ភ្នំពេញ៖ នៅសល់តែ៣ថ្ងៃប៉ុណ្ណោះការចាប់ឆ្នោតប្រកួតកីឡាជាតិលើកទី១នឹង ប្រព្រឹត្តធ្វើហើយនៅនាយកដ្ឋានអប់រំកាយនិងកីឡាក្នុងវិមានពហុកីឡដ្ឋានជាតិអូឡាំពិក នេះបើយោងតាមការជូនដំណឹងរបស់អគ្គនាយកនៃអគ្គនាយកដ្ឋានអប់រំកាយ និងកីឡាបានឲ្យដឹងកាលពីថៃ្ងទី៧ ខែតុលា ឆ្នាំ២០១៦ ។

ប្រភពព័ត៌មានបានបន្ថែមទៀតថា កន្លងមកព្រឹត្តិការណ៍ប្រកួតកីឡាជាតិលើកទី១នេះ មានកីឡាតែ១៤ប្រភេទប៉ុណ្ណោះដែលសម្រេចដាក់បញ្ចូលទៅក្នុងកម្មវិធីប្រកួត កីឡាជាតិ ក្នុងនោះមានកីឡាអត្តពលកម្ម ហែលទឹក វាយសី បាល់បោះ ប្រដាល់ បាល់ ទាត់ ចំបាប់ វាយកូនឃ្លីលើតុ តេក្វាន់ដូ វាយកូនបាល់ បាល់ទះ ប៉េតង់ ល្បុក្កតោ និងកាយសម្ព័ន្ធ ប៉ុន្តែព័ត៌មានចុងក្រោយ នេះលោករដ្ឋមន្ត្រី ហង់ ជួនណារ៉ុន សម្រេចដាក់បន្ថែមកីឡាប្រពៃណីជប៉ុន១ប្រភេទទៀតគឺ Shorinji Kempo ដែលនេះជាការ កំណត់ចុងក្រោយ ។

គួររំលឹកថា សម្រាប់ព្រឹត្តិការណ៍ប្រកួត កីឡាជាតិលើកទី១មានអត្តពលិក និង ប្រតិភូចូលរួម២.៧០០នាក់ មន្ត្រីបច្ចេក ទេស៥០០នាក់ និងអ្នកស្ម័គ្រចិត្ត ២០០ នាក់ ស្នាក់នៅសណ្ឋាគារចំនួន៨ក្នុងរាជធានីភ្នំពេញ ៕

ដោយ៖ សារីម