ភ្នំពេញ៖ មហោស្រពភាពយន្តជាតិលើកទី៥ត្រូវបានរៀបចំធ្វើឡើងកាលពីថ្ងៃទី៦ ខែធ្នូ នៅសាលមហោស្រពចតុមុខ ដោយមានផលិតករ និងតារាសម្ដែងល្បីៗជាច្រើនរូបចូលរួម។ ក្រោយពីប្រកាសអំពីសមាសភាពភាពយន្តដែលចូលរួម និងឆ្លងទៅវគ្គជំរុះរួចមកគេឃើញលេចចេញការរិះគន់មួយចំនួនទៅលើក្រសួងវប្បធម៌ ដែលអនុញ្ញាតិឲ្យភាពយន្តដែលផលិតដោយជនបរទេសយកមកធ្វើការប្រកួតប្រជែងក្នុងកម្មវិធីនេះ។
ចាងហ្វាងផលិតកម្ម មហាហង្សបានសម្តែងការសប្បាយរីករាយដែលក្រសួងបានរៀបចំកម្មវិធីនេះព្រោះតែបានជំរុញលើកទឹកចិត្ត និងលើកកម្ពស់វិស័យភាពយន្តនៅកម្ពុជាឲ្យកាន់តែរីកចម្រើន។ ប៉ុន្តែលោកនិងសិល្បករមួយចំនួនហាក់មិនសប្បាយចិត្តនឹងការអនុញ្ញាតិឲ្យភាពយន្តដែលផលិតដោយជនបរទេសចូលរួមប្រកួតប្រជែង។ លោកថាពាក្យថាមហោស្រពភាពយន្តជាតិ គឺអ្វីៗកូនខ្មែរជាអ្នកផលិតដើម្បីបង្ហាញពីស្នារដៃកូនខ្មែរ នឹង អត្តញ្ញាណជាតិខ្មែរ។ផលិតករខ្មែរទាំងអស់ខំប្រឹងណាស់រហូតដល់មានការរីកចំរើនវិសយ័ភាពយន្តគួរអោយកត់សំគាល់ ផលិតករខ្លះរហូតដល់ខ្ចីលុយគេទៀតមកផលិតភាពយន្តព្រោះតែចង់លើកស្ទួយវិស័យមួយនេះ។ លោកបន្តថាការប្រកួតប្រជែងចាញ់រឺឈ្នះជារឿងធម្មតា ប៉ុន្តែត្រូវសុក្រិតនិងយុត្តិធម៌ ហើយផលិតករខ្មែរមិនមានគំនិតថោកទាបទៅច្រណែននិងរឿងបរទេសជាអ្នកផលិត ចូលរួមប្រកួតប្រជែង ដូចជនអគតិមួយចំនួនគិតនោះទេ គ្រាន់តែចង់ចែកអោយច្បាស់រវាងពាក្យជាតិ និង អន្តរជាតិ។លោកបញ្ជាក់ដែរថាបើសិនមិនការវែកញែកច្បាស់លាស់នៅមហោស្រពលើកក្រោយផលិតករខ្មែរនឹងមានការថយចុះក្នុងការយករឿងទៅប្រកួតប្រជែង ពេលនោះមហោស្រពជាតិមានតែរឿងផលិតដោយផលិតករបរទេសចូលរួមប្រកួតប្រជែង តើឯណាទៅពាក្យថាជាតិខ្មែរចង់លើកស្ទួយស្នារដៃខ្មែរជាអ្នកផលិត? លោកលើកឡើងដែរថាផលិតករខ្មែរនិងបាក់ទឹកចិត្តវិសយ័ភាពយន្តនឹងធ្លាក់ចុះវិញជាមិនខាន កូនខ្មែរមួយចំនួននិងអត់ការងារធ្វើ ព្រោះផលិតករដែលមានលុយច្រើននិងរត់ទៅជួលបរទេសមកផលិតរឿងដើម្បីដាក់ប្រកួតប្រជែង យកឈ្មោះ ពេលនោះហើយកូនខ្មែរនិងអស់ឱកាសក្នុងការបញ្ចញស្នាដៃក្នុងការប្រកួតប្រជែងថ្នាក់ជាតិ។
តារាសម្តែងលោក ហេង នរៈកក្កដាបានបញ្ចេញយោបល់ថាពាក្យថាស្នាដៃកូនខ្មែរ ពាក្យថាភាពយន្តថ្នាក់ជាតិ អ្វីៗទាំងអស់គឺបង្កើតដោយស្នាដៃកូនខ្មែរ ធ្វើដោយកូនខ្មែរមិនមែនយកភាពយន្តដែរបរទសផលិតមកធ្វើការប្រកួតប្រជែងនោះទេ សំរាប់លោកជាសិល្បករមួយរូបលោកចង់ឃើញគ្រប់ផលិតកម្មទាំងអស់យកស្នាដៃរបស់ខ្លួនដែលកូនខ្មែរបានផលិតពិតៗយកមកប្រកួតប្រជែង គ្រប់ផ្នែកគឺធ្វើឡើងដោយស្នាដៃកូនខ្មែរពិតៗ។
ឆ្លើយតបនឹងការលើកឡើងបែបនេះ លោក ប៉ុក បូរក្ស ប្រធានស្តីទីនាយកដ្ឋានសិល្បៈភាពយន្ត បាន ឱ្យដឹងថា ការប្រកួតប្រជែងនេះគឺធ្វើទៅតាមគោលការណ៍ប៉ុណ្ណោះ គឺភាពយន្តណាដែលផលិតនៅកម្ពុជា ដែលមានទិដ្ឋាការផលិតពីក្រសួង និងមានការចូលរួមសម្តែងដោយជនជាតិខ្មែរ មិនថាផលិតដោយជនបរទេសនោះទេ សុទ្ធតែមានសិទ្ធិដាក់ប្រកួតក្នុងមហោស្រពជាតិលើកទី៥នេះទាំងអស់។ ប្រធាននាយកដ្ឋានសិល្បៈភាពយន្តដដែលនេះសង្កត់ធ្ងន់ថា ពានរង្វន់មាសរបស់មហោស្រពភាពយន្តជាតិនេះ ក៏ផ្តល់ជូនទៅខ្សែភាពយន្តណាដែលមានស្នាដៃឆ្នើម យោងតាមគណៈកម្មការជម្រើសពិសេសៗ ដែលមានកិត្តនាម និងកេរ្តិ៍ឈ្មោះច្រើនឆ្នាំលើវិស័យភាពយន្តនេះ ដោយមិនរើសថាជារឿងដឹកនាំផលិតដោយជនជាតិបរទេស ឬខ្មែរនោះទេ ក៏ប៉ុន្តែពានរង្វាន់បុគ្គលឆ្នើមលើឯកទេសផលិតភាពយន្ត នឹងមានសម្រាប់តែជនជាតិខ្មែរប៉ុណ្ណោះ។
គួរបញ្ជាក់ដែរថា ក្នុងព្រឹត្តិការណ៍មហោស្របជាតិលើកទី៥នេះ គេឃើញមានភាពយន្តខ្មែរជាច្រើនដាក់ឲ្យចូលរួមប្រកួតប្រជែងក្នុងនោះភាពយន្តចំនួន៨ត្រូវបានគណកម្មការប្រឡងប្រជែងរបស់នាយកដ្ឋានភាពយន្តសម្រេចជាប់វគ្គជម្រុះ ដោយក្នុងចំណោមភាពយន្ត នោះ គឺមាន៣រឿងត្រូវបានគេស្គាល់ថាជាស្នាដៃរបស់បរទេសសុទ្ធសាធ ដោយគ្រាន់ជ្រើសរើសតារាខ្មែរឲ្យសម្ដែង ក្នុងនោះមានភាពយន្តរឿង«Jailbreak ការពារឧក្រិដ្ឋជន» រឿង«មុនពេលដួលរលំ» និងរឿង«តម្លៃស្នេហ៍»គឺរឿងក្រោមការផលិតរបស់ផលិតករបរទេស ។ មានការលើកឡើងថាភាពយន្តរឿង«Jailbreak ការពារឧក្រិដ្ឋជន» និងរឿង«មុនពេលដួលរលំ»គឺប្រើអ្នកកាមេរ៉ា និងអ្នកបច្ចេកទេស ជាជនបរទេសទោះបីជាការបោះទុនរបស់ផលិតកម្មក្នុងស្រុកក្តី។ ក្នុងចំណោមភាពយន្តទាំងអស់ដែលបានជ្រើសរើស នឹងមានតែភាពយន្ត៣ប៉ុណ្ណោះ ឈានដល់វគ្គផ្ដាច់ព្រ័ត្រ ខណ:ដែលការប្រកាសថាភាពយន្តល្អផ្ដាច់គេប្រចាំព្រឹត្តិការណ៍ នឹងត្រូវធ្វើឡើងនៅថ្ងៃទី១០ ធ្នូនេះ ដែលជ័យលាភីនិងទទួលបានទឹកប្រាក់សុទ្ធចំនួន ៣០លានរៀល៕
ដោយ៖ វឌ្ឍនា
