ភ្នំពេញ៖ បុរសម្នាក់ស្រវឹងស្រាបានបើករថយន្តហាយលែនឌ័រក្នុងល្បឿនយ៉ាងលឿន រេចង្កូតទៅកៀររថយន្តបាឡែន ឈប់ចតស្ងៀមនៅខាងមុខផ្ទះបណ្តាលឱ្យបែកកញ្ចក់ និងកោសរលាតថ្នាំមួយចំហៀង ហើយរថយន្តបង្កបានព្យាយាមបើករត់គេចទាំងបែកកង់ តាំងពីខាងត្បូងផ្សាររាត្រី មកដល់ចំណុចមុខនាយកដ្ឋានភស្តុភារ និងសំភារៈបច្ចេកទេស ទើបត្រូវបានម្ចាស់ដេញឃាត់បាន ។
ហេតុការណ៍ នេះបានកើតឡើងកាលពីវេលាម៉ោង១នឹង៤០នាទីរំលងអធ្រាត្រ ឈានចូលថ្ងៃទី២ ខែតុលា ឆ្នាំ២០១៥ នៅមុខចំណតរថយន្តទេសចរណ៍ តាមបណ្តោយផ្លូវព្រះស៊ីសុវត្ថិ ស្ថិតក្នុងសង្កាត់វត្តភ្នំ ខណ្ឌដូនពេញ ។
ប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញបុរសម្នាក់បើករថយន្តម៉ាកហាយលែនឌ័រ មួយគ្រឿង ពណ៍ស្ករ ពាក់ស្លាកលេខ ភ្នំពេញ 2AC-6494 បើកបរស្ថិតក្នុងស្ថានភាពស្រវឹងស្រា ជោកជាំ ខ្វះការប្រុងប្រយ័ត្ន បើកតាមបណ្តោយផ្លូវព្រះស៊ីសុវត្ថិ ទិសដៅពីជើងទៅត្បូងក្នុងល្បឿនលឿនរេចពេញផ្លូវ លុះមកដល់ចំណុចកើតហេតុ បានរេចង្កុតទៅគៀរនឹងរថយន្តម៉ាក CAMARY ឆ្លាម ពណ៍ស្ករ ពាក់ស្លាកលេខ 2L-5397 ដែលម្ចាស់ឈប់ចតស្ងៀមនៅខាងមុខផ្ទះ បណ្តាលឱ្យបែកកញ្ចក់មើលក្រោយ និងកោសរលាតថ្នាំអស់ មួយចំហៀងរងកាខូចខាត ។ ភ្លាមនោះរថយន្តបង្កបានព្យាយាមបើករត់ទាំងបែកកង់មុខខាងស្តាំ រហូតដល់នាយកដ្ឋានភស្តុភា និងសំភារៈបច្ចេកទេស ក៏ត្រូវបានម្ចាស់រថយន្តឆ្លាមដេញឃាត់បាន បង្កអោយមានការភ្ញាក់ផ្អើលដល់អ្នកធ្វើដំណើរទាំងយប់។
ក្រោយកើតហេតុភាគីទាំងសងខាងបាន សម្របសម្រួលគ្នា ដោយខាងភាគីជនរងគ្រោះទាមទារសំណងចំនួន៣០០ដុល្លាអាមេរិក ប៉ុន្តែភាគីបង្កមានតែ១៦៥ដុល្លារ ហើយជនរងគ្រោះក៏មិនចង់មានរឿងវែងឆ្ងាយ ក៏សុខចិត្តព្រមទទួលព្រោះមិនចង់មានរឿងវែងឆ្ងាយនិងមិនចង់រំខានដល់សមត្ថកិច្ចដែរ៕
ដោយ៖ ព្រែកជ័យ