ភ្នំពេញ៖ ដើម្បីបង្កលក្ខណះងាយស្រួលដល់ប្រជាពលរដ្ឋក្នុងការធ្វើដំណើរឆ្លងកាត់កំណាត់ផ្លូវ៣៦៩ចាប់ពីតំបន់ច្រាំងបាក់ ស្ថិតក្នុងសង្កាត់ច្បារអំពៅទី២ ទៅដល់វិហ៊ាឥស្លាម ក្នុងសង្កាត់ព្រែកប្រា ខណ្ឌច្បារអំពៅ  នៅព្រឹកថ្ងៃទី១២  ខែកញ្ញា  ឆ្នាំ២០១៧  គណៈបញ្ជាការឯកភាពខណ្ឌដឹកនាំដោយលោករស់ សុភ័ក្តិ អភិបាលរងខណ្ឌតំណាងលោកអភិបាលខណ្ឌ បានបើកយុទ្ធនាការសាជាថ្មីដើម្បីរំដោះចិញ្ចើមផ្លូវ ក្នុងគោលដៅរៀបចំសណ្តាប់ធ្នាប់អោយបានល្អប្រសើរ ដើម្បីសម្រួលដល់ការធ្វើចរាចរនៅក្នុងមូលដ្ឋាន ។
លោករស់ សុភ័ក្តិ អភិបាលរងខណ្ឌតំណាងលោកអភិបាលខណ្ឌបានអោយដឹងថា មុនពេលក្រុមការងារចុះមកអនុវត្តវិធានការរដ្ឋបាល  គណៈបញ្ជាការឯកភាពខណ្ឌបានរៀបចំផែនការអោយក្រុមការងារចុះចែកនូវសេចក្តីជូនដំណឹងរបស់រដ្ឋបាលខណ្ឌ តាមខ្នងផ្ទះរបស់ប្រជាពលរដ្ឋនីមួយៗ ដែលនៅអមសងខាងផ្លូវ 369 ទាំងអស់។

ក្រោយការចុះអប់រំណែនាំ និងរៀបចំសណ្តាប់ធ្នាប់រួចមក  រដ្ឋបាលខណ្ឌនឹងទុករយះពេលកំណត់មួយ ដើម្បីអោយបងប្អូនប្រជាពលរដ្ឋទាំងអស់ធ្វើការរៀបចំនិងកែតម្រូវតាមការណែនាំ។ ផុតកំណត់នៃការជូនដំណឹងនេះ  ប្រសិនបើម្ចាស់ផ្ទះរូបណានៅតែបំពានមិនអនុវត្តតាមការណែនាំ រដ្ឋបាលខណ្ឌនឹងអនុវត្តវិធានការរដ្ឋបាលដោយដកហូតសម្ភារះ និងមធ្យោបាយគ្រប់ប្រភេទមករក្សាទុកនៅសាលាខណ្ឌជាបណ្តោះអាសន្ន។ ប៉ុន្តែយុទ្ធនាការថ្ងៃដំបូងនេះមិនបានអនុវត្តវិធានការក្តៅនោះទេ គ្រាន់តែចុះណែនាំនិងបាញ់គំនូសកំណត់ព្រំសម្រាប់អោយម្ចាស់លំនៅដ្ឋានប្រើប្រាស់ចិញ្ចើមផ្លូវប៉ុណ្ណោះ  ថ្ងៃក្រោយបើពិនិត្យឃើញថាម្ចាស់ផ្ទះនៅតែបំពានគណៈបញ្ជាការឯកភាពនិងចាត់វិធានរឹបអូសយកសម្ភារៈមករក្សាទុកនៅសាលាខណ្ឌ ។
លោកអភិបាលរងបានបន្តថា  ដើម្បីធានាបាននូវសណ្តាប់ធ្នាប់ល្អសម្រួលដល់ការធ្វើដំណើរឆ្លងកាត់ផ្លូវលេខ៣៦៩ គណៈបញ្ជាការឯកភាពបានដាក់ចេញនូវទិសដៅរួម ទី១-ហាមចតយានយន្ត ត្រីចក្រយានយន្ត និងទោចក្រយានយន្ត
បែបអាណាធិបតេយ្យលើទ្រូងផ្លូវ និងចិញ្ចើមផ្លូវក្នុងគោលំណងដើម្បីបំរើផលប្រយោជន៏មុខរបរអាជីវកម្មរបស់ខ្លួន តែធ្វើអោយបាត់បង់សណ្តាប់ធ្នាប់ ។
ទី២-ហាមសាងសង់របង សំយ៉ាបផ្ទះ រោង តូប ស្តង់ និងការដាក់លក់ទំនិញលើទ្រូងផ្លូវ និងចិញ្ចើមផ្លូវសាធារណះ  និងទី៣-ហាមដាច់ខាតមិនឲអោយម្ចាស់សំណង់ ធ្វើការហ៊ុំព័ទ្ឋការដ្ឋានសំណង់លើចិញ្ចើមផ្លូវសាធារណះលើសពី ១ភាគ៣ នៃផ្លូវ រឺប្រើប្រាស់ផ្លូវ និងយកចិញ្ចើមផ្លូវទុកដាក់សម្ភារះសំណង់គ្រប់ប្រភេទ ។  ក្នុងនាមគណៈបញ្ជាការឯកភាពខណ្ឌសង្ឃឹមថា បងប្អូនប្រជាពលរដ្ឋរស់នៅអមសង្ខាងផ្លូវលេខ៣៦៩  ផ្លូវជាតិលេខ១  និងផ្លូវមួយចំនួនទៀតនៅក្នុងភូមិសាស្ត្រខណ្ឌច្បារអំពៅនិងចូលរួមជាមួយអាជ្ញាធរខណ្ឌប្រកបដោយឆន្ទៈមានមនសិការពិតប្រាកដដើម្បីរួមគ្នារៀបចំសណ្តាប់អោយបានប្រសើរឡើងថែមទៀត ។
បន្ទាប់ពីចប់យុទ្ធនាការរៀបចំសណ្តាប់ធ្នាប់នៅតាមបណ្តោយផ្លូវលេខ៣៦៩   លោកអភិបាលរងខណ្ឌបានដឹកនាំក្រុមការងារចុះទៅពិនិត្យសកម្មភាពគ្រឿងចក្រកាយប្រឡាយដើម្បីរំដោះទឹកចេញពីភូមិប្រជាពលរដ្ឋនៅក្នុងភូមិអូរអណ្តូងទី១  សង្កាត់ព្រែកប្រា  ខណ្ឌច្បារអំពៅផងដែរ ៕

ដោយ៖ សណ្តោស