ភ្នំពេញ៖ ជនសង្ស័យ៣នាក់រួមនិងម្សៅក្រាមថ្លាសចំនួន៣កញ្ចប់ធំ ២កញ្ចប់តូច និងឧបករណ៍ប្រើប្រាស់មួយចំនួន ត្រូវសមត្ថកិច្ចនគរបាលឃាត់ខ្លួន កាលពីវេលាម៉ោង១១ព្រឹកថ្ងៃទី៣ ខែឧសភា ឆ្នាំ២០១៧ នៅចំណុចបន្ទប់ជួលផ្លូវបេតុង ភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ជនសង្ស័យទាំង៣នាក់ដែលឃាត់ខ្លួននោះទី១មានឈ្មោះ ផល ផៃ ភេទប្រុស អាយុ២៦ឆ្នាំ មុខរបរធ្វើការរោងចក្រ ស្នាក់នៅបន្ទប់ជួលខាងលើ និងមានស្រុកកំណើតប៉ប៉ែត ឃុំមានជ័យ ស្រុកស្រីសន្ធរ ខេត្តកំពង់ចាម ទី២ឈ្មោះ សួស សុវណ្ណារ៉ា ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅភូមិបន្លាស្អិត សង្កាត់ឃ្មួញ ខណ្ឌសែនសុខ និងទី៣ឈ្មោះ ធូ រិន ភេទប្រុស អាយុ២២ឆ្នាំ មុខរបរអ្នកលើកអីវ៉ាន់ដាក់តាមឡាន ស្នាក់នៅខាងក្រោយសាលាតិចណូ ខណ្ឌទួលគោក រាជធានីភ្នំពេញ។

សមត្ថកិច្ចបានឲ្យដឹងថា មុននិងឈានដល់ការឃាត់ខ្លួនជនសង្ស័យទាំង៣នាក់ខាងលើនេះគឺកម្លាំងនគរបាលផ្នែកព្រហ្មទណ្ឌខណ្ឌបានសហការជាមួយនិងនគរបាលប៉ុស្តុិ៍ភ្នំពេញថ្មីបានប្រើប្រាស់ជំនាញចុះធ្វើរដ្ឋបាលនៅចំណុចខាងលើទើបឈានដល់ការឃាត់ខ្លួនពួកគេទាំង៣នាក់រួមនិងវត្ថុតាងតែម្តង ដោយចោទពីបទជួញដូរនូវសារធាតុញៀនដោយខុសច្បាប់។ក្នុងនោះចាប់យកវត្ថុតាង នូវម្សៅក្រាមពណ៌ថ្លាសចំនួន៣កញ្ចប់ធំ និង២កញ្ចប់តូច រួមជាមួយឧបករណ៍សម្រាប់ប្រើប្រាស់មួយចំនួន។

បច្ចុប្បន្នជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខដើម្បីកសាងសំណុំរឿងបញ្ជូនទៅតុលាកាចាត់ការបន្តតាមនីតិវិធី៕ តុង សីហា