ភ្នំពេញ៖ ជនសង្ស័យម្នាក់បានចូលលួចកង់ ជនជាតិបរទេសមិនបានសម្រេចហើយត្រូវម្ចាស់ទាន់នាំគ្នាព័ទ្ធចាប់ វាយឡើងទ្រោម ។
ហេតុការណ៍នេះ កើតឡើងកាលពីវេលាម៉ោង ៣និង៣០នាទីយប់រំលងអធ្រាត្រឈានចូល ថ្ងៃទី១២ ខែសីហា ឆ្នាំ ២០១៥ នៅតាមបណ្ដោយផ្លូវលេខ១៣៥ ក្នុងសាលាយេស៊ូ ស្ថិតក្នុងសង្កាត់ទួលទំពូង១ ខណ្ឌចំការមន ។
តាមសម្ដីរបស់បុរសម្នាក់ជាម្ចាស់កង់បានឲ្យដឹងថា មុនពេលកើតហេតុគេបានឃើញជនសង្ស័យ និងបក្ខពួក ២នាក់ទៀត ជិះម៉ូតូមួយគ្រឿងមិនចាំម៉ាក បើកតាមបណ្ដោយផ្លូវខាងលើ។
ខណៈមកដល់ចំណុចកើតហេតុ ជនសង្ស័យដាក់ឲ្យដៃគូម្នាក់ចុះ រួចក៏ធ្វើសកម្មភាពចូលលួចកង់ តែភ្លាមៗនោះម្ចាស់កង់ឃើញទាន់ នាំគ្នាដេញចាប់បានវាយទ្រោមខ្លួន ទើបប្រគល់ឲ្យសមត្ថកិច្ច។ ចំណែកបក្ខពួក២នាក់ទៀត ជិះម៉ូតូគេចខ្លួនបាត់ ។
ក្រោយកើតហេតុ ជនសង្ស័យត្រូវបានប្រគល់ឲ្យទៅសមត្ថកិច្ចចាត់ការបន្តតាមនិតិវិធី ៕
