ភ្នំពេញ៖ កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ដឹកនាំបញ្ជាផ្ទាល់ដោយលោកឧត្តមសេនីយ៍ទោ អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី បានចុះត្រួតពិនិត្យជនបរទេសដែលកំពុងបំរើការងារនៅក្នុងរោងចក្រផលិតស្រាបៀរកម្ពុជា នៅក្នុងភូមិសាស្ត្រខណ្ឌដង្កោ រាជធានីភ្នំពេញ ក្នុងនោះឃាត់បានជនជាតិវៀតណាម ៥នាក់ នាំទៅកាន់អគ្គនាយកដ្ឋានអន្តោប្រវេសន៍ ដើម្បីចាត់ការតាមផ្លូវច្បាប់ ។
សមត្ថកិច្ចប្រាប់ឲ្យដឹងថា ប្រតិបត្តិការកម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃចុះត្រួតពិនិត្យជនបរទេសដែលកំពុងបម្រើការងារនៅក្នុងរោងចក្រផលិតស្រាបៀរកម្ពុជា មានទីតាំង តាមបណ្តោយផ្លូវចំការដូង (ផ្លូវលេខ២១៧) ភូមិជើងឯក សង្កាត់ជើងឯក ខណ្ឌដង្កោ រាជធានីភ្នំពេញ ធ្វើឡើងកាលពីវេលាម៉ោ១៥ និង៣០នាទី ថ្ងៃទី១៩ ខែតុលា ឆ្នាំ២០១៥ ដោយមានការចូលរួមសម្របសម្រួលពីលោក មាស ច័ន្ធពិសិដ្ឋ ព្រះរាជ្ញារងអមសាលាដំបូងរាជធានីភ្នំពេញ សហការជាមួយអាជ្ញាធរមូលដ្ឋាន ជាលទ្ធផលឃាត់បានជនជាតិវៀតណាម៥នាក់ អត់មានលិខិតឆ្លងដែនត្រឹមត្រូវ ។
សមត្ថកិច្ចប្រាប់បន្តឲ្យដឹងថា ជនបរទេសដែលបច្ចុប្បន្នកំពុងបម្រើការងារនៅក្នុងរោងចក្រផលិតស្រាបៀរកម្ពុជានោះ សរុបចំនួន ៨២នាក់ ក្នុងនោះជនជាតិអាឡឺម៉ង់ ២នាក់ ជនជាតិបារាំង ១នាក់ និងជនជាតិវៀងណាម ៧៩នាក់ ។ ក្នុងចំណោមជនបរទេសទាំង៨២នាក់នោះ គឺមានជនជាតិវៀតណាម ៥នាក់ អត់មានលិខិតឆ្លងដែនត្រឹមត្រូវ ត្រូវបាននាំទៅកាន់អគ្គនាយកដ្ឋានអន្តោប្រវេសន៍ ដែលមានទីតាំងនៅមុខព្រលានយន្តហោះអន្តរជាតិភ្នំពេញ តាមបណ្តោយផ្លូវសហព័ន្ធរ៉ុស្ស៊ី ភូមិក្បាលដំរី សង្កាត់កាកាប ខណ្ឌពោធិសែនជ័យ ចាត់ការតាមនីតិវិធីច្បាប់ ៕
ដោយ៖ ភារ៉ា ដង្កោ
