ករណីយន្តហោះរុស្ស៊ីធ្លាក់នៅក្នុងប្រទេសអេហ្ស៊ីបនាពេលកន្លងមកថ្មីៗ បានធ្វើឲ្យមានការព្យាករណ៍ថា ប្រសិនបើក្រុមអិស្លាមបង្កើតរដ្ឋអាចបាញ់ទម្លាក់យន្តហោះរុស្ស៊ី និងវាយប្រហារភេរវកម្មនៅលើទឹកដីរុស្ស៊ីនោះតើប្រធានាធិបតីពូទីននឹងធ្វើអ្វី?
សារព័ត៌មានរុស្ស៊ីបានផ្សាយថា ប្រសិនបើកហេតុការណ៍នោះកើតឡើងពិតមែនគឺជា ឧបសគ្គដ៏ធំធេងសម្រាប់ប្រទេសរុស្ស៊ីនិងជាការប្រឈមមុខរបស់លោកពូទីន។ បើមានការវាយប្រហារទៅលើរុស្ស៊ី តើរដ្ឋាភិបាលទីក្រុងមូស្គូអាចរក្សាការធ្វើសង្គ្រាមវាយប្រហារទៅលើក្រុមIS នៅក្នុងប្រទេសស៊ីរីទៀតដែរឬទេ? ការវាយប្រហារនោះជាចំណុចធ្វើឲ្យក្រុមភេរវកម្មបង្កើតការវាយប្រហារទៅលើប្រទេសរុស្ស៊ី។
កន្លងមករុស្ស៊ីក៏បានប្រឈមមុខនឹងការគម្រាមកំហែងពីក្រុមភេរវកម្មនៅតំបន់Chechnya និងមកពីតំបន់ជាច្រើនទៀតនៅភាគខាងជើងតំបន់Kavkaz ប៉ុន្តែរុស្ស៊ីនៅតែដើរតួនាទីយ៉ាងសំខាន់ក្នុងការវាយប្រហារទៅលើក្រុមអិស្លាមបង្កើតរដ្ឋនៅស៊ីរី។ សកម្មភាពទាំងនោះអាចធ្វើឲ្យរុស្ស៊ីប្រែកក្លាយជាគោលដៅថ្មីសម្រាប់វាយប្រហារភេរវកម្ម។
មេដឹកនាំក្រុមAl Nusra ដែលជាសាខាក្រុមភេរវកម្មអាល់កៃដា នៅក្នុងប្រទេសស៊ីរី បានអំពាវនាវដល់ខ្មាន់កាំភ្លើងទាំងអស់បើកការវាយប្រហារទៅលើទាហាននិងពលរដ្ឋរុស្ស៊ីជាការសងសឹកដល់រុស្ស៊ីដែលបានវាយប្រហារទៅលើក្រុមIS នៅក្នុងប្រទេសស៊ីរី។
មេដឹកនាំAl Nusraលោក Abu Mohammed Al Jolani ធ្លាប់បានប្រកាសថាការជ្រៀតជ្រែករបស់រុស្ស៊ីចូលក្នុងទឹកដីស៊ីរីគឺជាមុខព្រួញចុងក្រោយក្នុងចំណោមមុខព្រួញទាំងអស់របស់សត្រូវក្រុមអិស្លាម។ លោកបានអំពាវនាវដល់ក្រុមឧទ្ទាមនៅតំបន់Kavkaz បើកការវាយប្រហារបណ្តេញរុស្ស៊ីចេញពីសមរភូមិនៅក្នុងទឹកដីស៊ីរី។
នៅពេលដែលយន្តហោះរុស្ស៊ីធ្លាក់នៅក្នុងប្រទេសរុស្ស៊ីកាលពីចុងសប្តាហ៍កន្លងមក ក្រុមអិស្លាមបង្កើតរដ្ឋបានប្រកាសថាជាទង្វើរបស់ក្រុមខ្លួន។ ពេលនេះក្រុមអ្នកស្រាវជ្រាវបានបើកការស្រាវជ្រាវបញ្ជាក់ការពិតពីមូលហេតុបណ្តាលឲ្យមានគ្រោះថ្នាក់ដល់យន្តហោះដឹកអ្នកដំណើរដែរឬទេ។ អ្នកឯកទេសអាកាសចរណ៍របស់រុស្ស៊ីបានបញ្ជាក់ថាយន្តហោះធ្លាក់មិនបណ្តាលមកពីអាកាសយានិកឬបញ្ហាបច្ចេកទេសនោះឡើយ។ទាំងនោះហើយធ្វើឲ្យមានការព្រួយបារម្ភថាយន្តហោះនោះពិតជារងការវាយប្រហារភេរវកម្ម៕
ប្រែសម្រួល៖ ថាច់ យ៉ាត
