ភ្នំពេញ៖ អតីតតារាចម្រៀងនិងផលិតករប្រចាំផលិតកម្មហង្សមាស កញ្ញា ឈិត សុវណ្ណបញ្ញា អ្នកនាងយក់ ថិតរដ្ឋា និងលោកអ៊ិន ទីតូបង្ហាញមុខផ្លូវការនៅផលិតកម្មថោនជាផ្លូវការហើយគឺក្រោយចេញពីហង្សមាស។ ពួកគេបានបង្ហាញវត្តមានក្នុងកម្មវិធីថតបទចម្រៀងសម្រាប់ពិធីចូលឆ្នាំថ្មីប្រពៃណីជាតិខ្មែរខាងមុខរបស់ផលិតកម្មថោនកាលពីថ្ងៃទី១៣ ខែកុម្ភៈនេះ។
វត្តមានតារាចម្រៀង និងផលិតករទាំង៣រូបក្នុងផលិតកម្មថោន បានបង្កើតឲ្យមានការភ្ញាក់ផ្អើលកាន់តែខ្លាំងសម្រាប់អ្នកគាំទ្រ ក្រោយពីដំណឹងចាកចេញពីផលិតកម្មហង្សមាសកាលពីសប្តាហ៍មុនបានផ្ទុះឡើងបន្តបន្ទាប់ បើទោះបីជាការផ្លាស់ប្តូរផលិតកម្មពីមួយទៅមួយរបស់សិល្បករនិងផលិតករគឺជារឿងធម្មតា។
អតីតតារាចម្រៀងស្រីល្បីឈ្មោះកញ្ញា ឈិត សុវណ្ណបញ្ញា ដែលល្បីវេចបង្វេចពីផលិតកម្មហង្សមាសចូលជ្រកក្រោមដំបូលផលិតកម្មថោននោះទទួលបានបទចម្រៀង៥បទភ្លែតសម្រាប់អបអរពិធីចូលឆ្នាំថ្មីប្រពៃណីជាតិខ្មែរខាងមុខ។ តារាស្រីរូបនេះបញ្ជាក់ថា នាងទើបនឹងសម្រេចចិត្តចូលច្រៀងជាផ្លូវការឲ្យផលិតកម្មថោនបានទើប៣ថ្ងៃប៉ុណ្ណោះ ហើយនាងទទួលបាន៥បទភ្លាមៗសម្រាប់ឱកាសចូលឆ្នាំខ្មែរខាងមុខនេះ។ នាងស្នើមិនធ្វើការបកស្រាយលម្អិតអំពីកិច្ចសន្យាក្នុងផលិតកម្មថ្មី និងជុំវិញការចាកចោលផលិតកម្មចាស់។ នាងថា បទចម្រៀងថ្មី៥បទនេះគឺជាការផ្តល់ជូនលើកដំបូងរបស់ផលិតកម្ម ហើយនាងមិនទាន់រំពឹងយ៉ាងណានៅឡើយថា នឹងអាចទាក់ទាញការចាប់អារម្មណ៍របស់ទស្សនិកជនកម្រិតណានោះទេ។
តារាចម្រៀងស្រីល្បីឈ្មោះអ្នកនាងយក់ ថិតរដ្ឋា វិញក៏បានបង្ហាញវត្តមានក្នុងផលិតកម្មថោនដំណាលគ្នានឹងវត្តមានតារាចម្រៀងស្រីឈិត សុវណ្ណបញ្ញា និងផលិតករល្បីឈ្មោះលោកអ៊ិន ទីតូ ដែរ។ នាងនៅតែបង្ហាញអារម្មណ៍សោកស្តាយ និងអាឡោះអាល័យជាមួយផលិតកម្មហង្សមាស ប៉ុន្តែនាងសម្រេចចិត្តចាកចេញព្រោះតែផលិតកម្មនេះមិនបានផ្តល់បទចម្រៀងឲ្យនាងតាមកាលកំណត់ ដែលធ្វើឲ្យនាងបាត់បង់ទីផ្សារច្រៀងជាហូរហែរ។ តារាស្រីរូបនេះបន្តថា ដើមឡើយនាងពិតជាមិនដាច់ចិត្តចាកចេញប៉ុន្តែស្វាមីនាងជាអ្នកជំរុញឲ្យនាងចាកចេញហើយនាងយកគំនិតតាមស្វាមីព្រោះមានហេតុផលគ្រប់គ្រាន់ក្នុងការបោះបង់ទ្រនុំចាស់។ នាងបញ្ជាក់ថា នាងមានអ្នកគាំទ្រមួយចំនួនបាននិពន្ធបទភ្លេងទំនុកច្រៀងល្អៗសម្រាប់នាងច្រៀងហើយបានដាក់ទៅខាងផលិតកម្មថោនគឺផលិតកម្មនេះទទួលយកទាំងអស់។
អតីតអ្នកដឹកនាំការផលិតរបស់ផលិតកម្ម និងទូរទស្សន៍ហង្សមាស លោកអ៊ិន ទីតូស្នើមិនធ្វើការបកស្រាយទេជុំវិញការបង្ហាញមុខនៅផលិតកម្មថោន ប៉ុន្តែអ្នកសិល្បៈលើកឡើងថា ផលិតកររូបនេះបង្ហាញខ្លួនក្នុងនាមជាអ្នកដឹកនាំការផលិតបទចម្រៀងក្នុងឱកាសនោះ។ ផលិតកររូបនេះក៏នឹងទទួលបានតំណែងខ្ពស់មួយនៅក្រុមហ៊ុនថោនគ្រុប ពិសេសក្នុងការដឹកនាំការផលិតកម្មវិធីទូរទស្សន៍ថោន ដែលនឹងចាប់ផ្តើមដំណើរការចាក់ផ្សាយក្នុងពេលដ៏ខ្លីខាងមុខនេះផងដែរ៕ វឌ្ឍនា
