ខេត្តបាត់ដំបង៖ បុរសម្នាក់យកថ្នាំញៀនពីស្រុកម៉ាឡៃខេត្តបន្ទាយមានជ័យហើយបម្រុងយកលក់ចែកចាយនៅស្រុកសំពៅលូនខេត្តបាត់ដំបង ត្រូវបានកម្លាំងអាវុធហត្ថស្រុកសំពៅលូនបង្ក្រាប និងចាប់ឃាត់ខ្លួនខណៈជនសង្ស័យជិះម៉ូតូ១គ្រឿងហើយ ឆែកឆេររកឃើញដកហូតបានថ្នាំញៀនមេតំហ្វេតាមីន១៩៩៣គ្រាប់ ។
កម្លាំងអាវុធហត្ថបង្ក្រាបចាប់ឃាត់ខ្លួនជនសង្ស័យធ្វើឡើងកាលពីវេលាម៉ោង៩និង១៥នាទីព្រឹកថ្ងៃទី៧ ខែតុលា ឆ្នាំ២០១៥ នៅលើផ្លូវលំមួយកន្លែងចំណុចបេងទ្រេត ស្ថិតក្នុងភូមិត្រពាំងព្រលិត ឃុំសន្តិភាព ស្រុកសំពៅលូន ខេត្តបាត់ដំបង ។ជនសង្ស័យ និងវត្ថុតាងបន្ទាប់មកត្រូវបានចាប់បញ្ជូនមកកាន់ទីបញ្ជាការកងរាជអាវុធហត្ថស្រុកសំពៅលូន ដើម្បីយកមកសាកសួរតាមនីតិវិធី។
ជនសង្ស័យមានឈ្មោះ សុខ ធា អាយុ៣០ឆ្នាំ គ្មានមុខរបរពិតប្រាកដ បច្ចុប្បន្នរស់ នៅភូមិថ្មី ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ។
លោកអនុសេនីយ៍ឯក អញ កាម៉ាល់ មេបញ្ជាការរងអាវុធហត្ថស្រុកសំពៅលូនប្រាប់ ឱ្យដឹងថា កាលពីព្រឹកថ្ងៃទី៧ ខែតុលា ឆ្នាំ២០១៥កម្លាំងអាវុធហត្ថបានល្បាតធ្វើដំណើរតាមរថយន្តមានកម្លាំង៥នាក់ ដឹកនាំដោយលោកផ្ទាល់។ ដើម្បីការពារសន្តិសុខសណ្តាប់ធ្នាប់ជូនប្រជាពលរដ្ឋនៅក្នុង ស្រុកសំពៅលូន ក្នុងឱកាសរដូវបុណ្យភ្ជុំបិណ្ឌ។បន្ទាប់មកកម្លាំងអាវុធតហត្ថ បានល្បាតមកដល់ចំណុចខាងលើ ស្រាប់តែឃើញជនសង្ស័យឈ្មោះសុខ ធា ដែលជាមុខសញ្ញារកស៊ីថ្នាំញៀនខុសច្បាប់ កំពុងជិះម៉ូតូ១គ្រឿងតែម្នាក់ឯង ។ នៅពេលនោះកម្លាំងអាវុធហត្ថក៏បានហៅឱ្យឈប់ហើយធ្វើការឆែកឆេរ។សត្ថមកិច្ចក៏បានរកឃើញថ្នាំញៀនចំនួន១សុង ដែលគេលាក់ទុកក្នុងខោលីអូ ដោយសមត្ថកិច្ចយករាប់ជាក់ស្តែងសរុបចំនួន១៩៩៣គ្រាប់។
លោកមេបញ្ជាការរងកងរាជអាវុធហត្ថស្រុកសំពៅលូនប្រាប់ឱ្យដឹងទៀតថាជនសង្ស័យឈ្មោះ សុខ ធា សមត្ថកិច្ចស្រាវជ្រាវឱ្យដឹងថា ជាមុខសញ្ញាជួញដូរថ្នាំញៀនដ៏ធំប្រចាំស្រុកម៉ាឡៃហើយគេក៏ធ្លាប់កាន់ថ្នាំញៀន យកមកលក់ចែកចាយនៅស្រុកសំពៅលូនទៀតផង។
បច្ចុប្បន្នជនសង្ស័យ និងវត្ថុតាងថ្នាំញៀន កម្លាំងអាវុធហត្ថស្រុកសំពៅលូន កំពុងតែកសាង សំណុំរឿង ដើម្បីបញ្ជូនទៅកាន់ទីបញ្ជាការដ្ឋានកងរាជអាវុធហត្ថខេត្តបាត់ដំបង យកទៅចាត់ការតាមនីតិវិធីច្បាប់ចំណែកបក្ខពួកជាប់ពាក់ព័ន្ធនិងជំនួញថ្នាំញៀនខុសច្បាប់ នេះសមត្ថកិច្ចកំពុងតែបន្តតាមដានស្រាវជ្រាវស្វែងរកចាប់ឃាត់ខ្លួនដើម្បីយកមកផ្តន្ទាទោសតាមផ្លូវច្បាប់បន្ថែមទៀត ៕
ដោយ៖ សំ វិច្ឆិកា
