ខេត្តកំពង់ឆ្នាំង៖ បុរស២នាក់ មានអាការៈធ្ងន់ និង ម្នាក់ទៀតមានអាការៈស្រាល បន្ទាប់សត្វឪម៉ាល់ជាច្រើនមេដែលបានផ្អើលដេញទិច នៅពីរករណីផ្សេងគ្នានៅស្រុករលាប្អៀរ និង ក្រុងកំពង់ឆ្នាំង ។
ករណីទីមួយបានកើតឡើងកាលពីវេលាម៉ោងជិត៤ល្ងាច ថ្ងៃទី១២ ខែសីហា ឆ្នាំ២០១៥ នៅភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ។ ជនរងគ្រោះនៅក្នុងករណីទី១នេះមាន ឈ្មោះធុច ប៊ុនធុល ភេទប្រុស អាយុ៣៦ឆ្នាំ រស់នៅក្នុងភូមិ ឃុំ កើតហេតុខាងលើ ។
ក្រុមគ្រួសារបានអោយដឹងថា នៅមុនពេលកើតហេតុ ជនរងគ្រោះបានយកកាំបិតទៅកាប់ត្រាយព្រៃក្បែរគុម្ពឫស្សី ដោយពុំដឹងថា មានសំបុកឪម៉ាល់នៅទីនោះឡើយ នៅពេលដែលកំពុង កាប់ក៍ទៅប៉ះសំបុកឪម៉ាល់មួយសំបុកធំហើយបានផ្អើលមេមករោមទិចជនរងគ្រោះតែម្តង បណ្តាលអោយជនរងគ្រោះក្តៅក្រហល់ក្រហាយ ស្រែកហៅគេអោយជួយតែម្តង ។ ក្រោយពេលកើតហេតុ ជនរងត្រូវបានក្រុមគ្រួសារដឹកមកសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង ។
ដោយឡែកករណីទី២ បានកើតឡើងកាលពីវេលាម៉ោង៥ល្ងាច ថ្ងៃទី១២ ខែសីហា ឆ្នាំ២០១៥ នៅភូមិននាមទឹម ឃុំទឹកហូតស្រុករលាប្អៀរ ខេត្តកំពង់ឆ្នាំង ។ ឧប្បត្តិហេតុនេះបណ្តាលអោយជនរងគ្រោះ២នាក់រងគ្រោះធ្ងន់ និងស្រាល ។
ម្នាក់ឈ្មោះមឿន រស់ ភេទប្រុស អាយុ២៥ឆ្នាំ មានអាការៈធ្ងន់ដឹកមកសង្គ្រោះ នៅមន្ទីរពេទ្យខេត្ត និងម្នាក់ទៀតជ្រុញ ភេទប្រុសមានអាការៈស្រាល ជនរងគ្រោះទាំង២នាក់រស់នៅក្នុងភូមិគោកស្តៅ ឃុំទឹកហូត ស្រុករលាប្អៀរ ខេត្តកំពង់ងឆ្នាំង ។
នៅក្នុងមន្ទីរពេទ្យក្រុមគ្រួសារបានអោយដឹងថា នៅមុនពេលកើតហេតុជនរងគ្រោះទាំង ពីរនាក់បានទៅយកសំបុកឳម៉ាល់ នៅគល់ឈើមួយឆ្ងាយពីផ្ទះ នៅពេលដែលរៀបចំដាក់ភ្លើងគុបយកឪម៉ាល់ ក៏ជាន់មែកឈើប៉ះទៅសំបុកឪម៉ាល់ បណ្តាលអោយមេឪម៉ាល់ផ្អើលរោមទិចម្នាក់ជិតឈឹងតែម្តង មានអាការៈធ្ងន់ដឹកមកសង្គ្រោះនៅមន្ទីរពេទ្យខេត្ត ដោយឡែកជនរងគ្រោះម្នាក់ទៀតដែលនៅឆ្ងាយពីគ្នានោះក៏ត្រូវមេឪម៉ាល់ទិចមួយមេរួចរត់យកប្រាស់អាយុតែម្តង ៕
ដោយ៖ ចន្ថា
