ភ្នំពេញ ៖ បុរសម្នាក់បើករថយន្តកឡិចសុីសLX470បត់លឿនមិនប្រយ័ត្ន ជ្រុលទៅបុកម៉ូតូដែលកំពុងធ្វើដំណើ​របញ្ច្រាសផ្លូវលឿនដូចគ្នាយ៉ាងពេញទំហឹង បណ្ដាលឲ្យយុវជនម្នាក់ស្លាប់ពេលបញ្ចូនទៅដល់មន្ទីពេទ្យ និងនារីម្នាក់ទៀតរងរបួសសន្លប់មួយភាំង ។  ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១​រំលងអាធ្រាត ឈានចូលថ្ងៃទី៤ ខែកក្កដា ឆ្នាំ២០១៧ នៅត្រង់ចំណុចស្ទុបលូរ5 តាមបណ្ដោយផ្លូវវេងស្រេង ស្ថិតក្នុងភូមិដំណាក់ធំ៣ សង្កាត់ស្ទឹងមានជ័យ ខណ្ឌមានជ័យ ហើយក្នុងហេតុការណ៍នេះ អ្នកបើករថយន្តឡុចសុីស ក៏បាន​បើករត់បាត់ស្រមោលដោយមិនរំខានដល់សមត្ថកិច្ចមូលដ្ឋានឡើយ។

បើតាមសម្ដីប្រជាពលរដ្ឋដែលឃើញហេតុការណ៍គ្រោះថ្នាក់ចរាចរណ៍ខាងលើ បាននិយាយប្រាប់ឲ្យដឹងថា មានរថ​យន្តម៉ាកឡុចសុីសLX470 ពណ៌ទឹកប្រាក់ ពាក់ស្លាកលេខ ខេមរៈភូមិន្ទ 2-8788 បើកបរដោយបុរសម្នាក់ បានធ្វើដំណើរតាមបណ្ដោយផ្លូវវេងស្រេង ទិសដៅពីកើតមកលិចក្នុងល្បឿនលឿនខណៈមកដល់ចំណុចកើតហេតុ ក៏បានបត់​ឆ្វេងចូលទៅផ្លូវសូនីយ៉ាងលឿនមិនព្រមបន្ថយល្បឿន ហើយជ្រុលបុកម៉ូតូរងគ្រោះម៉ាកស៊ុយ​សូគី ឡែត ពណ៌ស លាយក្រហម ពាក់ស្លាកលេខភ្នំពេញ1FV-0634 ដែលជិះដោយយុវជនម្នាក់ឌុបនារីម្នាក់ជាមួយធ្វើដំណើបញ្ច្រាស់គ្នា ចំពីមុខពេញទំហឹង បណ្ដាលឲ្យយុវជនម្នាក់រងរបួសយ៉ាងធ្ងន់ធ្ងរ និងនារីម្នាក់ដែលរួមដំណើរជារងរបួសសន្លប់ស្ដួកនៅនិងកន្លែង ។

ប្រភពដដែលបានបន្តថា យុវជនរងគ្រោះដែលរបួសធ្ងន់ត្រូវបានរថយន្តសាមុយបើកទៅដឹក យកមកសង្គ្រោះនៅមន្ទីពេទ្យរុស្សុីផងដែរ តែជាអកុសល ជនរងគ្រោះត្រូវបានដាច់ខ្យល់ស្លាប់ពេលដឹកជិតដល់មន្ទីពេទ្យ ហើយត្រូវបានរថ យន្តសង្គ្រោះបន្ទាន់ដឹកយកមកកន្លែងកើតហេតុវិញ ដើម្បីឲ្យសមត្ថកិច្ចមូលដ្ឋានធ្វើកំណត់ហេតុ ។ចំណែកនារីរងគ្រោះដែលរបួសស្រាល ត្រូវបានមិត្តភ័ក្រផ្សែងទៀតដឹកទៅមន្ទីពេទ្យឯកជនផងដែរ ។

ក្រោយពេលកើតហេតុភ្លាមៗ ភាគីខាងរថយន្តបង្កមិនបានបើកចេញពីកន្លែងកើតហេតុភ្លាមៗនោះទេ ដោយសារតែឮដំណឹងថា យុវជនរងគ្រោះស្លាប់ ក៏បានអូសក្រឡា ហើយបើករថយន្តរត់គេចខ្លួនបាត់ស្រមោលតែម្ដង ។

ជនរងគ្រោះដែលស្លាប់បាត់បង់ជីវិត មានឈ្មោះ ហ៊ូរ ភេទប្រុស អាយុ២២ឆ្នាំ មុខរបរកម្មកររោងចក្រនៅម្ដុំទួលពង្រ ស្នាក់នៅសង្កាត់ចោមចៅ ខណ្ឌពោធិ៍សែនជ័យ និងមានស្រុកកំណើតនៅឯខេត្តបាត់ដំបង ។

បន្ទាប់ក្រោយមកសមត្ថកិច្ចមូលដ្ឋានបានចុះមកដល់កន្លែងកើតហេតុ ហើយធ្វើការវាស់វែង យកម៉ូតូរងគ្រោះទៅរក្សាទុកនៅអធិការដ្ឋាននគរបាលខណ្ឌមានជ័យ រងចាំបងប្អូនយកឯកសារពាក់ព័ន្ឋប្រគល់ឲ្យវិញ និងប្រគល់សពឲ្យទៅរថយន្តសង្គ្រោះបន្ទាន់ដឹកយកទៅដម្កល់ទុកនៅវត្តទឹកថ្លា រងចាំសាច់ញាត្តិមកទទួលយកទៅធ្វើបុណ្យតាមប្រពៃណី ៕  ដោយ៖ភារ៉ា ដង្កោ