ប្រភពព័ត៌មានពីទីភ្នាក់ងារព័ត៌មានប៊ីប៊ីស៊ីបានផ្សព្វផ្សាយថា គណៈកម្មការសុវត្ថិភាពប្រទេសហុល្លង់បានរកឃើញថា ប្រព័ន្ធកាំជ្រួចមីស៊ីលផលិតដោយប្រទេសរុស្ស៊ីជាកាំជ្រួចមីស៊ីលដែលគេប្រើក្នុងការបាញ់ទម្លាក់យន្តហោះម៉ាឡេស៊ី MH17 ។
យន្តហោះដឹកអ្នកដំណើរក្រុមហ៊ុនអាកាសចរណ៍ម៉ាឡេស៊ី MH17 កាលពីខែកក្កដា ឆ្នាំ២០១៤ ត្រូវមីស៊ីលបាញ់ទម្លាក់បណ្តាលឲ្យស្លាប់អ្នកដំណើរ និងអាកាសយានិកសរុប២៩៨នាក់ ។ នៅក្នុងសេចក្តីថ្លែងការណ៍ស្តីពីរបាយការណ៍ស៊ើបអង្កេតចុងក្រោះកាលពីពេលថ្មីៗនេះរបស់គណៈកម្មការសុវត្ថិភាពប្រទេសហុល្លង់បានបញ្ជាក់ថា គេបានរកឃើញថា មីស៊ីលប្រភេទ Buk ផលិតនៅប្រទេសរុស្ស៊ីបានបាញ់ចំផ្នែកខាងឆ្វេងនៃយន្តហោះ ហើយបណ្តាលឲ្យធ្លាក់តែម្តង ។
ប្រទេសអ៊ុយក្រែន និងបណ្តាប្រទេសលោកខាងលិចបានអះអាងថា ក្រុមឧទ្ទាមគាំទ្រដោយប្រទេសរុស្ស៊ីជាអ្នកបាញ់ទម្លាក់យន្តហោះ Boeing 777 នេះ ប៉ុន្តប្រទេសរុស្ស៊ីវិញ បានបញ្ជាក់ថា កងកម្លាំងទាហានរដ្ឋាភិបាលអ៊ុយក្រែនវិញទេ ជាអ្នកបាញ់ប្រហារទៅលើយន្តហោះនេះ ។
របាយការណ៍បិទបញ្ចប់ការស៊ើបអង្កេតដែលធ្វើឡើងនៅក្នុងប្រទេសហុល្លង់នាពេលនេះមិនបានអះអាងថា តើភាគីណាជាអ្នកបាញ់ទម្លាក់យន្តហោះនោះទេ ប៉ុន្តែបានបញ្ជាក់ថា ផ្លូវអាកាសនៅប្រទេសអ៊ុយក្រែនគួរតែត្រូវបានគេបិទនៅពេលនោះ ។
យន្តហោះដឹកអ្នកដំណើរខាងលើនេះ នៅមុនពេលកើតហេតុ បានហោះហើរចេញពីទីក្រុង Amsterdam ឆ្ពោះទៅកាន់ទីក្រុង Kuala Lumpur ហើយស្រាប់តែត្រូវមីស៊ីលបាញ់នៅពីលើដែនអាកាស តំបន់ដែលកំពុងមានជម្លោះរវាងកងទ័ពរដ្ឋាភិបាលអ៊ុយក្រែន នឹងក្រុមផ្តាច់ខ្លួនជ្រុលនិយមភាគខាងកើតអ៊ុយក្រែនដែលទទួលបានការគាំទ្រពីប្រទេសរុស្ស៊ី ។
ជនរងគ្រោះភាគច្រើនជាពលរដ្ឋហុល្លង់ គឺមានរហូតដល់១៩៦នាក់ ក្នុងនោះជនរងគ្រោះមួយចំនួនមានសញ្ជាតិពីរ។ រីឯជនរងគ្រោះដទៃផ្សេងទៀតមកពីប្រទេស១០ជុំវិញពិភពលោក ៕
ប្រែសម្រួល៖ ថាច់ យ៉ាត
