ខេត្តកណ្តាល៖ មន្ត្រីកងរាជអាវុធហត្ថ ខណ្ឌដង្កោម្នាក់បានជួបគ្រោះថ្នាក់ចរាចរជិះម៉ូតូបុកជាមួយរថយន្តទួរីសដឹកអ្នកដំណើរចំពីមុខពេញទំហឹងស្លាប់យ៉ាងអណោចអធម្មនៅកន្លែងកើតហេតុ គ្រាដែលជនរងគ្រោះជិះម៉ូតូចេញពីស្រុកកំណើតសំដៅទៅបំពេញការងារនៅអង្គភាពវិញ ។
ករណីគ្រោះថ្នាក់ចរាចរនេះបានកើតឡើងនៅ វេលាម៉ោង៤,៣០នាទីទាបភ្លឺ ថ្ងៃទី២៦ ខែតុលា ឆ្នាំ២០១៥ នៅលើកំណាត់ផ្លូវជាតិលេខ១ ចន្លោះគីឡូម៉ែត្រ៤៣-៤៤ ភូមិព្រែកត្រែង ឃុំសំរោងធំ ស្រុកកៀនស្វាយ ខេត្តកណ្តាល ។
ជនរងគ្រោះដែលស្លាប់នៅកន្លែងកើតហេតុ មានឈ្មោះ រ៉ន ឱផានិត ភេទប្រុស អាយុ២៥ឆ្នាំ ជាមន្ត្រីកងរាជអាវុធហត្ថ ខណ្ឌដង្កោ មានស្រុកកំណើតនៅឃុំក្រោលគោ ស្រុកស្វាយជ្រុំ ខេត្តស្វាយរៀង ជិះម៉ូតូម៉ាក វ៉េវអេស ពាក់ស្លាក់លេខ ភ្នំពេញ 1BN-3636 ។
រថយន្តដែលបុកម៉ូតូ ជាប្រភេទរថយន្តទួរីសដឹកអ្នកដំណើរម៉ាក សាំយ៉ុង ពណ៍ស ពាក់ស្លាកលេខ ភ្នំពេញ 2AD-6648 អ្នកបើកបររត់គេចខ្លួនបាត់ ។
លោកព្រុំ សំណាង អធិការរងនគរបាលស្រុកកៀនស្វាយទទួលការងារសណ្តាប់ធ្នាប់ចរាចរ បាន អោយដឹងថា មុនពេលគ្រោះថ្នាក់ សាក្សីបានឃើញជនរងគ្រោះជិះម៉ូតូតែម្នាក់ឯងក្នុងល្បឿនលឿនទិសដៅពីអ្នកលឿងចូលមកភ្នំពេញ មកដល់ចំនុចកើតហេតុជន រងគ្រោះបានបើកជែងរថយន្តមួយគ្រឿងទៀតដែលនៅពីមុខក្នុងស្ថានភាពផ្លូវមានឧបសគ្គ ក៍ជ្រុលទៅបុកជាមួយរថយន្ត ទួរីសដឹកអ្នកដំណើរដែលបើកបរក្នុងទិសដៅផ្ទុយគ្នាចំពីមុខបណ្តាលអោយស្លាប់នៅកន្លែងកើតហេតុ ចំណែកអ្នកបើកបរ រថយន្តរត់គេចខ្លួនបាត់ ។
លោកអធិការរងបានបន្តថា ជនរងគ្រោះជិះម៉ូតូចេញពីស្រុកកំណើតនៅខេត្តស្វាយរៀងសំដៅទៅមូលដ្ឋានកងរាជអាវុធហត្ថខណ្ឌដង្កោ ដែលជាកន្លែងធ្វើការ ក៍ជួបគ្រោះថ្នាក់ចរាចរស្លាប់យ៉ាងអណោចអធម្មនៅតាមផ្លូវ ។ តាមការវាស់វែង ករណីនេះកើតឡើងដោយសារការបើកមិនប្រយ័ត្នប្រជែងក្នុងស្ថានភាពផ្លូវមានឧបសគ្គ មិនគោរពសិទ្ធជាអាទិភាព ។ ចំពោះភាគីខាងរថយន្តក៍រួមចំណែកក្នុងករណីគ្រោះថ្នាក់ចរាចរនេះដែរ ពោលគឺបើកបរប្រកាន់ស្តាំពិតមែន តែហួសល្បឿនកំណត់ ។
បច្ចុប្បន្នរថយន្តនិងម៉ូតូត្រូវបាន យកមករក្សាទុកនៅអធិការដ្ឋាននគរបាលស្រុកកៀនស្វាយដើម្បីដោះស្រាយតាមផ្លូវច្បាប់ ចំណែកសាកសពសមត្ថកិច្ចប្រគល់អោយក្រុមគ្រួសារយកទៅធ្វើបុណ្យនៅស្រុកកំណើត ៕
ដោយ៖ សណ្តោស
