ខេត្តស្វាយរៀង៖ នាយក នាយិកាសាលាបឋមសិក្សាចំនួន៣ នៅឃុំចំបក់ ស្រុកស្វាយជ្រំ បានអំពាវនាវរកសប្បុរសជន ថ្នាក់ដឹកនាំផ្តល់អគារសិក្សាថ្មីដើម្បីឲ្យសិស្សបានចូលរៀនគ្រប់គ្នា មូលហេតុសាលាខ្វះអគារ(ខ្វះបន្ទប់)ឲ្យសិស្សានុសិស្សចូលរៀន ។
បើតាមលោកស្រីប្រាក់សុខ ស៊ីថន នាយិកាសាលាបឋមសិក្សាតានូបានឲ្យដឹងថា សាលាបឋមសិក្សាតានូ មានផ្ទៃដីទំហំ៥១០៣ម៉ែត្រការ៉េ មានអគារសិក្សាចំនួន២ស្មើ៨បន្ទប់ ក្នុងនោះយកធ្វើបន្ទប់ទីចាត់ការនាយកមួយបន្ទប់ និងមានថ្នាក់ចាប់ពីថ្នាក់ទី១ដល់ថ្នាក់ទី៦សរុប១៦ថ្នាក់ ហើយនៅឆ្នាំសិក្សា២០១៥_២០១៦ នេះមាន សិស្សានុសិស្សសរុប៥៨៤នាក់ ស្រី២៨៥នាក់ សិស្សមតេយ្យចំនួន៥២នាក់ ស្រី១៧នាក់ មកពីភូមិចំនួន៣គឺភូមិតានូ ភូមិទួលខ្ពស់ និងភូមិថ្មី ដែលជាភូមិនៅជាប់ព្រំដែនកម្ពុជា_វៀតណាម (ថ្នាក់ទី១ មាន៨១នាក់ស្រី៤០នាក់ថ្នាក់ទី២ មាន៩៦នាក់៥២នាក់ ថ្នាក់ទី៣មាន១០៩នាក់ ស្រី៥៧នាក់ ថ្នាក់ទី៤ មាន៨៩នាក់ ស្រី៥១នាក់ ថ្នាក់ទី៥ មាន៩២នាក់ ស្រី៥០នាក់ ថ្នាក់ទី៦មាន៧៥នាក់ ស្រី៣៥នាក់) ។ លោកគ្រូ អ្នកគ្រូបង្រៀនមានចំនួន១៤នាក់ ស្រី៦នាក់ ។
លោកស្រីនាយិការបន្តទៀតថា កាលពីឆ្នាំសិក្សា២០១៍៤_២០១៥ មានសិស្សានុសិស្សសរុប៥៩៤នាក់ ស្រី៣០២នាក់ មាន១៦ថ្នាក់ ស្មើ១៦បន្ទប់ សិស្សមតេយ្យមាន១ថ្នាក់ស្មើ១បន្ទប់ ត្រូវការសរុប១៧បន្ទប់ ជាក់ស្តែងបន្ទប់រៀនមានតែ៧បន្ទប់ ដូច្នេះត្រូវបង្រៀនពីរពេលព្រឹកល្ងាចហើយនៅសល់៣ថ្នាក់ទៀត ត្រូវទៅរៀនក្នុងវត្តជ្រៃក្តោង ហៅតានូ នៅក្រោមសាលាឆាន់២ថ្នាក់ និងនៅសាលាទទួលភ្ញៀវ០១ថ្នាក់ ហើយថ្ងៃណាចំថ្ងៃសីល គឺត្រូវផ្អាករៀនទុកឲ្យពុទ្ធបរិសទ័ធ្វើកិច្ចព្រះពុទ្ធសាសនា ហើយខ្វះគ្រូបង្រៀនគ្រូ១១នាក់ បង្រៀន២ពេល គ្រូ៣នាក់បង្រៀនសិស្ស០៣ថ្នាក់ក្នុងមួយថ្ងៃគឺស្ទើតែរកពេលពិសាបាយថ្ងៃត្រង់មិនកើត ហើយនៅឆ្នាំសិក្សា២០១៥_២០១៦ គឺត្រូវខ្វះបន្ទប់រៀន៣បន្ទប់ និងខ្វះគ្រូបង្រៀន០៣នាក់ ។
ដូច្នេះលោកគ្រូ អ្នកគ្រូ ព្រមទាំងមាតាបីតាសិស្សសាលាបឋមសិក្សាតានូ សូមអំពាវនាវដល់សម្តេចអគ្គមហាសេនាបតីតេជោ ហ៊ុន សែន មេត្តាផ្តល់អាគារមួយខ្នងស្មើ០៥បន្ទប់ មកសាលាតានូដើម្បីឲ្យសិស្សបានចូលរៀនគ្រប់ៗគ្នាដោយអនុគ្រោះ ។
ទាក់ទិនករណីខាងលើនេះដែរ លោកស្រី កែវចាន់ មេឃុំចំបក់បានមានប្រសាស៍ថា ក្នុងឃុំចំបក់មានសាលាបឋមសិក្សាចំនួន៣គឺសាលាបឋមសិក្សាតានូ , សាលាបឋមសិក្សាពោធិធំ និងសាលាបឋមសិក្សាភូមិថ្មី ហើយសាលាបឋមសិក្សាពោធិធំគឺខ្វះអាគារសិក្សាចំនួន៦បន្ទប់ ហើយ៦ថ្នាក់នេះត្រូវទៅរៀននៅក្នុងវត្តពោធិធំហៅវត្តជ្រៀង ក៏ប៉ុន្តែកន្លងមកលោកនាយកសាលាបានស្នើសុំលោកជំទាវបណ្ឌិត ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងរដ្ឋសភា និងព្រឹទ្ធសភានិងអធិការកិច្ចបានសន្យាឲ្យសាលាមួយខ្នងកាលពីសម្ពោធសាងសង់ផ្លូវថ្នល់នៅវត្តពោធិធំនៅក្នុង ខែមេសា ២០១៥ កន្លងទៅ រហូតដល់ពេលនេះ ពុំទាន់ឃើញក្រុមការងារចុះសិក្សា ហើយនៅឆ្នាំសិក្សា២០១៥_២០១៦នេះ ប្រឈមខ្វះបន្ទប់សិក្សាទាំងបីសាលា ទើបលោកគ្រូអ្នកគ្រូ ព្រមទាំងអាជ្ញាធរឃុំសុំអំពាវនាវរកសប្បុរសជនជួយឧបត្ថម្ភៈសាលា ជាពិសេសសាលាបឋមសិក្សាតានូដែលកំពុងខ្វះបន្ទប់សិក្សា និងខ្វះគ្រូបង្រៀនផងដែរ ៕
ដោយ៖ យឹម សុថាន
