ខេត្ដកោះកុង៖ មន្ដ្រីការិយាល័យ បសុសត្វនៃមន្ទីរកសិកម្មរុក្ខាប្រមាញ់ និងនេសាទខេត្ដកោះកុងបានថ្លែងថា ករណីនាំចូលសាច់មាន់ជង្គង់មាន់ សាច់ ជ្រូកខូចគុណភាព និងជាតិគីមី តាមច្រក អន្ដរជាតិចាំយាមខាងបសុសត្វពុំមានសិទ្ធិក្នុងពិនិត្យនោះទេ ។
លោក ខៀវ កានិត ប្រធានការិយា ល័យបសុសត្វនៃមន្ទីរកសិកម្មខេត្ដកោះកុងបានថ្លែងថា ករណីត្រួតពិនិត្យនេះ គឺមន្ដ្រីកាំកុងត្រូលប្រចាំច្រកជាអ្នកមានតួនាទី ចំណែកខាងលោកគឺគេហៅទៅ សហការពេលមានករណីទ្រង់ទ្រាយធំតែប៉ុណ្ណោះ ។ ចំណែកការដាក់លក់ស្លាប មាន់ ជង្គង់មាន់ និងសាច់ជ្រូកទាំងនោះ នៅក្នុងផ្សារនានា ពិសេសគឺនៅផ្សារ ដងទង់នោះខាងលោកធ្លាប់បានចុះទៅ ត្រួតពិនិត្យដែរតែអាជីវករទាំងនោះចេះ តែលួចនាំចូលយកមកលក់ ហើយខាង លោកគ្មានកម្លាំងគ្រប់គ្រាន់ក្នុងការត្រួតពិនិត្យនោះទេ ។
តែយ៉ាងណាក៏ដោយបើតាមលោក ប្រធានការិយាល័យរូបនេះថា ករណីនេះ លោកនឹងធ្វើរបាយការណ៍សុំយោបល់ទៅប្រធានលោកដើម្បីរកចំណាត់ការក្នុង ការទប់ស្កាត់ ។
សូមបញ្ជាក់ថា បញ្ហាជង្គង់មាន់ ស្លាបមាន់ និងសាច់ជ្រូកខូចគុណភាព និងសម្បូរជាតិគីមីនេះ បច្ចុប្បន្នវាបាន ក្លាយជាចំណោទ និងការព្រួយបារម្ភ យ៉ាងខ្លាំងសម្រាប់ប្រជាពលរដ្ឋខេត្ដកោះកុង ព្រោះតែមានការបណ្ដែតបណ្ដោយ ឱ្យនាំចូលយ៉ាងអនាធិបតេយ្យក្រោមការ បើកដៃពីសមត្ថកិច្ចប្រចាំច្រកចាំយាម ដោយមិនបានគិតគូរពីសុខភាពរបស់ ប្រជាពលរដ្ឋនោះទេ ។
ចំពោះបញ្ហាទាំងអស់នេះនគរវត្ដ ធ្លាប់បានព្យាយាមទាក់ទងសុំការបំភ្លឺពី ខាងមន្ដ្រីកាំកុងត្រូលជាច្រើនលើកច្រើនសាដែរ តែមន្ដ្រីទាំងអស់នោះហាក់គេច វេះមិនផ្ដល់បទសម្ភាសន៍ ដោយយក លេសជាប់រវល់ និងជាប់ប្រជុំរហូត ៕
ដោយ៖ ហេង នរិន្ទ្រ
