ភ្នំពេញៈ យុវជនម្នាក់ត្រូវមេការចាប់ខ្លួនប្រគល់អោយសមត្ថកិច្ចបន្ទាប់ពីជនសង្ស័យមានទំនាស់ពាក្យសំដីជាមួយជនរងគ្រោះឈានដល់ប្រើអំពើហឹង្សាយកដំបងឫស្សីវាយទៅលើជនរងគ្រោះចំសៀតផ្កា បណ្តាលដួលសន្លប់នៅកន្លែងកើតហេតុ កាលពីវេលាម៉ោង១ រំលងអាធ្រាត្រ ឈានចូលថ្ងៃទី២៨ ខែកុម្ភៈ ឆ្នាំ២០១៨ នៅចំនុចផ្ទះគ្មានលេខ ផ្លូវលំ ភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ ។

ជនរងគ្រោះឈ្មោះហួត ប៉េងគ្រី ភេទប្រុស អាយុ៣១ឆ្នាំ មុខរបរ ជាងចម្លាក់ ស្នាក់នៅភូមិទួលស្លែង ឃុំលើកដែក ស្រុកកោះធំ ខេត្តកណ្តាល។
ជនសង្ស័យឈ្មោះសុង ដារិទ្ធ ភេទ ប្រុស អាយុ២២ឆ្នាំ ជនជាតិខ្មែរ មុខរបរ ជាងចម្លាក់ ស្នាក់នៅភូមិព្រែករុន ឃុំព្រែកគយ ស្រុកស្អាង ខេត្តកណ្តាល។

មន្ត្រីនគរប៉ុស្តិ៍ព្រែកថ្មីបានអោយដឹងថា មុនពេលកើតហេតុ ជនសង្ស័យ និងជាងចម្លាក់ផ្សេងទៀតបាននាំគ្នាផឹកសុីនៅចំណុចផ្ទះកើតហេតុ បន្ទាប់ មកជនសង្ស័យក៏បានឈ្លោះប្រកែកជាមួយប្អូនជនរងគ្រោះ ពេលនោះក៏មានគេទាក់ទងប្រាប់មេការ ឲ្យមកជួយសម្របសម្រួល។

រហូតដល់ម៉ាង០១និង០០នាទី ឈានចូលថ្ងៃទី ២៨ ខែកុម្ភៈ ឆ្នាំ២០១៨ មេការក៏ហៅជនសង្ស័យ និងជាងចម្លាក់ទាំងអស់មកសួរ ពេលនោះជនសង្ស័យក៏ទាស់សម្តីជាមួយជនរងគ្រោះ រួចជនសង្ស័យក៏យកដំបងឬស្សីប្រវែង០.៨០ម៉ែត្រប៉ុនកំភួនដៃ វាយទៅលើជនរងគ្រោះចំសៀតថ្កាខាងស្តាំបណ្តាលឲ្យសន្លប់បាត់ស្មារតី រួចមេការក៏ឃាត់ខ្លួនជនសង្ស័យ រួមនិងវត្ថុតាងយកមកប្រគល់ឲ្យសមត្ថកិច្ចប៉ុស្តិ៍ព្រែកថ្មី ចាត់ការតាមច្បាប់។ ចំណែកជនរងគ្រោះត្រូវបានមិត្តភក្តិនាំទៅសង្គ្រោះបន្ទាន់នៅមន្ទីរពេទ្យជ័យជំនះ ក្រុងតាខ្មៅ ខេត្តកណ្តាល។

បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅអធិការដ្ឋាននគរបាលខណ្ឌដើម្បីចាត់ការតាមផ្លូវច្បាប់៕ សណ្តោស