ភ្នំពេញ៖ ក្រុមហ៊ុនចិនមួយបានចាប់ ផ្ដើមសិក្សាពីគម្រោងសាងសង់ផ្លូវអាកាសជាប្រភេទផ្លូវបង់ប្រាក់ (express way) មួយខ្សែដែលនឹងតភ្ជាប់ពីក្នុងរាជធានី ទៅកាន់អាកាសយានដ្ឋានអន្ដរជាតិភ្នំពេញក្នុងចម្ងាយផ្លូវប្រមាណ១០គីឡូម៉ែត្រ ក្នុងគម្រោងទឹកប្រាក់ជាង៣៦០លាន ដុល្លារអាមេរិក ។ គម្រោងសាងសង់ ផ្លូវអាកាសសម្រាប់អ្នកបើកបរក្នុងល្បឿនលឿនប្រមាណ៦០គីឡូម៉ែត្រក្នុងមួយ ម៉ោងនេះនឹងត្រូវចាប់ផ្ដើមសាងសង់នៅឆ្នាំ ២០១៦ និងបញ្ចប់នៅឆ្នាំ ២០២១ ។
លោក ត្រាំ អ៊ីវតឹក រដ្ឋមន្ដ្រីក្រសួង សាធារណការ និងដឹកជញ្ជូនបានជួបជា មួយក្រុមជំនាញផ្នែកគូរប្លង់មកពីវិទ្យាស្ថាន Henan Provincial Communi cations planning, Survey & Design Institute Co,Ltd របស់ប្រទេសចិន ដែលមកបង្ហាញពីគំរូប្លង់ដែលបានគូរ កន្លងមកទៅកាន់មន្ដ្រីរដ្ឋាភិបាល ។
លោករដ្ឋមន្ដ្រីថ្លែងថា ប្លង់ដែលវិទ្យា ស្ថានបង្ហាញមាន៣ គឺមានជម្រើសA ដែលចាប់ផ្ដើមលើផ្លូវសហព័ន្ធរុស្ស៊ីទៅដល់ព្រលានយន្ដហោះអន្ដរជាតិភ្នំពេញ ក្នុងចម្ងាយផ្លូវជាង៨គីឡូម៉ែត្រ, ជម្រើសB គឺសង់ពីលើផ្លូវរថភ្លើងក្បែរសក្យមុនី ចេតិយឆ្ពោះទៅកាន់ព្រលានយន្ដហោះ មានប្រវែងជាង៨គីឡូម៉ែត្រ និងជម្រើសC ត្រូវសាងសង់កាត់លើផ្លូវក្បែរស្ថានទូត បារាំងទៅកាន់អង់តែនទួលគោក និង កាត់តាមផ្លូវឧកញ៉ាម៉ុងឫទ្ធីមានប្រវែងជិត១១គីឡូម៉ែត្រ ។ លោកថា “អ៊ីចឹង បញ្ហានៃគម្រោងនេះមានជម្រើស៣ ដែលក្នុងជម្រើសហ្នឹងគឺសង្កត់ធ្ងន់លើ ជម្រើសទី១ដោយតម្លៃហិរញ្ញវត្ថុត្រូវ ចំណាយថវិកា៣៦២លានដុល្លារ ។ ផ្លូវ នេះគ្រោងធ្វើគឺ២ខ្សែទៅ២ខ្សែមកមាន របាំងខណ្ឌនៅកណ្ដាលមានបង្កាន់ដៃ សងខាងទប់កុំឱ្យឡានធ្លាក់សរុបទទឹង ១៧ម៉ែត្រកន្លះ ។ បើតាមពិនិត្យអត់ មានគន្លងសម្រាប់ម៉ូតូទេ ។ ល្បឿននៃការ សិក្សា៦០គីឡូម៉ែត្រក្នុងមួយម៉ោង” ។ លោកបន្ដថា មន្ដ្រីត្រូវពិភាក្សាគ្នាថា តើជម្រើសមួយណាមានភាពទាក់ទាញ និងមានផលប៉ះពាល់តិចហើយត្រូវសិក្សាថាតើត្រូវតភ្ជាប់ជាមួយនឹងស្ពានអាកាសសាធារណៈដែលយើងមានស្រាប់ ឬត្រូវ ធ្វើផ្លូវតែមួយត្រង់តែម្ដង ។ លោក រដ្ឋមន្ដ្រីបន្ថែមថា ឆ្លងតាមការពិភាក្សា មានការបង្ហាញនូវជម្រើសA និងB ជាជម្រើសត្រូវយកមកពិភាក្សា ប៉ុន្ដែវិទ្យាស្ថាននេះយល់ថាជម្រើសA មាន ការងាយស្រួលក្នុងការសាងសង់ជាង ។
លោក ផែង សុវិជ្ជនោ អ្នកនាំពាក្យ ក្រសួងសាធារណការថ្លែងថា ទោះយ៉ាង ណាក្នុងដំណាក់កាលសិក្សានេះគេអាច នឹងចំណាយពេលឱ្យដល់ចុងឆ្នាំដើម្បី បញ្ចប់ការងារទាំងនេះដែលវិទ្យាស្ថាន កំពុងស្វែងរកដៃគូពីប្រទេសចិនមក បណ្ដាក់ទុនធ្វើផ្លូវអាកាសមួយនេះដែលជាគម្រោងផ្លូវ BOT ។
លោក Du Zhan Jun នាយកវិទ្យា ស្ថានរបស់ចិននេះឱ្យដឹងថា វិទ្យាស្ថាន នេះមើលឃើញជម្រើសA មានភាព ប្រសើរជាងគេពីព្រោះជាផ្លូវដែលអាចតភ្ជាប់ចំណុចកណ្ដាលក្នុងក្រុងភ្នំពេញ ដែលកំពុងមានចរាចរណ៍មមាញឹក និង អាចមានផលប៉ះពាល់តិចជាងគេ ។
លោកថា “ផែនការA អាចសម្រួល ការកកស្ទះចរាចរណ៍មុខទីស្ដីការគណៈ រដ្ឋមន្ដ្រី និងផ្លូវប្រសព្វផ្សេងទៀត និង មានលក្ខណៈល្អជាងផែនការB ។ បច្ចុប្បន្ន ភ្នំពេញកំពុងអភិវឌ្ឍន៍យ៉ាងឆាប់រហ័ស ហើយថ្ងៃអនាគតនឹងមានយានយន្ដកាន់ តែច្រើន ។ ដូច្នេះយើងគួរពិចារណា បង្កើតបណ្ដាញផ្លូវថ្នល់ដែលមានប្រសិទ្ធភាពជាងមុន” ។
វិទ្យាស្ថានចិនខេត្ដ Henan នេះបាន ដាក់ពង្រាយបុគ្គលិកនៅតាមបណ្ដោយមហាវិថីសំខាន់ៗមួយចំនួនក្នុងរាជធានី ដើម្បីស្ទាបស្ទង់ពីទឹកចិត្ដរបស់ពលរដ្ឋ អ្នកប្រើប្រាស់ផ្លូវថ្នល់ចំពោះការពេញ ចិត្ដក្នុងការបង់ថ្លៃសម្រាប់ផ្លូវអាកាស (Express way) ថ្មីមួយនេះដែលក្រុម ហ៊ុនមានគម្រោងយកថ្លៃ២ដុល្លារសម្រាប់ការឆ្លងកាត់ប៉ុន្ដែស្ថិតក្នុងការសាកសួរពីពលរដ្ឋនៅឡើយ ។
លោក ប៉ា សុជាតិវង្ស អភិបាលរាជ ធានីភ្នំពេញបានដឹកនាំប្រជុំឆ្លងគម្រោងសាងសង់បន្ថែមស្ពានអាកាសនិងផ្លូវ ក្រោមដីក្បាលថ្នល់ដើម្បីកែលម្អដោះ ស្រាយបញ្ហាចរាចរណ៍ឱ្យបាន១០០ភាគ រយដូចស្ពានអាកាសស្ទឹងមានជ័យ ។ កិច្ចប្រជុំបានសម្រេចធ្វើការសាងសង់ ស្ពានអាកាសចំនួន៣តភ្ជាប់ស្ពានអាកាសក្បាលថ្នល់និងសង់ផ្លូវក្រោមដី១បន្ថែម ទៀត ៕
ដោយ៖ ហេង នរិន្ទ្រ
