ខេត្តស្វាយរៀង៖ ជនសង្ស័យ៣នាក់ត្រូវបានកងរាជអាវុធហត្ថខេត្តចុះបង្ក្រាបចាប់ឃាត់ខ្លួនពាក់ព័ន្ធករណីជួញដូរគ្រឿងញៀន និងបញ្ជូនទៅសាលាដំបូងខេត្តនៅព្រឹកថ្ងៃទី២២ ខែមេសា ឆ្នាំ២០១៧នេះ។

មន្ត្រីអាវុធហត្ថខេត្តបានឲ្យដឹងថា នៅថ្ងៃទី២០ ខែមេសា ឆ្នាំ២០១៧ វេលាម៉ោង១៤និង៣០នាទីរសៀលកម្លាំងកងរាជអាវុធហត្ថស្រុក កងកម្លាំងរាជអាវុធហត្ថខេត្ត ដឹកនាំដោយលោកព្រះរាជ្ញារងខេត្តលោក ស្រេង វុទ្ធា ចុះបង្រ្កាបមុខសញ្ញាជួញដូរ និងប្រើប្រាស់គ្រឿងញៀននៅចំណុចភូមិធ្លក ឃុំក្រោលគោ ឃាត់ខ្លួនជនសង្ស័យបានចំនួន៣នាក់ រួមនិងវត្ថុតាងមួយចំនួន។

ប្រភពបន្តថា ជនសង្ស័យមានទី១ឈ្មោះសោម ចន្ថា ភេទប្រុស អាយុ៤៤ឆ្នាំ មុខរបរធ្វើស្រែ, ទី២ឈ្មោះកែវ សារី ភេទប្រុស អាយុ៣៧ឆ្នាំ មុខរបរធ្វើស្រែអ្នកទាំង២នាក់ រស់នៅភូមិតាប៉ ឃុំតាសួស ស្រុកស្វាយជ្រំ ខេត្តស្វាយរៀង និងទី៣ឈ្មោះសន បូរ៉ា ភេទប្រុស អាយុ១៥ឆ្នាំ មុខរបរសិស្ស រស់នៅភូមិអង្កាញ់ ឃុំប្រធាតុ ស្រុកកំពង់ត្របែក ខេត្តព្រៃវែង។

ចំពោះវត្ថុតាងអូសរឹបបានថ្នាំញៀនចំនួន៣កញ្ចប់តូច (ក្រាមពណ៌ស ហៅម៉ាទឹកកក) ម៉ូតូ២គ្រឿង ដបទឹកសុទ្ធ១ និងទុយោសម្រាប់ជក់គ្រឿងញៀន និងសម្ភារវេចខ្ចប់គ្រឿងញៀនមួយចំនួន៕ យឹម សុថាន