ភ្នំពេញ៖ បុរសម្នាក់ដែលគេស្គាល់ថាជាថៅកែឡាននាំឡានស៊េរីទំនើបៗពីអាមេរិកមកកម្ពុជា ត្រូវបានកម្លាំងអាវុធហត្ថអាវុធហត្ថរាជធានីភ្នំពេញបញ្ជូនខ្លួនទៅ តុលាកានៅព្រឹកថ្ងៃទី១៩ ខែតុលាឆ្នាំ២០១៥ បន្ទាប់ពីធ្វើការចាប់ខ្លួនពីក្នុងផ្ទះជួលសង្កាត់ភ្នំពេញថ្មី ខណ្ឌសែនសុខ។ ថៅកែឡានរូបនេះរងការចោទប្រកាន់ថា បានឆបោកយកលុយចំនួន១០ម៉ឺនដុល្លារថ្លៃកក់ទិញរថយន្តស៊េរីទំនើប ដែលកុម្ម៉ង់ទិញពីបរទេស ហើយគេចវេះមិនព្រមសង ដោយលើសកិច្ចសន្យាជាង៣ខែមកហើយ និងមួយទៀតករណីក្លែងឯកសារ ។
បុរសដែលត្រូវកងរាជអាវុធហត្ថបញ្ជូនមកតុលាកាមានឈ្មោះឈាង សុផល ភេទប្រុសអាយុ៣៨ឆ្នាំ មុខរបរលក់រថយន្ត មានស្រុកកំណើតនៅស្រុកស្រីសន្ធរ ខេត្តកំពង់ចាម ស្នាក់នៅផ្ទះជួលលេខ២០៧ ផ្លូវ៥៩៨សង្កាត់ភ្នំពេញថ្មី ខណ្ឌសែនសុខ។ ចំណែកជនរងគ្រោះឈ្មោះថៃ ឈុនគ្រី ភេទប្រុសអាយុ៤៨ឆ្នាំ មុខរបរលក់ដូរ ស្នាក់នៅផ្ទះលេខ៦អឺ០ ផ្លូវលេខ៨៨ សង្កាត់ស្រះចក ខណ្ឌដូនពេញ ។
យោងតាមពាក្យបណ្តឹងរបស់ឈ្មោះថៃ ឈុនគ្រីបានឲ្យដឹងថា នៅអំឡុងខែមេសា ឆ្នាំ២០១៥ឈ្មោះឈាង សុផលបានប្រើឈ្មោះក្រុមហ៊ុនAsia Business Solution(Cambodia)Co,ltd ថាជាក្រុមហ៊ុនរបស់គាត់ ហើយប្រាប់គាត់ និងប្រពន្ធដែលធ្លាប់ស្គាល់គ្នាយូរមកហើយថា “មានលក់រថយន្តស៊េរីទំនើបៗច្រើនប្រភេទអាចបញ្ជាទិញតាមចិត្តចង់បាន រយៈពេលតែ៤សប្តាហ៍គិតចាប់ពីថ្ងៃចុះកិច្ចសន្យា និងទទួលប្រាក់កក់” ។
បន្ទាប់មកប្រពន្ធក៏បានកុំម្មង់ទិញរថយន្តម៉ាកLand Rover Vougeស៊េរី២០១៤ដោយបានធ្វើកិច្ចសន្យាទិញលក់នៅថ្ងៃទី២៤ ខែមេសា ឆ្នាំ២០១៥ក្នុងតម្លៃ១២៨.០០០ដុល្លារ(ដប់ពីរម៉ឺនប្រាំបីពាន់) ហើយឈ្មោះឈាង សុផលតម្រូវឲ្យកក់លុយ៥០ភាគរយស្មើនឹង៦៤.០០០ដុល្លារ(ប្រាំមួយម៉ឺន បួនពាន់) ដោយប្រាប់ថា”រថយន្តនោះកំពុងនៅលើកប៉ាល់, នៅខែមិថុនានឹងមកដល់កំពង់ផែព្រះសីហនុ ដូចនេះត្រូវបង់ថែម៣០ភាគរយទៀត។ គាត់ក៏បានបង់៣០ភាគរយទៀតស្មើនឹង៣៨.០០០ដុល្លារ(បីម៉ឺនប្រាំបី ពាន់) ។
បន្ទាប់ពីចាប់ខ្លួន នៅចំពោះមុខច្បាប់ ជនជាប់ចោទបានឆ្លើយសារភាពថា ខ្លួនពិតជាបានឆបោកលុយជាង១០ម៉ឺនដុល្លាពី ជនរងគ្រោះពិតប្រាកដមែន បច្ចប្បន្នកំពុងស្ថិតនៅក្រោមការសាកសួររបស់តុលាការ ដើម្បីបន្តនិតិវិធីកសាងសំណុំរឿងបញ្ជូនទៅឃុំនៅព្រៃស ៕
ដោយ៖ ចាន់ធឿន
