ខេត្តកណ្តាល ៖ ជនសង្ស័យម្នាក់ត្រូវបានកម្លាំងនគរបាលស្រុកអង្គស្នួលធ្វើការចាប់ខ្លួន រួមនិងថ្នាំញៀន ម៉ាទឹកកក និងសម្ភារប្រើប្រាស់មួយចំនួន ។ ការចាប់ខ្លួនគឺធ្វើឡើងនៅចំណុចផ្លូវលំ ភូមិព្រៃបឹង ឃុំបែកចាន ស្រុកអង្គស្នួល ខេត្តកណ្តាល កាលពីវេលាម៉ោង៨ និង២០នាទីយប់ ថ្ងៃទី៣ ខែមីនា ឆ្នាំ២០១៧ ។
សមត្ថកិច្ចនគរបាលបានឲ្យដឹងថា ជនសង្ស័យឈ្មោះ ប៊ុន រិទ្ធី ហៅឡូញ ភេទប្រុស អាយុ៣៤ឆ្នាំ ជនជាតិខ្មែរ មុខរបរកម្មករសំណង់ នៅភូមិព្រៃបឹង ឃុំបែកចាន ស្រុកអង្គស្នួល ខេត្តកណ្តាល ។ ដកហូតបានម្សៅក្រាមសថ្លា សង្ស័យសារធាតុញៀន ម៉ាទឹកកក ២កញ្ចប់តូច និងឧបករណ៍ប្រើប្រាស់ថង់ច្រកថ្នាំមួយចំនួន ។
លោកអធិការស្រុកអង្គស្នួលបានឲ្យដឹងថា ការឃាត់ខ្លួនជនសង្ស័យរូបនេះ បន្ទាប់ពីទទួលព័ត៌មានពីពលរដ្ឋក្នុងភូមិបានរាយការណ៍ពីសកម្មភាពជនសង្ស័យកំពុងជួញដូរថ្នាំញៀននៅចំណុចខាងលើ កម្លាំងជំនាញអធិការ ដ្ឋាននគរបាលស្រុកអង្គស្នួល បានសហការជាមួយនគរបាលប៉ុស្តិ៍បែកចាន ចុះទៅឃាត់ខ្លួនបានម្នាក់ និងម្សៅសថ្លា សង្ស័យសារធាតុញៀនចំនួន២កញ្ចប់តូច ។
តាមចម្លើយសារភាពរបស់ជនសង្ស័យបានឆ្លើយថា ចំពោះថ្នាំញៀនខ្លួនទិញពីឈ្មោះស៊ុន វិបុល ភេទប្រុស អាយុ៣៩ឆ្នាំ ជនជាតិខ្មែរ ស្នាក់នៅភូមិព្រៃបឹង ឃុំបែកចាន ស្រុកអង្គស្នួល ខេត្តកណ្ដាល ។
ដោយមានបទបញ្ជាពីលោកស្នងការ ស្នងការរងទទួលផែន និងសម្របសម្រួលពីលោកព្រះរាជអាជ្ញាចូលរួមក្រុម ប្រឹក្សាឃុំភូមិ និងម្ដាយជនសង្ស័យ ឆែកឆេររកឃើញឧបករណ៍ប្រើប្រាស់ និងថង់ច្រកថ្នាំមួយចំនួន។
បច្ចប្បន្នជនសង្ស័យឃាត់ខ្លួននៅអធិការដ្ឋាននគរបាលស្រុកអង្ដស្នួល ដើម្បីបន្តតាមនិតិវិធី ៕ ស្អាងជ័យ
