ខេត្តតាកែវ៖ ជនសង្ស័យជាមុខសញ្ញាម្នាក់ត្រូវកម្លាំងអធិការនគរបាលស្រុកបាទីឃាត់ខ្លួន បន្ទាប់ពីធ្វើសកម្មភាពគាស់ផ្ទះយកទ្រព្យសម្បតិ្ត ។ហេតុការណ៍នេះបានកើតឡើងកាលពីវេលាម៉ោង២រំលងអធ្រាត្រ ឈានចូលថ្ងៃទី២៣ ខែតុលា ឆ្នាំ២០១៥ ស្ថិតនៅក្នុងភូមិតាំដូង ឃុំតាំងដូង ស្រុកបាទី ខេត្តតាកែវ ។
នគរបាលបានប្រាប់ថា ជនសង្ស័យឈ្មោះទូច ចយ ភេទប្រុស អាយុ១៩ឆ្នាំ មានស្រុកកំណើតនៅខេត្តកំពង់ធំ បានមកជួលផ្ទះស្នាក់នៅខណ្ឌពោធិ៍សែនជ័យ ចំណែកបក្ខពួកពីរនាក់ទៀតដែលរត់គេចខ្លួនបាត់ ១ឈ្មោះ ជ្រូក ភេទប្រុស អាយុ២៣ឆ្នាំ ២ឈ្មោះ ទង់ សាវី ភេទប្រុស អាយុ២៤ឆ្នាំ រស់នៅផ្ទះជួលជាមួយគ្នា ។
លោក ឃុត ឡូ អធិការរងទទួលបន្ទុកផ្នែកព្រហ្មទណ្ឌស្រុកបាទីបានអោយដឹងថា ជនសង្ស័យខាងលើគឺជាមុខសញ្ញាចាស់ ហើយមុនពេលកើតហេតុ ជនសង្ស័យទាំង៣នាក់ខាងលើ បានជិះម៉ូតូ១គ្រឿងម៉ាកសង់សេ១២៥ ស៊េរី ឆ្នាំ២០១៣ គ្មានស្លាកលេខ បានមកធ្វើសកម្មភាពគាស់ផ្ទះលក់ទូរស័ព្ទដែលមានម្ចាស់ឈ្មោះ ផាន់ ណារ៉ូ ភេទប្រុស អាយុ២៧ឆ្នាំ ស្ថិតនៅកន្លែងកើតហេតុខាងលើ ។
លោកបានបន្ដទៀថា ក្រោយពេលធ្វើសកម្មភាពរួច ជនសង្ស័យបានយកសម្ភារជាទូរស័ព្ទដៃជាច្រើនគ្រឿង តែត្រូវបានម្ចាស់ផ្ទះដឹងទាន់ ក៏រាយការណ៍ជូនកំលាំងសមត្ថកិច្ច ក៏ឈានទៅដល់ការឃាត់ខ្លួនបានម្នាក់ ហើយពីរនាក់ទៀតរត់គេចខ្លួនបាត់ ។
បច្ចុប្បន្នជនសង្ស័យខាងលើត្រូវបានកសាងសំណុំរឿងបញ្ជូនទៅកាន់ស្នងការនគរបាលខេត្តតាកែវ និងបន្ដបញ្ជូនទៅកាន់សាលាដំបូងខេត្តតាកែវចាត់ការតាមនិតិវិធីច្បាប់ ៕
ដោយ៖ ជីសូរកា
