ខេត្តស្វាយរៀង៖ ខេត្តស្វាយរៀងនៅថ្ងៃទី១ខែវិច្ឆិកា ឆ្នាំ២០១៥ខាងមុខនេះនឹងមានព្រឹត្តការណ៍ប្រណាំងទូកងដើម្បីបង្កើតការសប្បាយរីករាយដល់ប្រជាពលរដ្ឋក្នុងខេត្តបានទស្សនាកំសាន្ត ។
គេសង្កេតឃើញថា អាជ្ញាធរខេត្តស្វាយរៀងបានដាក់ផែនការទៅតាមមន្ទីរ ក៏ដូចជាអង្គភាពនានាជុំវិញខេត្តត្រូវត្រៀមលក្ខណៈឲ្យបានគ្រប់គ្រាន់ ចុះសម្អាតសំរាម និងស្រង់កម្លោកក្នុងទឹកទន្លេវៃគោ ជាពិសេសត្រៀមរៀបចំសណ្ដាប់ធ្នាប់ របៀបរាបរយសន្តិសុខ សុវត្ថិភាពដល់ប្រជាពលរដ្ឋក្នុងការទស្សនាកំសាន្តពិធីប្រណាំងទូកនេះ ។
បើតាមការណ៍គ្រោងទុកទូកងខ្នាតអន្តរជាតិ និងទូក៣សន្លឹកមានចំនួនជាង៤០គូ មកពីស្រុកក្រុងខេត្តស្វាយរៀង និងទូករបស់កងរាជអាវុធហត្ថខេត្តក្រុងទូទាំងប្រទេសមកចូលរួមប្រលងប្រណាំងផងដែរ ។
សូមបញ្ជាក់ដែរថា ការប្រណាំងទូកនេះក្រោមការចូលរួមផ្តួចផ្តើមរបស់លោកស្រីបណ្ឌិត ម៉ែន សំអន ឧបនាយករដ្ឋមន្ត្រីនិងជារដ្ឋមន្ត្រីក្រសួងទំទាក់ទំនងជាមួយរដ្ឋសភាព្រិទ្ធសភានិងអធិការកិច្ច និងនាយឧត្តមសេនីយ៍ សៅ សុខា អគ្គមេបញ្ជាការរងកងយុទ្ធពលខេមរភូមិន្ទ និងជាមេបញ្ជការកងរាជអាវុធហត្ថលើផ្ទៃប្រទេស ។ ចំណែកឯទូកតាមបណ្ដាខេត្ត ក្រុងរបស់កងរាជអាវុធហត្ថ ក៏បាននាំមកដល់ខេត្តស្វាយរៀងចុះទឹកទន្លេវៃគោប្រណាំងសាកល្បងដើម្បីសមកំលាំងនៅថ្ងៃទី១ ខែវិច្ឆិកា ឆ្នាំ២០១៥ ៕
ដោយ៖ យឹម សុថាន
