ខេត្តកណ្តាល ៖ ម៉ូតូមួយគ្រឿងជិះគ្នា២នាក់បើកបោះពួយបុកគូថរថយន្តមិនស្គាល់ម៉ាកចតនៅលើទ្រូងផ្លូវ បណ្តាលឲ្យបុរសជាអ្នកបើកបរម៉ូតូស្លាប់បាត់បង់ជីវិត រីឯអ្នករួមដំណើរជាមួយរងរបួសយ៉ាងធ្ងន់ធ្ងរ កាលពីវេលាម៉ោង២ និង៣០នាទីទាបភ្លឺ ថ្ងៃទី២៨ ខែកក្កដា ឆ្នាំ២០១៧ នៅលើកំណាត់ផ្លូវជាតិលេខ២ ត្រង់ចំណុចខាងលិចរបងសាលាខេត្តកណ្តាល ស្ថិតក្នុងភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល ។
មន្ត្រីនគរបាលចរាចរណ៍ក្រុងតាខ្មៅបានឲ្យដឹងថា ជនរងគ្រោះស្លាប់បាត់បង់ជីវិតនោះឈ្មោះ ហេង ហៀង ភេទប្រុស អាយុ៣១ឆ្នាំជនជាតិខ្មែរ មានស្រុកកំណើតភូមិក្រាំងក្រោម ឃុំតាឯក ស្រុកខ្សាច់កណ្តាល ខេត្តកណ្តាល ជាអ្នកបើក បរម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កណ្តាល 1I-7988 និងអ្នករួមដំណើរជាមួយម្នាក់រងរបួសធ្ងន់នោះឈ្មោះ ណាង ភេទប្រុសអាយុ២៥ឆ្នាំ បច្ចុប្បន្នស្នាក់នៅផ្ទះជួលភូមិស្វាយរលំ ឃុំស្វាយរលំ ស្រុកស្អាង ខេត្តកណ្តាល ។ ចំណែកឯរថយន្តមិនស្គាល់ម៉ាក ក្រោយពីកើហេតុបានបើកគេចបាត់ស្រមោល ។
ប្រភពដដែលបានបន្តថា ជនរងគ្រោះទាំង២នាក់ខាងលើនេះបានជិះម៉ូតូឌុបគ្នាក្នុងទិសដៅពីរាជធានីភ្នំពេញឆ្ពោះមកក្រុងតាខ្មៅ តាមបណ្តោយផ្លូវជាតិលេខ២ ។ លុះបើកដល់ចំណុចកើតហេតុក៏ជ្រុលទៅបុកគូថរថយន្តមិនស្គាល់ម៉ាកដែលកំពុងចតនៅលើទ្រូងផ្លូវពេញមួយទំហឹង បណ្តាលឲ្យបុរសជាអ្នកបើកបរម៉ូតូស្លាប់បាត់បង់ជីវិត រីឯអ្នករួមដំណើរជាមួយរងរបួសយ៉ាងធ្ងន់ធ្ងរ ។
ក្រោយពីមានហេតុការណ៍កើតឡើងរថយន្តមិនស្គាល់ម៉ាកបានបើកគេបាត់ស្រមោល រីឯជនរងគ្រោះរងរបួសធ្ងន់ ត្រូវបានរថយន្តសាមុយដឹកបញ្ជូនទៅសង្រ្គោះនៅមន្ទីរពេទ្យក្នុងរាជធានីភ្នំពេញ ។ ចំណែកឯសាកសពជនរងគ្រោះត្រូវបានសមត្ថកិច្ចនគរបាលប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ។
បច្ចុប្បន្នម៉ូតូត្រូវបានបញ្ជូនទៅរក្សាទុកនៅអធិការដ្ឋាននគរបាលក្រុងតាខ្មៅ ដើម្បីចាត់ការតាមច្បាប់ ៕ ស្អាងជ័យ
