ភ្នំពេញ៖ រថយន្តម៉ាកSsangyong ពាក់ស្លាកលេខរដ្ឋ ១គ្រឿង បើកបុករថយន្តដឹកទឹកកកអនាម័យ បណ្តាលឲ្យខ្ទាតទៅបុកជញ្ជាំងរបងពិភពថ្មី រងការខូចខាត រីឯរថយន្តបង្ករងការខូចខាតយ៉ាងដំណំ។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៩ព្រឹកថ្ងៃទី៣ ខែឧសភា ឆ្នាំ២០១៧ ស្ថិតតាមបណ្តោយផ្លូវបេតុង ចូលបុរីពិភពថ្មី ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តSsangyong១គ្រឿង ពណ៌ខ្មៅ ពាក់ស្លាកលេខរដ្ឋ25 2-0423 បើកបរក្នុងល្បឿនយ៉ាងលឿនទិសដៅពីត្បូងទៅជើង លុះមកដល់ចំណុចកើតហេតុក៏រេចង្កូតទៅបុកនិងរថយន្តដឹកទឹកកកពេញទំហឹងពីក្រោយជាប្រភេទរថយន្តកូរ៉េ ពណ៌ស ក្បាលពណ៌ខៀវ ពាក់ស្លាកលេខភ្នំពេញ2C-7835 បណ្តាលឲ្យរថយន្តដឹកទឹកកកអនាម័យ រេចង្កូតទៅបុកជញ្ជាំងរបងពិភពថ្មី រងការខូចខាត រីឯរថយន្តបង្ករងការខូចខាតមួយកំណាត់មុខទៅមុខលែងរួច។

ក្រោយពេលកើតហេតុ គេឃើញមានមនុស្សមកសណ្តោងយករថយន្តចេញពីកន្លែងកើតហេតុអស់ ហើយគេមិនដឹងថាភាគីទាំងសងខាងដោះស្រាយគ្នាដោយវិធីណានោះទេ។

បើតាមសម្តីរបស់លោក ហឿន វឿន នាយផ្នែកនគរបាលចរាចរខណ្ឌសែនសុខបានឲ្យដឹងថា លោកមិនបានដឹងរឿងគ្រោះថ្នាក់ចរាចរណ៍ខាងលើទេ ព្រោះមិនមានអ្នករាយការណ៍ ។ លោកបន្តថា ប្រហែលជាភាគីទាំងពីរដោះស្រាយគ្នាបញ្ចប់រឿងដោយខ្លួនឯងហើយទើបមិនរាយការណ៍ប្រាប់សមត្ថកិច្ច៕ តុង សីហា