដែលបានជំរុញកំណើនសេដ្ឋកិច្ចខ្ពស់របស់ប្រទេស មិនសូវប្រឈមនឹងផលប៉ះពាល់ដោយផ្ទាល់ពីផ្សែងអ័ព្ទនោះទេ រួមមានការផលិតគ្រឿងអេឡិចត្រូនិក និងវិស័យហិរញ្ញវត្ថុ»៕