អ្នកនាំពាក្យរបស់កម្លាំងទាហានម៉ាលីបានថ្លែងកាលពីថ្ងៃទី៩ ខែសីហា ឆ្នាំ២០១៥ថា ខ្មាន់កាំភ្លើងបានវាយប្រហារបាញ់សម្លាប់ជនស៊ីវិលបណ្តាលឲ្យបាត់បង់ជីវិត១០នាក់ ខណៈដែលវាយប្រហារទៅលើភូមិមួយឈ្មោះ Gaberi ស្ថិតនៅភាគខាងជើងរបស់ប្រទេសម៉ាលី ។ នេះជាសកម្មភាពមួយដែលបានកើតឡើងក្រោយរយៈពេល១ថ្ងៃ បន្ទាប់ពីក្រុមងខ្មាន់កាំភ្លើងសង្ស័យថាជាក្រុមអិស្លាមជ្រុលនិយម បានដណ្តើមកាន់កាប់ដោយបង្ហូរឈាម និងស្លាប់យ៉ាងរង្គាល ដើម្បីគ្រប់គ្រងសណ្ឋាគារមួយកន្លែងស្ថិតនៅភាគឦសានរដ្ឋធានីម៉ាលីនោះ ។
ការវាយប្រហារនេះជាអំពើហិង្សាដែលបានកើតឡើងចុងក្រោយគេបំផុតស្ថិតនៅក្នុងប្រទេសអាហ្វ្រិកភាគខាងលិចមួយ ។ ប្រទេសនេះអង្គការសហប្រជាជាតិទើបតែត្រួសត្រាយឲ្យមានសន្តិភាពមិនទូលំទូលាយមួយរវាងក្រុមផ្តាច់ខ្លួន Tuareg នឹងរដ្ឋាភិបាល។ ក្រមអិស្លាមជ្រុលនិយមផ្តាច់ខ្លួនដែលមានទំនាក់ទំនងជាមួយបណ្តាញភេរវកម្មអាល់កៃដា និងក្រុមឧទ្ទាមថ្មីៗទៀត នៅពេលបច្ចុប្បន្ននេះបានលេចមុខ លេចមាត់ផ្ទុះការវាយប្រហារប្រឆាំងទៅលើកងកម្លាំងរក្សាសន្តិភាពអង្គការសហប្រជាជាតិ និងកងកម្លាំងទាហានរបស់ម៉ាលីផងដែរ ។
សាក្សីពីអ្នកភូមិមួយរូបបានថ្លែងតាមទូរស័ព្ទប្រាប់ទីភ្នាក់ងារព័ត៌មានរ៉យទ័រថា ខ្មាន់កាំភ្លើង៣នាក់បានជិះម៉ូតូចូលទៅក្នុងភូមិ Gaberi ស្ថិតនៅក្នុងតំបន់ Timbuktu កាលពីចុងសប្តាហ៍មុន ហើយបើកការបាញ់ប្រហារ ប៉ុន្តែអ្នកភូមិនៅទីនេះបានបាញ់តដៃធ្វើឲ្យក្រុមខ្មាន់កាំភ្លើងស្លាប់ម្នាក់ផងដែរ ។
ប្រភពបន្តថា ក្រុមខ្មាន់កាំភ្លើងបានវិលត្រឡប់មកវិញមានគ្នាច្រើននាក់បើកការបាញ់ប្រហារនៅគ្រប់ទីកន្លែង ។ មនុស្សពី៩ទៅដល់១០នាក់បានស្លាប់ ។ អ្នកភូមិបានរត់ចោលលំនៅឋានរបស់ខ្លួន ហើយបង្កើតជំរុំមួយស្នាក់នៅចម្ងាយប្រមាណ៤គីឡូម៉ែត្រពីភូមិឋាន ។ ប្រភពបានដាក់ការសង្ស័យក្រុមខ្មាន់កាំភ្លើងទាំងនោះគឺជាក្រុមរដ្ឋអិស្លាម ។
អ្នកភូមិម្នាក់ទៀតនិយាយថា ការវាយប្រហារនេះដើមឡើយជាសកម្មភាពប្លន់តែប៉ុណ្ណោះ ប៉ុន្តែក្រោយមក ខ្មាន់កាំភ្លើងនាំគ្នាមកទាំងហ្វូងបាញ់ប្រហារតែម្តង ។
លោក Guillaume N’Gefa ប្រធានក្រុមសង្កេតការសិទ្ធិមនុស្សអង្គការសហប្រជាជាតិបញ្ជាក់ថា ការវាយប្រហារឆ្លុះបង្ហាញឲ្យឃើញកាន់តែខ្លាំងឡើងថែមទៀតទៅលើបញ្ហាអសន្តិសុខដែលអាក្រក់ឡើងពីមួយថ្ងៃទៅមួយថ្ងៃ ជាពិសេសស្ថិតជុំវិញតំបន់ Timbuktu នោះតែម្តង ។ ការវាយប្រហារទៅលើអ្នកភូមិចេះតែបន្តកើតមាន ក៏ដូចជាការវាយប្រហារទៅលើពលរដ្ឋដែលធ្វើដំណើរទៅផ្សារផងដែរ ។
លោក Guillaume N’Gefa បានបន្តប្រាប់រ៉យទ័រថា ក្រុមប្រដាប់អាវុធកាន់តែបង្កបទឧក្រិដ្ឋយ៉ាងធ្ងន់ដែលមិនដឹងថា ជាក្រុមខាងណានោះទេ ។ ទម្រង់នៃការវាយប្រហាររបស់ពួកគេគឺដដែលៗ ។ ពួកគេវាយប្រហារទៅលើអ្នកភូមិលួចប្លន់ទ្រព្យសម្បតិ្ត ហើយគេចខ្លួនបាត់តែម្តង ។ ពួកគេមានការរៀបចំបានយ៉ាងល្អ ។ ទាំងនេះមិនមែនត្រឹមតែជាចោរប្លន់នោះទេ ។
រដ្ឋាភិបាលម៉ាលីបានចេញសេចក្តីប្រកាសព័ត៌មានថា ជនស៊ីវិល៩នាក់បានបាត់បង់ជីវិត ក្នុងនោះរួមបញ្ចូលបុគ្គលិកបម្រើការឲ្យអង្គការសហប្រជាជាតិ៥រូបផងដែរ ។ ការបាត់បង់ជីវិតរបស់ជនរងគ្រោះស្ថិតនៅក្នុងអំឡុងរយៈពេល២៤ម៉ោងពីការដណ្តើមបានគ្រប់គ្រងសណ្ឋាគារមួយកន្លែងស្ថិតនៅតំបន់ Sevare ។
សេចក្តីប្រកាសបន្តថា ជនរងគ្រោះដែលបាត់បង់ជីវិតរួមមាន ជនជាតិអ៊ុយក្រែន២នាក់, អ្នកបើកបររថយន្តជនជាតិម៉ាលីម្នាក់, ពលរដ្ឋអាហ្វ្រិកខាងត្បូងម្នាក់, នេប៉ាល់ម្នាក់។ ជនជាតិអ៊ុយក្រែន២នាក់, រុស្ស៊ីម្នាក់ និងអាហ្វ្រិកខាងត្បូងម្នាក់ត្រូវបានក្រុមជនល្មើសដោះលែងឲ្យមានសេរីភាព ។
រដ្ឋាភិបាលម៉ាលីបានបញ្ជាក់ដែរថា ក្រុមឧទ្ទាម៤នាក់ត្រូវបាញ់សម្លាប់, ៧នាក់ត្រូវចាប់ខ្លួន នៅក្នុងសកម្មភាពឆ្មក់របស់កម្លាំងរដ្ឋាភិបាល ។ ជាមួយគ្នានេះ ខាងទាហានរដ្ឋាភិបាល៤នាក់បានស្លាប់ និង៨នាក់រងរបួស ។
លោក Souleymane Maiga អ្នកនាំពាក្យកម្លាំងទាហានបានបញ្ជាក់ថា គេនៅមិនទាន់ច្បាស់ប្រាកដនៅឡើយថា ក្រុមដែលវាយប្រហារទៅលើអ្នកភូមិ និងក្រុមដែលវាយដណ្តើមគ្រប់គ្រងសណ្ឋាគារខាងលើ ជាក្រុមតែមួយនោះ ៕
ប្រែសម្រួល៖ យ៉ាត
