កណ្តាល ៖ ក្មេងប្រុស២នាក់បានស្លាប់ ២នាក់ទៀតរងរបួសធ្ងន់ បន្ទាប់ពីក្មេងប្រុសទាំង៤នាក់នេះយករំសេវ ផាវគ្រាប់បែកមកកែច្នៃធ្វើជាគ្រាប់មីស៊ីល បណ្តាលឲ្យផ្ទុះឡើង កាលពីវេលាម៉ោង៧ និង១០នាទីយប់ ថ្ងៃទី១០ ខែកញ្ញា ឆ្នាំ២០១៧ ស្ថិតក្នុងភូមិពោធិ៍ដុះ ឃុំបាគូរ ស្រុកកណ្តាលស្ទឹង ខេត្តកណ្ដាល ។
មន្ត្រីនគរបាលស្រុកកណ្តាលស្ទឹងបានឲ្យដឹងថា ក្មេងប្រុសរងគ្រោះស្លាប់បាត់បង់ជីវិតនោះ ទី១- ឈ្មោះ ប៉ុន សម្បត្តិ ភេទប្រុស អាយុ១៣ឆ្នាំ ជនជាតិខ្មែរ មុខរបរ សិស្ស ទី២-ឈ្មោះ វៃ វី ភេទប្រុស អាយុ១១ឆ្នាំ ជនជាតិខ្មែរ មុខរបរ សិស្ស ។ ចំណែកឯ២នាក់ទៀតរងរបួសធ្ងន់នោះ ទី១-ឈ្មោះ ប៉ុន សុខុន ភេទប្រុស អាយុ១៦ឆ្នាំ ជន ជាតិខ្មែរ មុខរបរ សិស្ស ទី២-ឈ្មោះ មឿន សុភក្រ័ ភេទប្រុស អាយុ១៧ឆ្នាំ ជនជាតិខ្មែរ មុខរបរ សិស្ស ។ ក្មេងប្រុសទាំង៤នាក់នោះត្រូវជាបងប្អូនបង្កើត និងជីដូនមួយនឹងគ្នា មានទីលំនៅក្នុងភូមិ ពោធិ៍ដុះ ឃុំបាគូរ ស្រុកកណ្តាលស្ទឹង ។
ប្រភពដដែលបានបន្តថា នៅមុនពេលកើតហេតុសាក្សីបានឃើញក្មេងប្រុសរងគ្រោះទាំង៤នាក់យកផាវគ្រាប់បែកជាច្រើនគ្រាប់ មកហែកចាក់យករំសេវចេញដាក់ចូលទៅក្នុងបំពងទីបជ័រ ដើម្បីកែច្នៃទុកសម្រាប់ ដុតបំផ្ទុះលេងនៅខាងមុខផ្ទះរបស់ខ្លួន ។ លុះមួយសន្ទុះក្រោយមកស្រាប់តែឮសម្លេងផ្ទុះយ៉ាងខ្លាំង ពេលដើរទៅមើលឃើញក្មេងប្រុស២នាក់ស្លាប់បាត់បង់ជីវិតនៅកន្លែងកើតហេតុ រីឯ២នាក់ទៀតរងរបួសយ៉ាងធ្ងន់ធ្ងរ ត្រូវបានក្រុមគ្រួសារដឹកបញ្ជូនតាមរថយន្តសាមុយយកទៅសង្រ្គោះនៅមន្ទីរពេទ្យកាលម៉ែត្រក្នុងរាជធានីភ្នំពេញ ។
ក្រោយពីមានហេតុការណ៍កើតឡើង សមត្ថកិច្ចនគរបាលស្រុកកណ្តាលស្ទឹង បានចុះទៅពិនិត្យកន្លែងកើតហេតុ រកឃើញសំបកផាវគ្រាប់បែក និងសម្ភារៈសម្រាប់កែច្នៃមួយចំនួនទៀត ។ សមត្ថកិច្ចនគរបាលស្រុកកណ្តាលស្ទឹងបានបញ្ជាក់ថា ក្មេងប្រុសទាំង៤នាក់ខាងលើនេះបានយកផាវគ្រាប់បែកហែកយករំសេវដាក់ចូលទៅក្នុងបំពងទីបជ័រ ក្នុងគោលបំណងកែច្នៃទៅជាគ្រាប់មីស៊ីលតាមការគិត ខណៈកំពុងកែច្នៃគ្រាប់នេះក៏ផ្ទុះឡើង បណ្តាលឲ្យមានអ្នកស្លាប់ និងរងរបួសយ៉ាងដូច្នេះ ៕ ស្អាងជ័យ
