ខេត្តស្វាយរៀង៖ មានករណីគ្រោះថ្នាក់ចរាចរណ៍មួយបានកើតឡើងរវាងម៉ូតូម៉ាកគុបមូលបុកនិងម៉ូតូម៉ាកគុបជ្រុងបញ្រ្ចាស់ទិសគ្នាបណ្ដាលឲ្យរងរបួសធ្ងន់ទាំងសងខាង ។

កាលពីវេលាម៉ោង១៩និង៣៥នាទីយប់ថ្ងៃទី៨ ខែតុលា ឆ្នាំ២០១៥នៅតាមបណ្ដោយផ្លូវលេខ៣១៤ត្រង់ចំណុចភូមិទន្លៀង ឃុំរមាំងថ្កោល ស្រុកស្វាយទាប ខេត្តស្វាយរៀង ។

យោងតាមសមត្ថកិច្ចបានអោយដឹងថា ជនរងគ្រោះទី១.ឈ្មោះ ធន់ ចិន ភេទប្រុស អាយុ២៨ឆ្នាំមានទីលំនៅភូមិឃុំកើតហេតុខាងលើ ហើយជាអ្នកបើកម៉ូតូម៉ាកគុបមូល ពណ៏ខៀវ ពាក់ស្លាកលេខស្វាយរៀង1A-6883 ខូចខាតយ៉ាងដំណំ ។

រីឯជនរងគ្រោះទី២.ឈ្មោះ ជៃ អៀងវាសនា ភេទប្រុស អាយុ២២ឆ្នាំមុខរបរកសិករ មានទីលំនៅភូមិទន្លៀង ឃុំរមាំងថ្កោល ស្រុកស្វាយទាប បើកម៉ូតូម៉ាកហុងដាគុបជ្រុង ពណ៏ខៀវ អត់ស្លាកលេខ ។

បើតាមប្រភពពីសមត្ថកិច្ចនគរបាលស្រុកស្វាយទាបបានឲ្យដឹងថា ករណីម៉ូតូបុកគ្នានោះមូលហេតុមកពីម៉ូតូម៉ាកគុបមូលបើកបរមិនគោរពសិទ្ធិជាអាទិភាពទិសដៅពីកើតមកលិចក្នុងល្បឿនលឿនបញ្រ្ចាស់គ្នាក៏បុកយ៉ាងពេញទំហឹងតែម្ដង ។

បច្ចុប្បន្នភាគីទាំងសងខាងត្រូវបានបញ្ជូនមកសង្គ្រោះនៅមន្ទីរពេទ្យបង្អែកខេត្តស្វាយរៀង ចំណែកម៉ូតូទាំងពីរគ្រឿងត្រូវសមត្ថកិច្ចនគរបាលយកមករក្សាទុកនៅអធិការដ្ឋាននគរបាលស្រុកស្វាយទាបដើម្បីដោះស្រាយតាមច្បាប់ ៕

ដោយ៖ ឃឹម សុថាន