សារព័ត៌មានរុស្ស៊ីRIA Novosti បានផ្សាយថា រុស្ស៊ីបានបញ្ចូននាវាចម្បាំងទៅធ្វើសមយុទ្ធនៅជាប់ព្រំដែនស៊ីរីប៉ុន្តែមិនបានបញ្ជាក់លម្អិតពីការធ្វើសមយុទ្ធនោះឡើយ។ នៅពេលនេះទីតាំងយោធារបស់រុស្ស៊ីនៅក្បែរកំពុងផែTartus របស់ស៊ីរី។
ក្នុងចំណោមនាវាចម្បាំង៤គ្រឿងមានពីរគ្រឿងស្ថិតនៅក្នុងដែនសមុទ្រមេឌីទែរ៉ាណេស្រាប់។ នៅពេលនេះនាវាMoskva និងនាវាយាមល្បាតLadniy ក៏បានចាក់ចេញពីកំពុងផែនៅដែនសមុទ្រខ្មៅប៉ុន្តែមិនដឹងថាពេលណាទៅដល់ទីតាំងធ្វើសមយុទ្ធនោះឡើយ។
រយៈពេលចុងក្រោយនេះរុស្ស៊ីបង្កើតវត្តមានយោធានៅជិតប្រទេសស៊ីរីទាំងកម្លាំងទាហានជើងទឹកជើងគោកនិងជើងអាកាស។ កាលពីថ្ងៃទី២៣ខែមិថុនា ក្រុមចារកម្មអាមេរិកបានបង្ហាញរូបភាពផ្កាយរណបបង្ហាញឲ្យឃើញថារុស្ស៊ីបានបង្កើនកម្លាំងយោធានៅតំបន់ឈូងសមុទ្រជាប់ស៊ីរីក្នុងគោលដៅការពាររដ្ឋាភិបាលរបស់លោកអាលអាសាដដែលជិតដួលរលំ។
វត្តមានរបស់យោធារុស្ស៊ីនៅក្បែរប្រទេសស៊ីរី ដោយក្រុមអ្នកឯកទេសរុស្ស៊ីដឹងយ៉ាងច្បាស់ថាលោកខាងលិចអាចនឹងវាយប្រហារផ្តួលរំលំរដ្ឋាភិបាលរបស់លោកអាលអាសាដដើម្បីបញ្ចប់ការហូរចូលជនភៀសខ្លួនទៅកាន់តំបន់អឺរ៉ុប។
ក្នុងពេលជាមួយគ្នានេះមន្ត្រីរុស្ស៊ីនិងស៊ីរីបានច្រាន់ចោលការចោទប្រកាន់ខាងលើ។ ប៉ុន្តែអ្នកនាំពាក្យរដ្ឋាភិបាលរុស្ស៊ីបញ្ជាក់ថា ទីក្រុងមូស្កូអាចនិងបញ្ចូនទាហានទៅកាន់ស៊ីរី តាមសំណើររបស់រដ្ឋាភិបាលលោកអាលអាសាដ៕
ប្រែសម្រួល៖ ម៉ែវ សាធី
