រាជធានីភ្នំពេញ៖ ជនសង្ស័យម្នាក់ជាអ្នកឆបោកម៉ូតូយ៉ាងសកម្ម ត្រូវសមត្ថកិច្ចប៉ុស្តិ៍ទន្លេបាសាក់ក្របួតជាប់បន្ទាប់ពីជនសង្ស័យរូបនេះធ្វើសកម្មភាពឆបោកពីអ្នករត់ម៉ូតូឌុបយ៉ាងជាក់ស្ដែងនៅចំណតផ្សារអ៊ីអនម៉លបានសំរេច តែសំណាងល្អត្រូវសមត្ថកិច្ចប៉ុស្តិ៍ទន្លេបាសាក់ឃាត់ខ្លួនបានភ្លាមៗ ព្រោះជនសង្ស័យរូបនេះជាមុខសញ្ញាចាស់ដែលសមត្ថកិច្ចកំពុងតែតាមចាប់យូរណាស់មកហើយ ។
ហេតុការណ៍នេះបានកើតឡើងកាលពីវេលាប្រមាណម៉ោង៩យប់ ថ្ងៃទី១៧ សីហា ២០១៥ នៅចំណុចកើតហេតុផ្សាអ៊ីអនម៉ល ដែលស្ថិតក្នុងសង្កាត់ទន្លេបាសាក់ ខណ្ឌចំកាមន រាជធានីភ្នំពេញ ។
ជនសង្ស័យមានឈ្មោះ ឈាន រតនៈ ភេទប្រុសអាយុ៣២ឆ្នាំ មុខរបរ និងស្នាក់នៅមិនពិតប្រាកដ ។ ចំណែកជនរងគ្រោះមានឈ្មោះ ហេង ភីរុណ អាយ២៥ឆ្នាំ ស្នាក់នៅផ្ទះលេខ 49E1 តាមបណ្តោយផ្លូវលេខ៩៥ ស្ថិតក្នុងសង្កាត់បឹងកេងកង៣ ខណ្ឌចំកាមន ជិះម៉ូតូម៉ាកហុងដាឌ្រីមសេ១២៥ សេរី២០១២ ពណ៌ខ្មៅ ពាក់ស្លាកលេខភ្នំពេញ1L-1314 ។
តាមប្រភពព័ត៌មានពីជនសង្ស័យបានសារភាពឱ្យដឹងថា មុនពេលកើតហេតុរូបគេបានឈរនៅម្តុំស្ពានដែកស្ទឹងមានជ័យ ហើយបានសម្លឹងរកមើលម៉ូតូឌុបណាដែលជិះម៉ូតូទំនើបទើបហៅជិះ បន្ទាប់មកឈរអស់មួយសន្ទុះក៏ឃើញបុរសម្នាក់ដែលជាម៉ូតូឌុបជិះម៉ូតូមួយគ្រឿងម៉ាក ហុងដាឌ្រីមសេ១២៥ សេរី២០១២ ពណ៌ខ្មៅ ពាក់ស្លាកលេខភ្នំពេញ1L-1314 ធ្វើដំណើរកាត់មុខជនសង្ស័យ បន្ទាប់មកជនសង្ស័យក៏បានហៅម៉ូតូឌុបឱ្យឈប់ហើយឱ្យជនរងគ្រោះដឹកខ្លួនទៅផ្សារថ្មី ពេលទៅដល់ផ្សារថ្មីហើយជនសង្ស័យបានឱ្យជនរងគ្រោះចាំនៅខាងក្រៅមួយភ្លែត មួយសន្ទុះក្រោយមកជនសង្ស័យបានចេញមកវិញ និងបានឱ្យជនរងគ្រោះដឹកខ្លួនទៅផ្សារទួលទំពូងទៀតក្រោយមកជនសង្ស័យក៏បានហៅឱ្យជនរងគ្រោះចូលដើរផ្សារជាមួយគ្នា ដោយយកក្រដាសវិក្កយប័ត្រក្លែងក្លាយមួយសន្លឹកដែលធ្វើខ្លួនឯងហើយបានប្រាប់ជនរងគ្រោះថា ខ្លួនជាអ្នករកស៊ីទិញទំនិញអស់ម្តងៗរាប់ពាន់ ។
ក្រោយមកជនសង្ស័យបានបោកឱ្យជនរងគ្រោះដឹកខ្លួនទៅផ្សារទំនើបអ៊ីអនម៉លទៀត តែនៅពេលដែលជនរងគ្រោះដឹកជនសង្ស័យបានពាក់កណ្តាលផ្លូវក៏បាននិយាយទៅកាន់ជនរងគ្រោះថាជិះយឺតៗចឹងខ្ញុំកំពុងតែប្រញាប់ផងទុកឱ្យខ្ញុំជាអ្នកឌុបម្តងវិញមើល បន្ទាប់មកជនរងគ្រោះក៏ព្រមបានឱ្យជនសង្ស័យដឹកម្តង ពេលមកដល់ផ្សារទំនើបអ៊ីអនម៉លជនសង្ស័យក៏បានជិះម៉ូតូចូលទៅផ្ញើ ក្រោយមកជនសង្ស័យក៏បានយកកន្ទុយសំបុត្រ និងសោម៉ូតូរបស់ជនរងគ្រោះទុក ចំណែកជនរងគ្រោះក៏មិនចាប់អារម្មណ៍នឹងសំបុត្រនិងសោម៉ូតូដែរ ព្រោះដើរផ្សារជាមួយគ្នាស្ទើរពេញមួយថ្ងៃហើយជនរងគ្រោះ និងជនសង្ស័យក៏បានដើរឡើងទៅលើផ្សារទំនើបអ៊ីអនម៉លជាមួយគ្នា ហើយជនសង្ស័យក៏បានដើរចូលទៅកន្លែងលក់កន្សែង ហើយបានប្រាប់ជនរងគ្រោះថាឱ្យដើរមើលកន្សែងណាស្អាតបួនដប់ទៅចាំរូបខ្ញុំជាអ្នកគិតលុយឱ្យ ចំណែករូបខ្ញុំចុះទៅខាងក្រោមមើលស្បែកជើងមួយភ្លែត ព្រោះជិតដល់ម៉ោងត្រូវទៅយកទំនិញឱ្យគេហើយណា ។
បន្ទាប់មកជនសង្ស័យក៏បានចុះមកខាងក្រោម តែមិនមែនចុះមកមើលស្បែកជើងទេ គឺរត់ទៅយកម៉ូតូរបស់ជនរងគ្រោះនៅពេលដែលជនសង្ស័យក៏បានយកម៉ូតូរបស់ជនរងគ្រោះចេញមកបេះសំបុត្រភ្លាមៗនោះស្រាប់តែសមត្ថកិច្ចប៉ុសិ៍្តទន្លេបាសាក់ក៏បានធ្វើការឃាត់ខ្លួនតែម្តង។ ព្រោះជនសង្ស័យរូបនេះបានធ្វើសកម្មភាពឆបោកម៉ូតូគេអស់៣គ្រឿងមកហើយ ពីផ្សារទំនើបអ៊ីអនម៉លនេះដោយលេងក្បាច់ដ៏ដែលៗទើបសមត្ថកិច្ចមកពិនិត្យមើលកាមេរ៉ា និងផ្តិតរូបរបស់ជនសង្ស័យរូបនេះទៅប្រាប់អ្នកដែលមើលការខុសត្រូវនៅកន្លែងកឹបសំបុត្រថា បើឃើញជនសង្ស័យដូចក្នុងរូបនេះ ត្រូវទំនាក់ទំនងទៅសមត្ថកិច្ចភ្លាមៗគាត់ នឹងចាត់កំលាំងឱ្យមកដល់ភ្លាមៗ ។
បន្ទាប់ពីសមត្ថកិច្ចធ្វើការឃាត់ខ្លួនបានជនសង្ស័យ បានជនរងគ្រោះក៏បានភ្ញាក់ខ្លួនថា សំបុត្រ និងសោម៉ូតូរបស់ខ្លួននៅនិងជនសង្ស័យនោះក៏ប្រញាប់រត់ចុះមកដល់ទាន់ពេលសមត្ថកិច្ចកំពុងឃាត់ខ្លួនជនសង្ស័យដែល៕
បច្ចប្បន្នជនសង្ស័យត្រូវបាននគរបាលប៉ុស្តិ៍ទន្លេបាសាក់បញ្ចូនទៅអធិការខណ្ឌចំការមននិងកសាងសំណុំរឿង ដើម្បីចាក់ការតាមផ្លូវច្បាប់ ៕
...
ដោយ៖ ស រស្មី
