ខេត្តកណ្តាល៖ បុរសម្នាក់មាជំងឺសរសៃប្រសាទបានយកកាំបិតអារកសម្លាប់ខ្លួនឯងបណ្តាលឲ្យស្លាប់ក្នុងថ្លុកឈាមដែលមើលទៅគួរឲ្យរន្ធត់ជាទីបំផុត ។ ហេតុការណ៍នេះបានកើតឡើងកាលពីវេលាម៉ោង៧និង៤០នាទីព្រឹក ថ្ងៃទី៩ ខែសីហា ឆ្នាំ២០១៥ ស្ថិតនៅភូមិកោះគរ ឃុំរកាខ្ពស់ ស្រុកស្អាង ខេត្តកណ្តាល ។
សមត្ថកិច្ចដែលចុះធ្វើត្រួតពិនិត្យ និងធ្វើកោសល្យវិច័យទៅលើសាកសពខាងលើបានបញ្ជាក់ថា បុរសរងគ្រោះឈ្មោះ កឹម សៀងឡាយ ភេទប្រុស អាយុ៣០ឆ្នាំ ជនជាតិខ្មែរ ជាមនុស្សវិកលចរិក រស់នៅជាមួយម្តាយឈ្មោះប៉ុក ឡាម អាយុ៧០ឆ្នាំ មានទីលំនៅភូមិកោះគរ ឃុំរកាខ្ពស់ ស្រុកស្អាង ខេត្តកណ្ដាល ។ នៅកន្លែងកើតហេតុ សមត្ថកិច្ចរកឃើញកាំបិតបុ័ងតោ១ដើម ។
ប្រភពបន្តថា តាមការបំភ្លឺរបស់ម្តាយសពថា កូនគាត់មានជំងឺសរសៃប្រសាទ រយៈពេល១២ឆ្នាំមកហើយ ហើយបានវាយបំផ្លាញទ្រព្យសម្បត្តិក្នុងផ្ទះជាប្រចាំ ហើយធ្លាប់យកកាំបិត និងដុំថ្មវាយក្បាលខ្លួនឯង និងរកលោតទឹកសម្លាប់ខ្លួនជាច្រើនលើកច្រើនសារ ។ លុះមកដល់ថ្ងៃកើតហេតុខាងលើ ជនរងគ្រោះបានកាន់កាំបិតបុ័ងតោ កាន់ដៃស្តាំរួចកាប់កដៃឆ្វេងខ្លួនឯង ជាច្រើនកាំបិត បណ្តាលដាច់ដល់ឆ្អឹង និងអារកខ្លួនឯងហូរឈាមដាច់ខ្យល់ស្លាប់ ត្រង់ជណ្តើរ ក្នុងផ្ទះរបស់ខ្លួន ។
ពេលនោះមាន ឈ្មោះ ជា ចាន់ ភេទប្រុស អាយុ៣៣ឆ្នាំ មានផ្ទះជាប់ខាងគ្នា បានឃើញដូច្នេះ បានរត់ទៅរកគាត់(ម្តាយបុរសរងគ្រោះ)នៅផ្សារឈូងលៀប តែរកមិនឃើញ ក៏ទៅប្រាប់មេភូមិកោះគ ឈ្មោះ លី ហុង ដើម្បីមកពិនិត្យកន្លែងកើតហេតុ ។
ក្រោយពេលទទួលបានព័ត៌មានខាងលើ សមត្ថកិច្ចនគរបាលបច្ចេកទេសស្រុក និងប៉ុស្តិរួមជាមួយអាជ្ញាធរ ភូមិឃុំបានមកដល់កន្លែងកើតហេតុពិនិត្យសាកសព និងបានធ្វើការសាកសួរ ពីអាណាព្យាបាល និងសាក្សីឃើញហេតុការណ៍ផ្ទាល់ ថា ជនរងគ្រោះពិតជាបានអារកសម្លាប់ខ្លួនឯងពិតប្រាកដមែន ។
ក្រោយពិនិត្យសាកសពរួច សមត្ថកិច្ចប្រគល់សពជូនក្រុមគ្រួសារធ្វើបុណ្យតាមប្រពៃណី ៕
ដោយ៖ តុងលែង
