មន្ត្រីអាហ្វហ្គានីស្ថានបានប្រកាសថា កងទ័ពរដ្ឋាភិបាលអាហ្វហ្គានីស្ថានបានដណ្តើមគ្រប់គ្រងភាគច្រើនតំបន់យុទ្ធសាស្ត្រស្ថិតនៅភាគខាងជើងទីក្រុង Kunduz ពីក្រុមឧទ្ទាមលីបង់នោះវិញហើយកាលពីថ្ងៃទី៣០ ខែកញ្ញា ឆ្នាំ២០១៥ ក្រោយរយៈពេល៣ថ្ងៃដែលទីក្រុងនេះធ្លាក់ចូលក្នុងកណ្តាប់ដៃក្រុមឧទ្ទាម ធ្វើឲ្យកងកម្លាំងសន្តិសុខទីក្រុងកាប៊ូល និងកម្លាំងសម្ពន្ធមិត្តអាមេរិកស្គាល់ពាក្យថា បរាជ័យនោះ ។
ព័ត៌មានពិស្តារទាំងទងការវាយប្រហារដណ្តើមបានគ្រប់គ្រងដែនដីខាងលើពីសំណាក់កងទ័ពរដ្ឋាភិបាលទាំងយប់នោះ គឺនៅមិនទាន់ច្បាស់លាស់នៅឡើយទេ ។ ជាមួយគ្នានេះដែរ អ្នកនាំពាក្យក្រុមឧទ្ទាមលីបង់ម្នាក់បានបញ្ជាក់ប្រាប់ទីភ្នាក់ងារព័ត៌មានរ៉យទ័រថា នៅពេលបច្ចុប្បន្ននេះកម្លាំងរបស់ខ្លួនបាននិងកំពុងប្រយុទ្ធតស៊ូវជាមួយកងកម្លាំងរដ្ឋាភិបាល ហើយពួកខ្លួនកំពុងគ្រប់គ្រងតំបន់ភាគច្រើនជាដដែល ។ ការប្រកាសដែលថា រដ្ឋាភិបាលដណ្តើមបានទីក្រុង Kunduz នោះ គឺជារឿងមិនពិត ។
កងកម្លាំងសន្តិសុខរបស់ប្រទេសអាហ្វហ្គានីស្ថាន អមដោយយន្តហោះចម្បាំងពីលើដានអាកាសរបស់អាមេរិកផងនោះបានធ្វើសមរភូមិរយៈ២ថ្ងៃមកហើយដើម្បីដណ្តើមទីក្រុងនេះមកគ្រប់គ្រងវិញ បន្ទាប់ពីការធ្លាក់កណ្តាប់ដៃរបស់ក្រុមឧទ្ទាមលីបង់លើកទីមួយចាប់តាំងពីឆ្នាំ២០០១មកនោះ ។
លោក Hamdullah Danishi អភិបាលស្តីទីខេត្ត Kunduz បានថ្លែងប្រាប់ទីភ្នាក់ងារព័ត៌មានរ៉យទ័រថា កងកម្លាំងសន្តិសុខរដ្ឋាភិបាលអាហ្វហ្គានីស្ថានបានរំដោះទីក្រុង Kunduz ពីក្នុងកណ្តាប់ដៃក្រុមឧទ្ទាមលីបង់បានវិញទាំងយប់ ក្រោយពីមានការប្រើកាំភ្លើងធុនធ្ងន់ ។ លោកបានបញ្ជាក់ថា ក្រោយពីយើងចាប់ផ្តើមអនុវត្តច្បាប់ និងធ្វើប្រតិបត្តិការក្នុងទ្រង់ទ្រាយធំក្នុងទីក្រុង Kunduz នោះ ក្រុមឧទ្ទាមលីបង់មិនអាចតស៊ូទប់ទល់បានឡើយ ហើយក៏នាំគ្នារត់គេចខ្លួនអស់ ។ យើងនឹងផ្តល់ជូនព័ត៌មានលម្អិតក្នុងពេលឆាប់ៗនេះ ។
លោក Dawlat Waziri អ្នកនាំពាក្យក្រសួងការពារជាតិអាហ្វហ្គានីស្ថានបានថ្លែងថា ប្រតិបត្តិការប្រឆាំងក្រុមឧទ្ទាមខាងលើនេះចាប់ផ្តើមកាលពីវេលាម៉ោង១១យប់ ថ្ងៃទី២៩ ខែកញ្ញា និងបានបញ្ចប់ទៅវិញនៅវេលាម៉ោង៤ទៀបភ្លឺ ថ្ងៃទី៣០ ខែកញ្ញា ម៉ោងនៅក្នុងតំបន់ ។ លោក Dawlat Waziri បានអះអាងថា នៅពេលនេះ ក្រុមឧទ្ទាមលីបង់បានចាកចេញពីទីក្រុង Kunduz អស់ហើយ ហើយប្រតិបត្តិការបោសសម្អាតគឺនៅតែបន្តទៅទៀត ។
ដោយឡែក អ្នកនាំពាក្យក្រុមឧទ្ទាមលីបង់ ឈ្មោះ Zabihullah Mujahid បានអះអាងថា ការវាយប្រយុទ្ធគ្នាកំពុងប្រព្រឹត្តឡើងនៅឡើយ ។ ប្រភបអះអាងថា ការលើកឡើងរបស់ខ្មាំងទាក់ទងស្ថានការណ៍នៅក្នុងទីក្រុង Kunduz នោះគឺជារឿងមិនពិត ។ Mujahedeen (សកម្មប្រយុទ្ធក្រុមឧទ្ទាមលីបង់)បាននិងកំពុងតយុទ្ធជាមួយកងកម្លាំងសត្រូវនៅក្នុងទីក្រុងនេះនៅឡើយទេ ។ យើងនៅតែគ្រប់គ្រងភូមិឋានជុំវិញទីក្រុងនេះនៅឡើយ ។ កងកម្លាំងអាមេរិកបានចូលរួមជាមួយកងកម្លាំងសត្រូវនេះដែរ ប៉ុន្តែយើងនៅតែការពារបានយ៉ាងប្រសើរ ។
គេនៅមិនទាន់អាចរកការបញ្ជាក់បានភ្លាមៗបានឡើយថា តើយុទ្ធវិធីបែបណាដែលកងកម្លាំងបរទេសធ្វើប្រតិបត្តិការទាំងវេលាយប់បែបនេះ ។ ប៉ុន្តែប្រភពពីអ្នកនាំពាក្យរបស់កងកម្លាំងសម្ពន្ធមិត្តបានទម្លាយឲ្យដឹងថា កងអាមេរិក និងកម្លាំងសម្ពន្ធមិត្តត្រូវបញ្ជូនទៅកាន់តំបន់ Kunduz នោះដើម្បីផ្តល់ប្រឹក្សា និងជួយដល់កងទ័ពសម្ពន្ធមិត្តអាហ្វនីស្ថាន។
អ្នកនាំពាក្យកម្លាំងសម្ពន្ធមិត្ត លោក Brian Tribus បានបញ្ជាក់ថា កាលពីថ្ងៃទី៣០ ខែកញ្ញា កម្លាំងពិសេសរបស់កងទ័ពសម្ពន្ធមិត្តបានពើបប្រទះប្រយុទ្ធផ្ទាល់ដីជាមួយក្រុមឧទ្ទាមលីបង់ ។ យ៉ាងហោចណាស់ យន្តហោះចម្បាំងអាមេរិកបានបើកប្រតិបត្តិការបាញ់ប្រហារ៥លើកទៅលើទីតាំងក្រុមឧទ្ទាមលីបង់ដែលនៅជិតទីក្រុងតាំងពីថ្ងៃចន្ទ រៀងមក ។
គេនៅមិនទាន់ដឹងពីគ្រោះថ្នាក់ដល់អាយុជីវិតជនស៊ីវិលអំឡុងពេលវាយប្រហារនេះនៅឡើយទេ ៕
ប្រែសម្រួល៖ ថាច់ យ៉ាត