រដ្ឋាភិបាលប្រទេសហុងគ្រី(Hungary) បានប្រកាសបិទព្រំដែនជាប់ជាមួយប្រទេសក្រូអាត (Croatia) ក្នុងគោលបំណងទប់ស្កាត់ការហូរជនភៀសខ្លួនចូលក្នុងប្រទេសនេះឆ្លងកាត់ទៅកាន់ប្រទេសអឺរ៉ុបភាគខាងលិចនោះ ។ រដ្ឋាភិបាលហុងគ្រីបានអះអាងថា ការធ្វើបែបនេះរបស់ខ្លួនគឺដើម្បីឲ្យជនភៀសខ្លួនទាំងនោះតម្រង់ទិសដៅឆ្លងកាត់តាម រយៈប្រទេសស្លូវីនៀ (Slovenia) ជំនួសវិញ ។
ប្រទេសហុងគ្រីត្រូវគេមើលឃើញថា ជាច្រកផ្លូវយ៉ាងសំខាន់នៅក្នុងការឆ្លងកាត់របស់ក្រុមជនភៀសខ្លួនដែលមានបំណងចង់ទៅកាន់ប្រទេសអូទ្រីស(Austia) និងទៅកាន់ប្រទេសអាល្លឺម៉ង់ ។
ប្រទេសនេះ កាលពីថ្ងៃទី១៦ ខែតុលា ឆ្នាំ២០១៥ បានប្រកាសបិទព្រំដែនរបស់ខ្លួន បន្ទាប់ពីមេដឹកនាំសហគមន៍អឺរ៉ុបបរាជ័យមិនបានគាំទ្រគម្រោងការរបស់ហុងគ្រីដែលបញ្ជូនកងទ័ពឲ្យទៅទប់ស្កាត់ការហូរចូលជនភៀសខ្លួននៅប្រទេសក្រិក(Greece) ។
នៅតាមបន្ទាត់ព្រំដែន គេបានពង្រឹងសុវត្ថិភាពដោយបន្ថែមរបងបន្លាលួស ហើយបានប្រកាសបិទកាលពីវេលាម៉ោង២២ ម៉ោងនៅក្នុងតំបន់ ថ្ងៃទី១៦ ខែតុលា ឆ្នាំ២០១៥ ។
ជនភៀសខ្លួនជាច្រើនរយនាក់ដែលបានមកដល់ព្រំដែនមុនពេលកំណត់បិទព្រំដែន ត្រូវអនុញ្ញាតឲ្យចូលផងដែរ ។
លោក Peter Szijjarto រដ្ឋមន្ត្រីក្រសួងការបរទេសប្រទេសហុងគ្រីបានមានប្រសាសន៍ថា «យើងបានដឹងយ៉ាងច្បាស់នេះ វិធីនេះមិនមែនជារឿងល្អប្រសើរសម្រាប់យើងនោះទេ ប៉ុន្តែវាជាវិធីដែលល្អបំផុតទី២ប៉ុណ្ណោះ» ។ លោកបន្តថា ទោះបីយ៉ាងណាក៏ដោយ ជនភៀសខ្លួនទាំងឡាយនៅតែអាចសុំសិទ្ធិជ្រកកោននៅក្នុងហុងគ្រីបានតាមរយៈច្រកព្រំដែនផ្សេងពីនេះ២ទៀត ។ ប្រទេសហុងគ្រីបានផ្សាភ្ជាប់ព្រំដែនជាមួយប្រទេសសឺបៀ(Serbia) រួចហើយផងដែរ ។
មានការព្រួយបារម្ភនៅក្នុងប្រទេសស្លូវីនៀថា ការដែលបិទព្រំដែនហុងគ្រីជាប់ជាមួយក្រូអាតនោះធ្វើឲ្យជនភៀសខ្លួនកាន់តែច្រើនឡើងបន្ថែមកកកុញនៅក្នុងប្រទេសស្លូវីនៀ ។
លោក Ranko Ostojic រដ្ឋមន្ត្រីក្រសួងមហាផ្ទៃក្រូអាតបានថ្លែងថា ក្រូអាតនឹងបើកផ្លូវតាមច្រករបៀងឆ្ពោះទៅកាន់ស្លូវីនៀ។ លោក Ostojic បន្តថា ក្រូអាតមិនបានភ្ជាប់កិច្ចព្រមព្រៀងណាមួយជាមួយប្រទេសស្លូវីនៀនោះទេ ។ នេះជាវិធីតែមួយគត់ដែលក្រូអាតគួរធ្វើ ។
ជាការឆ្លើយតបវិញ ស្លូវីនៀបានបញ្ឈប់ការដឹកជញ្ជូនអ្នកដំណើរតាមរថភ្លើងមកពីប្រទេសក្រូអាត ។ នេះបើតាមក្រុមហ៊ុនដឹកជញ្ជូនផ្លូវដែកក្រូអាតប្រកាសឲ្យដឹង ។ រដ្ឋមន្ត្រីក្រសួងមហាផ្ទៃស្លូវីនៀ លោកស្រី Vesna Gjorkos Znidar បានថ្លែងថា កម្លាំងប៉ូលិសត្រូវតែដាក់ពង្រាយបន្ថែមទៀតនៅព្រំដែនជាប់ជាមួយក្រូអាត ។ ប៉ុន្តែលោកស្រីបានអះអាងថា ប្រទេសលោកស្រីនៅតែទទួលយកជនភៀសខ្លួនតាមបណ្តោយព្រំដែនអូទ្រីស និងអាល្លឺម៉ង់ និងនៅតែបើកចំហរព្រំដែនជានិច្ច ៕
ប្រែសម្រួល៖ ថាច់ យ៉ាត
