ក្រុមជម្រើសជាតិទុយនីស៊ីបានបន្តទម្រង់លេងមិនល្អរបស់ខ្លួន ដោយរងបរាជ័យក្នុងទឹកដីខ្លួនឯងក្រោមថ្វីជើងលីប៊ី ក្នុងលទ្ធផល ០-២ ក្នុងការប្រកួតជម្រុះពានរង្វាន់ Africa Cup of Nations កាលពីថ្ងៃសុក្រ។ ចំណែក Mohamed Salah បានក្លាយជាកីឡាករដែលស៊ុតបញ្ចូលទីច្រើនបំផុតក្នុងប្រវត្តិសាស្ត្រក្រុមជម្រើសជាតិអេហ្ស៊ីប បន្ទាប់ពីជួយក្រុមយកឈ្នះម៉ាឡាវីយ៉ាងចាស់ដៃក្នុងលទ្ធផល ៥-០។

ក្រៅពីនេះ ក្រុមជម្រើសជាតិ Cape Verde និងនីហ្សេរីយ៉ា ក៏ទទួលបានជ័យជម្នះសំខាន់ៗផងដែរ បន្ទាប់ពីចាប់ផ្តើមយុទ្ធនាការជម្រុះឆ្នាំ២០២៧ ដោយលទ្ធផលមិនសូវល្អ។ ទោះជាយ៉ាងណា ក្រុមដែលធ្លាប់ឈ្នះជើងឯកដូចជា អាហ្វ្រិកខាងត្បូង និងហ្សំប៊ី បានត្រឹមស្មើក្នុងការប្រកួតក្នុងទឹកដីរៀងៗខ្លួន។

Salah បានស៊ុតបញ្ចូលទីពីរគ្រាប់នៅចុងការប្រកួត ធ្វើឱ្យចំនួនគ្រាប់បាល់សរុបរបស់គេក្នុងក្រុមជម្រើសជាតិកើនដល់ ៧០ គ្រាប់ និងបំបែកកំណត់ត្រារបស់អតីតប្រធានក្រុម Hossam Hassan។ ក្រោមការដឹកនាំរបស់គ្រូបង្វឹកថ្មី Ali Maher អេហ្ស៊ីបបានបង្ហាញទម្រង់លេងយ៉ាងល្អឥតខ្ចោះក្នុងទីក្រុង Cairo ហើយជ័យជម្នះនេះបានជួយឱ្យពួកគេឡើងឈរកំពូលតារាងពូល B។

ទុយនីស៊ី គឺជាក្រុមតែមួយគត់ក្នុងចំណោមក្រុមអាហ្វ្រិកទាំង ១០ ដែលចូលរួមព្រឹត្តិការណ៍ World Cup ឆ្នាំនេះ ដែលត្រូវធ្លាក់ចេញត្រឹមវគ្គចែកពូល។ ក្រោយរងបរាជ័យក្នុងការប្រកួតបើកឆាក ពួកគេបានសម្រេចបណ្តេញគ្រូបង្វឹក Sabri Lamouchi ចេញពីតំណែង។

ប៉ុន្តែស្ថានភាពកាន់តែអាក្រក់ទៅៗ នៅពេលទុយនីស៊ីរងបរាជ័យ ០-២ ក្រោមថ្វីជើងប្រទេសជិតខាងលីប៊ី នៅទីក្រុង Sfax កាលពីថ្ងៃសុក្រ។ Ali Youssef បានស៊ុតបាល់ពិន័យ ១១ ម៉ែត្រនាំមុខនៅចុងតង់ទីមួយ មុនពេល Hamdou El Houni បន្ថែមគ្រាប់ទីពីរនៅនាទីទី៦២។

លទ្ធផលនេះធ្វើឱ្យទុយនីស៊ីមានត្រឹម ២ ពិន្ទុប៉ុណ្ណោះ នៅពាក់កណ្តាលយុទ្ធនាការប្រកួតក្នុងពូល H និងកំពុងប្រឈមនឹងហានិភ័យមិនអាចឡើងទៅកាន់វគ្គផ្តាច់ព្រ័ត្រឆ្នាំក្រោយបាន។ ប្រសិនបើពួកគេមិនអាចឆ្លងផុតវគ្គជម្រុះ នោះកំណត់ត្រាចូលរួមប្រកួតជាប់ៗគ្នាចំនួន ១៧ លើករបស់ពួកគេនឹងត្រូវបញ្ចប់។ ស្របពេលជាមួយគ្នា អនាគតរបស់គ្រូបង្វឹក Mouin Chaabani ក៏កំពុងស្ថិតក្រោមសម្ពាធផងដែរ។

ចំណែក Cape Verde ដែលបានធ្វើឱ្យអ្នកគាំទ្របាល់ទាត់ជាច្រើនចាប់អារម្មណ៍ ដោយអាចឡើងដល់វគ្គជម្រុះបន្តនៅ World Cup ក៏ធ្លាប់រងបរាជ័យក្នុងការប្រកួតជម្រុះពីរលើកដំបូងកាលពីខែកញ្ញា។ ប៉ុន្តែពួកគេបានត្រឡប់មករកជ័យជម្នះវិញ ដោយយកឈ្នះលីបេរីយ៉ា ៤-២ ក្នុងទឹកដីខ្លួនឯង។ កីឡាករដែលទើបបង្ហាញខ្លួនលើកដំបូង Derensili Sanches Fernandes របស់ក្លិប Huddersfield Town ក៏ស្ថិតក្នុងចំណោមអ្នកស៊ុតបញ្ចូលទីផងដែរ។

នីហ្សេរីយ៉ាបានធ្វើការផ្លាស់ប្តូរកីឡាករជាច្រើនក្នុងជម្រើសដំបូង បន្ទាប់ពីចាញ់ហ្គីណេ-ប៊ីសាវ ០-៣ ក្នុងការប្រកួតមុនកាលពីពីរខែមុន។ ពួកគេបានត្រឡប់មករកជ័យជម្នះវិញ ដោយខ្សែប្រយុទ្ធរាងខ្ពស់ Tolu Arokodare ស៊ុតបញ្ចូលទីពីរគ្រាប់ ក្នុងជ័យជម្នះ ៣-១ លើតង់ហ្សានី។

ក្រុមមួយចំនួនវាយបកតាមស្មើ និងយកជ័យជម្នះនៅចុងម៉ោង

ខ្សែការពារ Jean Girumugisha បានស៊ុតបញ្ចូលទីនៅសល់ ៧ នាទីមុនចប់ការប្រកួត ជួយឱ្យប៊ូរុនឌី ដែលជាក្រុមមកពីប្រទេសតូចមួយ ទទួលបានលទ្ធផលស្មើ ១-១ ក្នុងការប្រកួតក្រៅដីទល់នឹងហ្សំប៊ី ក្នុងពូល I។

ចំណែក Ryan Ogam បានស៊ុតបញ្ចូលទីនៅនាទីទី៩០ ជួយឱ្យកេនយ៉ាតាមស្មើអាហ្វ្រិកខាងត្បូង ២-២ ក្នុងការប្រកួតនៅទីក្រុង Johannesburg ក្នុងពូល D។

ក្រុមជម្រើសជាតិម៉ាលីបានវាយបកយកឈ្នះរវ៉ាន់ដា ៣-២ នៅទីក្រុង Bamako ដើម្បីទទួលបានជ័យជម្នះជាលើកទី៣ ក្នុងពូល K និងខិតកាន់តែកៀកនឹងការកក់កៅអីទៅកាន់វគ្គផ្តាច់ព្រ័ត្រ ដោយត្រូវការជ័យជម្នះមួយប្រកួតទៀតប៉ុណ្ណោះ។ Mamadou Camara ជាអ្នកស៊ុតគ្រាប់ជ័យជម្នះនៅចុងការប្រកួត។

រីឯ Achraf Hakimi ដែលជាម្ចាស់ពានកីឡាករបាល់ទាត់ឆ្នើមប្រចាំទ្វីបអាហ្វ្រិក បានស៊ុតបញ្ចូលទីពីរគ្រាប់ ជួយឱ្យម៉ារ៉ុកយកឈ្នះនីហ្សេ ៥-១ នៅទីក្រុង Casablanca។ ជ័យជម្នះនេះបានរក្សាកំណត់ត្រាឈ្នះទាំងស្រុងរបស់ម៉ារ៉ុកក្នុងពូល A និងធ្វើឱ្យពួកគេខិតកាន់តែជិតការឡើងទៅកាន់វគ្គផ្តាច់ព្រ័ត្រ។

ការប្រកួតជម្រុះក្នុងពូលជុំទី៣ នៅសល់ ៣ ប្រកួតទៀត ដែលនឹងធ្វើឡើងនៅថ្ងៃសៅរ៍ ដើម្បីបញ្ចប់ជុំទី៣ និងឈានដល់ពាក់កណ្តាលយុទ្ធនាការជម្រុះ។

ការប្រកួតជុំទី៤ នឹងធ្វើឡើងនៅថ្ងៃចន្ទ និងថ្ងៃអង្គារ ខណៈពីរជុំចុងក្រោយនឹងប្រព្រឹត្តទៅនៅខែមីនា។ ព្រឹត្តិការណ៍ Africa Cup of Nations 2027 នឹងរៀបចំរួមគ្នាដោយប្រទេសកេនយ៉ា តង់ហ្សានី និងអ៊ូហ្គង់ដា ចាប់ពីថ្ងៃទី១៩ ខែមិថុនា ដល់ថ្ងៃទី១៧ ខែកក្កដា ឆ្នាំ២០២៧៕