ភ្នំពេញ៖ កម្លាំងនគរបាលប៉ុស្តិ៍បឹងកក់ទី២ ខណ្ឌទួលគោក បានឃាត់ខ្លួន ជនសង្ស័យម្នាក់ក្នុងចំណោមបក្ខពួក២នាក់ពីបទហិង្សាដោយចេតនាមានស្ថានទម្ងន់ទោស(ទំនាស់ដោយយកដុំថ្មវាយ បណ្តាលឱ្យរបួស) ហើយត្រូវសមត្ថកិច្ចល្បាតឃើញចាប់បានម្នាក់ ចំណែកម្នាក់ទៀតរត់គេចខ្លួនបាត់ ។
ករណីឃាត់ខ្លួនជនដៃដល់លើនេះ បានធ្វើឡើងកាលពីវេលាម៉ោង១៧និង៥នាទី ថ្ងៃទី១៦ ខែសីហា ឆ្នាំ២០១៥ នៅចំណុចមុខផ្ទះលេខ៤៣ ផ្លូវ លេខ៥៧៤ ក្រុមទី១៨ ភូមិ៤ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ជនរងគ្រោះ សោម ពេជ្រ ភេទប្រុស អាយុ ២០ឆ្នាំ ជនជាតិខ្មែរ មុខរបរ នៅផ្ទះ ស្នាក់នៅ ផ្ទះលេខ៩០E3 ផ្លូវលេខ៥៨៤ ក្រុមទី៦៣ ភូមិ១៣ សង្កាត់បឹងកក់ទី២ ខណ្ឌទួលគោក ( របួសក្បាល០៣កន្លែង ទាំងអស់០៧ថ្នេរ ) ។
ចំណែកឯជនសង្ស័យឈ្មោះ សឹង្ហ សោធុន ហៅ ធុន ភេទ ប្រុស អាយុ ២២ឆ្នាំ ជនជាតិខ្មែរ មុខរបរ ពុំពិតប្រាកដ ស្នាក់នៅផ្ទះលេខ២៦ ផ្លូវបេតុង ភូមិច្រេះ សង្កាត់ភ្នំពេញថ្មី ខណ្ឌសែនសុខ ។ វត្ថុតាងដែលសមត្ថកិច្ចចាប់យកពីជនសង្ស័យមាន ដុំថ្មបេតុង១ដុំ និង ម៉ូតូ១គ្រឿងម៉ាក Honda C125 ពណ៌ខ្មៅ ពាក់ស្លាកលេខ ភ្នំពេញ 1CS-9529 ។
មន្ត្រីនគរបាលប៉ុស្តិ៍បឹងកក់ទី២ បានឲ្យដឹងថា នៅមុនពេលកើតហេតុ ជនសង្ស័យមានគ្នា ២នាក់ បានជិះម៉ូតូមកចំណុចកើតហេតុ ហើយទូរស័ព្ទហៅជនរងគ្រោះដែលត្រូវជា មិត្តភក្តិ នឹងគ្នាទៅជួប ពេលជនរងគ្រោះជិះម៉ូតូទៅដល់ ស្រាប់តែជនសង្ស័យម្នាក់ឈ្មោះ ហេង ភេទប្រុស អាយុ ប្រហែល ២២ឆ្នាំ ( គេចខ្លួនបាត់ ) បានដក អាវុធខ្លីពុំស្គាល់ម៉ាក ភ្ជង់គំរាមជនរងគ្រោះ ហើយបានយកម៉ាស៊ីនហ្គេមម៉ាក My tap វាយទៅជនរងគ្រោះ បណ្តាលឱ្យបែកឧបករណ៍នេះ ហើយជនសង្ស័យឈ្មោះ សឹង្ហ សោធុន បានរើសដុំថ្មវាយក្បាលជនរងគ្រោះ បណ្តាលឱ្យរបួស ភ្លាមនោះមានការអន្តរាគមន៍ ពីកម្លាំងល្បាតរបស់នគរបាលប៉ុស្តិ៍បឹងកក់ទី២ បានឃាត់ខ្លួនជនសង្ស័យ១នាក់ ឈ្មោះ សឹង្ហ សោធុន ចំណែកជនសង្ស័យ១នាក់ទៀត ឈ្មោះ ហេង បានរត់គេចខ្លួនបាត់ ។
បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌទួលគោក ដើម្បីសាកសួរ កសាងសំណុំរឿងបញ្ជូនទៅសាលាដំបូងរាជធានីភ្នំពេញ ចាត់ការតាមនីតិវិធី ៕
ដោយ៖ ស ដារ៉ា
