ខេត្ដតាកែវ៖ ប្រធានមន្ទីរធម្មការ និងសាសនាខេត្ដតាកែវលោក ជួន វ៉ាន រងការចោទថា បានប្រព្រឹត្ដអំពើពុករលួយ ជាមួយនឹងមន្ដ្រីនៅក្នុងមន្ទីរក៏ដូចជា តាមទីវត្ដអារាម ប៉ុន្ដែលោកប្រធាន មន្ទីរបានបដិសេធ ។ យ៉ាងណាក៏ដោយ រឿងនេះត្រូវបានក្រុមមន្ដ្រីដែលចោទ ប្រកាន់អះអាងថា សេចក្ដីបដិសេធ របស់លោក ជួន វ៉ាន មិនគ្រប់គ្រាន់ទេ។ ផ្ទុយទៅវិញអ្វីៗអាស្រ័យលើអង្គភាព ប្រឆាំងអំពើពុករលួយជាអ្នកស៊ើបអង្កេត។
លោក សេង សុខនី អ្នកនាំពាក្យ ក្រសួងធម្មការ និងសាសនាបានថ្លែង ប្រាប់បណ្ដាញផ្សព្វផ្សាយព័ត៌មានក្ន្នុង ស្រុកឱ្យដឹងថា អង្គភាពប្រឆាំងអំពើពុក រលួយកំពុងតែបើកការស៊ើបអង្កេតពី បញ្ហានេះ រីឯលោកប្រធានមន្ទីរធម្មការ ខេត្ដតាកែវនោះក៏បានធ្វើរបាយការណ៍ ផ្ញើទៅអង្គភាពប្រឆាំងអំពើពុករលួយរួច ហើយដែរ ។ លោកថ្លែងថា “ចំណាត់ការ បន្ដយ៉ាងណានោះវាជារឿងរបស់អង្គភាព ប្រឆាំងអំពើពុករលួយ” ។
ក្រុមមន្ដ្រីនៅក្នុងមន្ទីរធម្មការ និង សាសនាខេត្ដតាកែវបានអះអាងថា លោកប្រធានមន្ទីរបានប្រព្រឹត្ដអំពើពុក រលួយគួរឱ្យអៀនខ្មាសពាក់ព័ន្ធទៅនឹងការ យកប្រាក់ពីចៅអធិការវត្ដដែលត្រូវតែងតាំងថ្មីចាប់ពី៣០០ដុល្លារដល់៥០០ ដុល្លារ ។ តាមប្រភពរាយការណ៍ថា ចៅ អធិការវត្ដទូទាំងខេត្ដតាកែវបើចង់បានតំណែងជាចៅអធិការវត្ដពេញសិទ្ធិត្រូវ តែបង់ប្រាក់ជូនលោក ជួន វ៉ាន ចាប់ពី ១០០ដុល្លារ ដល់៣០០ដុល្លារ និងតំណែង អនុគណស្រុកនិងមេគណខេត្ដត្រូវសូកលុយពី២.០០០ដុល្លារទៅ៣.៥០០ដុល្លារ។ ក្រៅពីនេះមានបញ្ហាជ្រើសរើសមន្ដ្រី ធម្មការត្រូវសូកលុយលោកប្រធានចាប់ពី២.០០០ដុល្លារ ដល់៣.០០០ដុល្លារ ។ រីឯការប្រឡងពុទ្ធិកបឋមសិក្សាត្រូវសូកលុយ២០០ដុល្លារដល់៣០០ដុល្លារ ។
រឿងរ៉ាវរបស់លោកប្រធានមន្ទីរធម្ម ការនិងសាសនាខេត្ដតាកែវមិនត្រឹមតែ មន្ដ្រីនៅក្នុងអង្គភាពទម្លាយឱ្យដឹងប៉ុណ្ណោះ ទេ សូម្បីតែនៅក្នុងបណ្ដាញទំនាក់ទំនង ហ្វេសប៊ុកក៏មានការវាយប្រហារខ្លាំង ណាស់ដែរ ។
ម្ចាស់គណនីហ្វេសប៊ុកព័ត៌មានថ្មី ទាន់ហេតុការណ៍ក៏ដូចជា “ចូលកុំស្អប់ អ្នកណាក្នុងជីវិតរបស់លោកអ្នក” សុទ្ធ តែបានលាតត្រដាងអំពីបញ្ហាអំពីពុក រលួយរបស់លោកប្រធានមន្ទីរធម្មការ ម្នាក់នេះ ។ គួរគេនិយាយស្រដៀងគ្នាថា នៅពេលមិនទាន់ឡើងធ្វើជាប្រធានមន្ទីរ លោក ជួន វ៉ាន ជិះតែម៉ូតូកញ្ចាស់មួយ គ្រឿងប៉ុណ្ណោះ ប៉ុន្ដែពេលដែលបានឡើង ធ្វើជាប្រធានមិនបានប៉ុន្មានផង ស្រាប់ តែមានលុយទិញរថយន្ដ, ទិញដី ដើរផឹក ស៊ីចូលខារ៉ាអូខេរាល់យប់ ។ ម្ចាស់គណនី ទាំងនេះបាននិយាយថា បើក្រសួងធម្មការ មិនដកលោកជួន វ៉ាន ចេញទេនៅក្នុង មន្ទីរនេះប្រាកដជាច្របូកច្របល់ និង មានបញ្ហាអយុត្ដិធម៌កាន់តែកើនឡើង យ៉ាងខ្លាំង ។
បើទោះជាយ៉ាងនេះក្ដីលោកប្រធាន មន្ទីរបានអះអាងថា ការចោទប្រកាន់ ទាំងនោះមិនពិតទេ ។ លោកថ្លែងថា “ខ្ញុំ មិនបានប្រព្រឹត្ដអំពើពុករលួយដល់កាត់ ប្រាក់ខែពីមន្ដ្រីណាម្នាក់ ហើយក៏មិនបាន ទៅយកលុយពីព្រះសង្ឃនៅវត្ដណានោះ ដែរ” ។ លោកថា បញ្ហាការចោទប្រកាន់ ចេះតែមានហើយ ។
ក្រុមមន្ដ្រីនៅក្នុងអង្គភាពខាងលើ នេះអះអាងថា បញ្ហាចេះតែកើតមានជា ហូរហែបន្ទាប់ពីលោកជួន វ៉ាន ឡើង មកកាន់តំណែងជាប្រធានមន្ទីរធម្មការ និងសាសនាខេត្ដតាកែវ ។ ភាពមានបាន ហ៊ឺហាលឿនរហ័សជាសេចក្ដីសង្ស័យរបស់ ក្រុមមន្ដ្រីនៅក្នុងអង្គភាពគួបផ្សំនឹងការ លេចឮពីតាមបណ្ដាវត្ដនិងស្រុកនានា ទើបធ្វើឱ្យមានបញ្ហាកើតឡើង ។ និយាយ រួមទៅគឺមានភ្លើងទើបមានផ្សែង ៕
ដោយ៖ ហេង សូរិយា
