ភ្នំពេញ៖ នាព្រឹកថ្ងៃទី៨ ខែតុលាឆ្នាំ២០១៥ លោក ថេង សុថុល ប្រធានអនុសាខាកាកបាទក្រហមកម្ពុជាខណ្ឌសែនសុខ ជាតំណាងលោក លី សាវេត អភិបាលខណ្ឌនិងជាប្រធានកត្តិយសអនុសាខាកាកបាទក្រហមកម្ពុជាខណ្ឌសែនសុខ បាននាំយកអំណោយរបស់អនុសាខាកាកបាទក្រហមខណ្ឌសែនសុខមួយចំនួនទៅចែកជូនដល់លំនៅឋានលោកយាយ ប៊ុន ប៊ុនណេន អាយុ៩៥ឆ្នាំ ដែលកំពុងរស់នៅយ៉ាងលំបាកវេទនា ជាមួយចៅកំព្រា ក្នុងផ្ទះតូចមួយ នៅក្នុងភូមិក្រាំងអង្រ្កង សង្កាត់ក្រាំងធ្នង់ ខណ្ឌសែនសុខ ។
អំណោយដែលយកទៅចែកជូននៅពេលនោះរួមាន អង្ករ៥០គីឡូក្រាម ទឹកដោះគោ១០ កំប៉ុង ស្ករស ៣គីឡូក្រាម មី ២កេស ទឹកផ្លែឈើ១កេស ទឹកក្រូច១កេស ទឹកបរិសុទ្ធ២កេស ទឹកដោះគោឆៅ២ឡូត៍ បំពង់ទឹកក្តៅ១ កំសៀវ១ ធុងទឹកកក១ ធុងទឹក១ ចានដែកធំមួយ ឆ្នាំង២ ចាន៣ ជ្រញ់១ កន្ថោ១ ស្បែកជើង១គូ មុង១ ភួយ១ ខ្នើយ១ តែ១ កញ្ចប់ និងថវិកា ២២ម៉ឺនរៀល ។
តាងនាមអនុសាខាកាកបាទក្រហមខណ្ឌសែនសុខ លោកថេង សុថុល បានមានមតិសំណេះសំណាលជាមួយលោកយាយប៊ុន ប៊ុនណាន ដោយបានផ្តាំផ្ញើឲ្យលោកយាយថែរក្សាសុខភាពឲ្យបានល្អរស់នៅជាមួយចៅៗបានយូរអង្វែង និងមានទំនុកចិត្តលើអាជ្ញាធរដែនដី ជាពិសេសកាកបាទក្រហមកម្ពុជាដែលមានសម្តេចកិត្តិព្រឹទ្ធបណ្ឌិត ប៊ុន រ៉ានីហ៊ុនសែន ប្រធានកាកបាទក្រហមកម្ពុជាដែលសម្តេចតែងយកចិត្តទុកដាក់ជួយដល់ជនរងគ្រោះទាំងឡាយ ជួយចាស់ជរា ជនក្រីក្រ និងអ្នកជួបគ្រោះមហន្តរាយផ្សេងៗ មិនដែលខាន។
ក្នុងឧិកាសនោះដែរលោកយាយ ប៊ុន ប៊ុនណាន បានលើកដៃសំពះថ្លែងអំណរគុណយ៉ាងជ្រាលជ្រៅចំពោះអាជ្ញាធរដែនដី ជាពិសេសសម្តេចកិត្តិព្រឹទ្ធបណ្ឌិតប៊ុនរ៉ានី ហ៊ុនសែន ដែលបានជួយឧបត្ថម្ភសម្ភារៈនិងស្បៀងអាហារដល់រូបគាត់ និងសូមជូនពរថ្នាក់ដឹកនាំទាំងនេះជួបតែសេចក្តីសុខ សេចក្តីចម្រើននិងជួបនូវពុទ្ធពរទាំង៤ ប្រការ គឺ អាយុ វណ្ណៈ សុខៈ ពលៈ កុំបីខាន ៕
ដោយ៖ តុង សីហា
