ខេត្តបន្ទាយមានជ័យ៖ បុរសខ្មែរ៧នាក់រស់នៅខេត្តកំពតបានស្លៀកក្រងស្បង់ជីវរក្លែងក្លាយជាព្រះសង្ឃធ្វើឱ្យប៉ះពាល់វប្បធម៌សាសនាហើយនាំគ្នាទៅដើរបិណ្ឌបាតរកប្រាក់នៅក្នុងប្រទេសថៃត្រូវបានតម្រួតថៃចាប់បញ្ជូនមកកាន់ប្រទេសកម្ពុជាតាមច្រកអន្តរជាតិប៉ោយប៉ែត កាលពីព្រឹកថ្ងៃទី២២ ខែតុលា ឆ្នា២០១៥ ។
សង្ឃក្លែងក្លាយទាំងនោះបន្ទាប់ពីតម្រួតថៃចាប់បញ្ជូនដល់ប្រទេសកម្ពុជា ហើយត្រូវបាន អាជ្ញាធរកម្ពុជាប្រចាំច្រកអន្តរជាតិប៉ោយប៉ែតចាប់បញ្ជូនមកកាន់វត្តត្រាច ក្រុងប៉ោយប៉ែត ក្នុងនោះមាន៣នាក់រត់គេចខ្លួនទាំងស្លៀកស្បង់ជីវរ។ ចំណែក៤នាក់ទៀត្រូវបានលោគ្រូព្រះ អនុគុណក្រុងប៉ោយប៉ែតចាប់ដោះស្បង់ជីវរចេញហើយឱ្យធ្វើកិច្ចសន្យាបញ្ឆប់សកម្មភាពទង្វើអាក្រក់បង្កប៉ះពាល់ទៅលើវិស័យព្រះពុទ្ធសាសនាបែបនោះតទៅទៀត។ជនទាំង៤នាក់នោះក្រោយពីឱ្យធ្វើកិច្ចសន្យារួចហើយក៏ត្រូវបានដោះលែងទៅស្រុកកំណើតវិញ ។
បើតាមសម្តីរបស់ជនក្លែងជាព្រះសង្ឃខាងលើគឺពួកគេបានចូលទៅប្រទេសថៃតាមច្រករបៀងតាមរយៈការអូសទាញរបស់មេខ្យល់ពីព្រោះមេខ្យល់គេអះអាងថាក្លែងជាព្រះសង្ឃ ដើរបិណ្ឌបាតរកប្រាក់នៅដីថៃបានងាយស្រួលទើបពួកគេធ្វើបែបនោះ ។
ពួកគេនាំគ្នាសន្យាថានិងបញ្ឆប់សកម្មភាពមិនឱ្យកើតមានជាលើកទី២នោះឡើយ ហើយនិងខិតខំរកស៊ីតាមសមត្ថភាពឱ្យស្របតាមផ្លូវច្បាប់នោះវិញ ។
សូមបញ្ជាក់ថា នេះមិនមែនជាលើកទី១ នោះទេ សម្រាប់ជនខិលខូចបានក្លែងជាព្រះសង្ឃដើរបិណ្ឌបាតរកប្រាក់នៅប្រទេសថៃ។កន្លងមកគេក៏សង្កេតឃើញមានព្រះសង្ឃក្លែងក្លាយបានដើរទៅបិណ្ឌបាតនៅក្នុងប្រទេសថៃ ហើយត្រូវបានតម្រួតថៃចាប់បញ្ជូនមកប្រទេសកម្ពុជាវិញជាបន្តបន្ទាប់។ជុំវិញនៃការដោះលែងជនខិលខូចដែលយកសាសនាដើរបោកប្រាស់គេបែបនេះត្រូវបានមជ្ឈដ្ឋានលើកឡើងថាគួរណាស់ត្រូវចាប់ពួកគេយកទៅអនុវត្តតាមផ្លូវច្បាប់ឱ្យបានធ្ងន់ធ្ងរ បន្តិចដើម្បីឱ្យរាងចាល បើមិនវិធានការម៉ឺងម៉ាត់នោះទេថ្ងៃក្រោយជនខិលខូចនៅតែបន្តធ្វើ សកម្មភាពបែបនេះតទៅទៀតជាក់ជាមិនខាននោះឡើយ ៕
ដោយ៖ សំ វិច្ឆិកា
