តំណាងរាស្ត្រនេប៉ាល់មួយរូប ដែលមានការរំពឹងថា នឹងក្លាយជានាយករដ្ឋមន្ត្រីនាពេលខាងមុខនោះ កាលពីថ្ងៃទី៣០ ខែកញ្ញា ឆ្នាំ២០១៥ បានចោទប្រកាន់មហាយក្សជិតខាង គឺប្រទេសឥណ្ឌាថាជាអ្នករំលោភច្បាប់អន្តរជាតិ ដោយសារតែបញ្ឈប់សកម្មភាពផ្គត់ផ្គង់ទំនិញឆ្លងកាត់តាមបន្ទាត់ព្រំដែន ធ្វើឲ្យមានការរាំងស្ទះដល់ប្រជាពលរដ្ឋ ។
ចាប់តាំងពីថ្ងៃព្រហស្បតិ៍សប្តាហ៍មុនមកម្ល៉េះ បាតុករដែលដឹកនាំដោយសមាជិកក្រុមជនជាតិភាគតិចនៅភាគខាងត្បូងនេប៉ាល់នោះបានធ្វើបាតុកម្មបិទផ្លូវដ៏សំខាន់មួយសម្រាប់ដឹកទំនិញចូលមកកាន់ទឹកដីនេប៉ាល់ពីប្រទេសឥណ្ឌាដើម្បីជាការតវ៉ាប្រឆាំងចំពោះការអនុម័តរដ្ឋធម្មនុញ្ញថ្មីរបស់រដ្ឋាភិបាលនេប៉ាល់កាលពីថ្ងៃទី២០ ខែកញ្ញា ឆ្នាំ២០១៥ ។
មន្ត្រីបានលើកឡើងផងដែរថា រថយន្តដឹកទំនិញជាច្រើនគ្រឿងដែលត្រូវឆ្លងកាត់នៅតាមច្រកព្រំដែននោះត្រូវបានគេបដិសេធន៍មិនផ្តល់ការអនុញ្ញាតឲ្យឆ្លងកាត់ ដែលសកម្មភាពនេះនាំឲ្យមានបារម្ភថា កង្វះថាមពលប្រើប្រាស់អាចនឹងកើតមាននៅក្នុងតំបន់ ហើយនៅតាមស្ថានីយប្រេងនានានឹងត្រូវបិទទ្វារ ដោយសារគ្មានប្រេងលក់ទៅឲ្យអ្នកប្រើប្រាស់ ។
លោក K P Oli មេបក្សកាន់អំណាចនេប៉ាល់បានថ្លែងថា រដ្ឋាភិបាលប្រទេសឥណ្ឌា ក្រៅពីក្រុមបាតុករ គឺជាអ្នកទទួលខុសត្រូវនៅក្នុងការបញ្ឈប់ដឹកទំនិញឆ្លងកាត់តាមបន្ទាត់ព្រំដែន ដែលជាសកម្មភាពតវ៉ាប្រឆាំងមិនផ្លូវការមួយទៅលើរដ្ឋធម្មនុញ្ញថ្មីដែលធ្វើឲ្យគេមិនសប្បាយចិត្តនោះ ។ ការថ្លែងបែបនេះរបស់មន្ត្រីនេប៉ាល់បានកើតឡើង បន្ទាប់ពីមានការខឹងសម្បារពីសាធារណជននេប៉ាល់ ដោយចោទប្រកាន់ទៅលើប្រទេសឥណ្ឌាថា ជាអ្នកស្ថិតនៅពីក្រោយខ្នងនៃការបិទផ្លូវរបស់ក្រុមបាតុករ ។ ទីក្រុងញូវដេលីបានបដិសេធន៍ពាក់ព័ន្ធករណីខាងលើនេះ ហើយបានជំរុញឲ្យរដ្ឋាភិបាលនេប៉ាល់បើកកិច្ចពិភាក្សាជាមួយក្រុមបាតុកររបស់ខ្លួន ដើម្បីបញ្ចប់ការជាប់គាំងទាំងនេះ ។
លោក Oli បានបញ្ជាក់ថា ការដែលឥណ្ឌាលើកឡើងថា ក្រុមបាតុករធ្វើបាតុកម្មបិទផ្លូវជាមូលហេតុរារាំងមិនឲ្យរថយន្តដឹកទំនិញឥណ្ឌាចូលទៅកាន់នេប៉ាល់ដើម្បីផ្គត់ផ្គង់ទំនិញបាននោះ គឺជារឿងមិនពិតឡើយ ។ លោកបន្តថា គ្មានហ្គាសប្រើប្រាស គ្មានការផ្គត់ផ្គងបន្លែ គ្មានប្រេងឥន្ធនៈផ្គត់ផ្គង់ដល់យានយន្តទាំងឡាយ គ្មានប្រេងឥន្ធនៈផ្គត់ផ្គង់ដល់ការហោះហើរ ហើយជីវិតរស់នៅគឺជាប់គាំងតែម្តង ។ លោកអះអាងថា យើងមិនចង់បានមិត្តភាពរបៀបនេះទេ ។
លោកបន្តថា ឥណ្ឌាមិនគួរណារំលោភលើសន្ធិសញ្ញា និងកិច្ចព្រមព្រៀងរវាងប្រទេសទាំងពីរនោះឡើយ នេះម្យ៉ាង ហើយម្យ៉ាងទៀតឥណ្ឌាមិនគួរណាសម្រេចចិត្តរំលោភទៅលើគោលការណ៍អន្តរជាតិ ស្តីអំពីសិទ្ធិ របស់ប្រទេសមួយបែបនេះសោះ ។
រហូតមកដល់ពេលនេះ មនុស្សជាង៤០នាក់បានបាត់បង់ជីវិត ដោយសារតែប៉ះទង្គិចគ្នារវាងកងកម្លាំងសន្តិសុខ នឹងក្រុមបាតុករ ដែលភាគច្រើនជាក្រុមជនជាតិដើមភាគតិចប្រឆាំងរដ្ឋធម្មនុញ្ញថ្មីរបស់រដ្ឋាភិបាល ។
ទីក្រុងញ៉ូវដេលី ដោយភ័យខ្លាចពីអស្ថិរភាពនៅតាមបន្ទាត់ព្រំដែននោះ បានរិះគន់នេប៉ាល់ថាខិតខំប្រឹងទាំង ត្រដរតាក់តែងរដ្ឋធម្មនុញ្ញថ្មីនោះ ជាជាងការដោះដ្រាយបញ្ហាពាក់ព័ន្ធជាមួយក្រុមជនជាតិភាគតិច ដែលភាគច្រើនមានសាច់សាលោហិតនៅក្នុងប្រទេសឥណ្ឌា ។
លោក Oli ត្រូវគេមើលឃើញថា ជាបេក្ខជនដែលឈានមុខគេនៅក្នុងការបោះឆ្នោតសភានេប៉ាល់ខាងមុខនេះ ហើយដែលអាចក្លាយជានាយករដ្ឋមន្ត្រីដឹកនាំរដ្ឋាភិបាលថែមទៀតផង ក្រោយពីមានការអនុម័តរដ្ឋធម្មនុញ្ញថ្មីនោះ ។
ការធ្វើអត្ថាធិប្បាយរបស់អ្នកនយោបាយជាន់ខ្ពស់នេប៉ាល់រូបនេះឆ្លុះបញ្ចាំងឲ្យឃើញជំហរយ៉ាងរឹងមាំប្រឆាំងទៅលើប្រទេសឥណ្ឌាដែលជាប្រពៃណីមកហើយតែងតែមានមានឥទ្ធិពលនយោបាយមកលើប្រទេសនេប៉ាល់នោះ ។
ក្រុនហ៊ុនសាជីវកម្មប្រេងឥណ្ឌាជាក្រុមហ៊ុនតែមួយគត់ដែលផ្គត់ផ្គង់ប្រេងទៅឲ្យប្រទេសនេប៉ាល់ ។
ដំណើរការពាណិជ្ជកម្មឆ្លងកាត់តាមបន្ទាត់ព្រំដែនឥណ្ឌា -នេប៉ាល់មានសភាពយឺតយ៉ាវ ។ រថយន្តដឹកទំនិញជាច្រើនរយគ្រឿងត្រូវជាប់គាំងនៅប៉ុស្តិ៍ត្រួតពិនិត្យព្រំដែន ។ រដ្ឋាភិបាលនេប៉ាល់កាលពីសប្តាហ៍មុននេះបានត្បិតត្បៀតការប្រើប្រាស់ប្រេង ក៏ជាកម្រិតទៅលើយានយន្តនៅតាមដងផ្លូវផងដែរ ។
រដ្ឋធម្មនុញ្ញថ្មីរបស់នេប៉ាល់ថ្មីនេះបានផ្តួចផ្តើមឡើងដោយតំណាងរាស្ត្រជាប់ឆ្នោត ក្នុងដំណាក់មួយស្រុកទេសមានសន្តិភាព បន្ទាប់ពីក្រុមឧទ្ទាមម៉ៅនិយមបានទម្លាក់អាវុធកាលពីឆ្នាំ២០០៦ ក្រោយមានផ្ទុះហិង្សារយៈពេលជិតមួយទសវត្សរ៍ ។
ការតាក់តែងរដ្ឋធម្មនុញ្ញថ្មីបានចាប់ផ្តើមនៅឆ្នាំ២០០៨ បន្ទាប់ពីក្រុមម៉ៅនិយមឈ្នះក្នុងការបោះឆ្នោតសភា និងបានលុបចោលរបបរាជានិយម ។ ប៉ុន្តែការចែករំលែកអំណាច និងការកើតមានវិវាទកម្មរវាងគណបក្សនយោបាយក្នុងប្រទេសនេប៉ាល់នោះនៅតែបន្តកើតមាន ធ្វើឲ្យរាំងស្ទះដល់ការរីកចម្រើនរបស់ប្រទេសជាតិ។
នៅទីបំផុត តំណាងរាស្ត្រនេប៉ាល់បានសម្រេចព្រមព្រៀងអនុម័តរដ្ឋធម្មនុញ្ញថ្មីនេះកាលពីខែមិថុនា ឆ្នាំ២០១៥ ក្រោយពេល២ខែបន្ទាប់ពីការរញ្ជួយដីសម្លាប់មនុស្សជិត៨៩០០០នាក់នោះ ៕
ប្រែសម្រួល៖ ថាច់ យ៉ាត