ខេត្តកណ្តាល៖ មុខសញ្ញារក្សាទុកគ្រឿងញៀនខុសច្បាប់២នាក់ ត្រូវបានសមត្ថកិច្ចនគរបាលស្រុកស្អាងចេញល្បាតចាប់ខ្លួន កាលពីវេលាម៉ោង២០ និង៤៣នាទី ថ្ងៃទី២៣ ខែតុលា ឆ្នាំ២០១៥ លើកំណាត់ផ្លូវជាតិលេខ២១បេ ស្ថិតក្នុងភូមិកោះគ ឃុំរកាខ្ពស់ ស្រុកស្អាង ដកហូតវត្ថុតាងថ្នាំញៀនប្រភេទមេតំហ្វេតាមីនហៅម៉ាទឹកកក១កញ្ចប់ និង ម៉ូតូមួយគ្រឿងហុងដាគុបមូលមួយគ្រឿង បញ្ជូនទៅអធិការដ្ឋានដើម្បីកសាងសំណុំរឿងចាត់ការតាមនីតិវិធីច្បាប់ ។
មន្ត្រីនគរបាលស្រុកស្អាងបានឲ្យដឹងថា ជនសង្ស័យ២នាក់ដែលត្រូវបានឃាត់ខ្លួននោះ ទី១-ឈ្មោះ លី ដារិទ្ធ ភេទប្រុស អាយុ១៩ឆ្នាំ ជនជាតិខ្មែរ មុខរបរមិនពិតប្រាកដ ទី២-ឈ្មោះ ថា វណ្ណី ភេទប្រុស អាយុ២៨ឆ្នាំ ជនជាតិខ្មែរ មុខរបរ ជាអ្នកនេសាទត្រី ។ ជនសង្ស័យទាំង២នាក់មានទីលំនៅក្នុងភូមិកោះគ ឃុំរកាខ្ពស់ ស្រុកស្អាង ។
ប្រធានក្រុមអន្តរាគមន៍ នៃអធិការដ្ឋាននគរបាលស្រុកស្អាងលោកអនុសេនីយ៍ ភក្តី វិទូ បានឲ្យដឹងថា អនុវត្តតាមបទបញ្ជារបស់លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល ក៏ដូចជាការណែនាំរបស់លោកវរសេនីយ៍ទោ សេង សុជាតិ អធិការនគរបាលស្រុក កម្លាំងនគរបាលអន្តរាគមន៍បានចេញល្បាតជារៀងរាល់ថ្ងៃ និងពេលយប់ នៅតាមតំបន់ងាយរងគ្រោះ ដើម្បីការពារសន្តិសុខ សុវត្ថិភាព និងសណ្តាប់ធ្នាប់ជូនដល់ប្រជាពលរដ្ឋក្នុងមូលដ្ឋាន ។
លោកអនុសេនីយ៍ ភក្តី វិទូ បានបន្តថា នៅយប់ថ្ងៃទី២៣ ខែតុលា ឆ្នាំ២០១៥ លោកបានដឹកនាំកម្លាំងនគរបាលអន្តរាគមន៍ចំនួន៧រូប ចេញល្បាតតាមគោលដៅងាយរងគ្រោះនៅលើកំណាត់ផ្លូវជាតិលេខ២១បេ ។ពេលកំពុងចេញល្បាតនិងត្រួតពិនិត្យទៅលើអ្នកធ្វើដំណើរតាមដងផ្លូវ ក៏បានប្រទះឃើញជនសង្ស័យទាំង២នាក់ខាងលើនេះជិះម៉ូតូឌុបគ្នាបោះពួយយ៉ាងលឿន ។ ភ្លាមៗនោះកម្លាំងល្បាតបានជិះម៉ូតូតាមឃាត់ខ្លួនជនសង្ស័យ សុំធ្វើការឆែកឆេររកឃើញមានថ្នាំញៀនប្រភេទម៉ាទឹកកកចំនួន០១កញ្ចប់នៅក្នុងកាបូបដាក់លុយ របស់ជនសង្ស័យឈ្មោះ លី ដារិទ្ធ ទើបកម្លាំងល្បាតចាប់ខ្លួនជនសង្ស័យទាំង២នាក់វៃខ្នោះ បញ្ជូនទៅអធិការដ្ឋានដើម្បីកសាងសំណុំរឿងចាត់ការតាមនីតិវិធីច្បាប់ ។
ប្រធានក្រុមអន្តរាគមន៍បានបញ្ជាក់ថា ថ្នាំញៀន០១កញ្ចប់ខាងលើនេះជនសង្ស័យទាំង២នាក់បានទិញពីមេក្លោងជួញដូរគ្រឿងញៀនម្នាក់នៅម្តុំវាលខ្សាច់ ស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ក្នុងតម្លៃមួយកញ្ចប់១ម៉ឺនរៀល គោលបំណងយកទៅប្រើប្រាស់ខណៈជិះមិនទាន់ជិះម៉ូតូដល់គោលដៅផងត្រូវបានកម្លាំងអន្តរាគមន៍ឃាត់ខ្លួនតែម្តង ។
លោកអនុសេនីយ៍ ភក្តី វិទូ បានបញ្ជាក់ទៀតថា ជនសង្ស័យឈ្មោះ ថា វណ្ណី កន្លងមកត្រូវបានក្រុមគ្រួសារនាំខ្លួនយកទៅដាក់នៅមណ្ឌលបន្សាបសារធាតុញៀន “ឱកាសខ្ញុំ” ស្ថិតក្នុងរាជធានីភ្នំពេញកាលពីថ្ងៃទី២១ ខែវិច្ឆិកា ឆ្នាំ២០១៥ ដោយទុកនៅទីនោះរយៈពេល៤ខែ បន្ទាប់ពីជនសង្ស័យរូបនេះប្រើប្រាស់ថ្នាំញៀនឧស្សាហ៏បង្កការអុកឡុកនៅក្នុងគ្រួសារ ៕
ដោយ៖ ស្អាងជ័យ
