មន្ត្រីបានថ្លែងថា យ៉ាងហោចណាស់មនុស្ស១៦នាក់បានបាត់បង់ជីវិតបន្ទាប់ពីហេតុការណ៍បាក់រលំសំណង់អគាររោងចក្រដែលកំពុងស្ថិតក្រោមការសាងសង់ នៅក្នុងរដ្ឋធានី Lahore ប្រទេសប៉ាគីស្ថាន ។
ក្រុមជួយសង្គ្រោះបានមានការព្រួយបារម្ភថា ជនរងគ្រោះរហូតដល់១៥០នាក់ផ្សេងទៀតជាប់គាំងនៅក្នុងហេតុការណ៍គ្រោះថ្នាក់នេះ ។ ប្រតិបត្តិការសង្គ្រោះទ្រង់ទ្រាយធំមួយកំពុងប្រព្រឹត្តទៅដើម្បីជួយដល់ជនរងគ្រោះ ។
ការយំទួញសោក ដង្ហោយហៅរកការជួយសង្គ្រោះពីសំណាក់ជនរងគ្រោះ គេនៅតែឮសំឡេងចេញពីក្រោមសំណង់អគារបែកបាក់នោះ ។ ក្រុមជួយសង្គ្រោះបានប្រើប្រាស់គ្រឿងចក្រធុនធ្ងន់មកធ្វើប្រតិបត្តិការជួយសងគ្រោះនេះ ។
ប្រព័ន្ធសុវត្ថិភាពការងារនៅក្នុងប្រទេសប៉ាគីស្ថាន ស្ថិតនៅមានកម្រិត មិនស្របទៅតាមស្តង់ដារអន្តរជាតិនោះទេ ។ អគារមានកម្ពស់ពីរជាន់នៃរោងចក្រ ស្ថិតនៅក្នុងតំបន់ឧស្សាហកម្មអចលនទ្រព្យ Sundar តំបន់ជាយក្រុងនោះបានប្រតិបត្តិការប្រើប្រាស់ ខណៈដែលអគារ៣ផ្សេងទៀងបាននិងកំពុងស្ថិតក្រោមការសាងសង់ ។
ទីភ្នាក់ងារព័ត៌មាន Dawn បានផ្សព្វផ្សាយថា កម្លាំងពលកម្មមិនទាន់គ្រប់អាយុត្រូវឈ្មួញជួលឲ្យបម្រើការនៅទីនោះ បើទោះជាគ្មានការបញ្ជាក់អះអាងប្រាប់ជាចំហរយ៉ាងណាក៏ដោយ ។ ក្រុមជួយសង្គ្រោះបាននិយាយថា ពួកគេបានធ្វើសកម្មភាពរហូតមកដល់ពេលនេះ សង្គ្រោះបានជនរងគ្រោះ៤៥នាក់ដែលកប់នៅពីក្រោមគំនរបាក់បែក ។ ទូរទស្សន៍គ្រប់គ្រងដោយរដ្ឋបានផ្សព្វផ្សាយថា អ្នករងរបួស៤៥នាក់ត្រូវបញ្ជូនទៅកាន់មន្ទីរពេទ្យដោយឡែកផ្សេងគ្នាស្ថិតនៅក្នុងតំបន់ ។
យោធានៅក្នុងប្រទេសនេះក៏បានបញ្ជាក់ដែរថា ខ្លួនបានបញ្ជូនក្រុមវិស្វកម្ម និងអ្នកជំនាញឲ្យមកចូលរួមប្រតិបត្តិការជួយសង្គ្រោះនេះ ។ ប្រតិបត្តិការជួយសង្គ្រោះមានការលំបាក និងស្មុគ្រស្មាញ ដោយសារតែការប្រើគ្រឿងចក្រធុនធ្ងន់ ដែលអាចប៉ះពាល់រងរបួសដល់ជននៅរស់រានមានជីវិត ។
លោក Jam Sajjad Hussain អ្នកជួយសង្គ្រោះបានប្រាប់ AP ថា កម្មករប្រមាណជិត២០០នាក់ត្រូវគេជឿថា កំពុងស្ថិតនៅក្នុងអគារនេះ អំឡុងពេលដែលមានការបាក់ស្រុតនោះ ។ ប្រព័ន្ធផ្សព្វផ្សាយប៉ាគីស្ថានបានប៉ាន់ប្រមាណថា ជនរងគ្រោះប្រមាណ១៥០នាក់ ស្ថិតនៅក្នុងហេតុការណ៍នេះ ។
ប្រព័ន្ធសុវត្ថិភាពស្តីអំពីអគារសំណង់នៅប៉ាគីស្ថានមានកម្រិត ដែលមូលហេតុនោះហើយតែងតែកើតមានគ្រោះថ្នាក់ញឹកញាប់ ។ កាលពីខែកញ្ញា ឆ្នាំ២០១៤ មនុស្ស២៤នាក់បានបាត់បង់ជីវិត ស្ថិតនៅក្នុងទីក្រុង Lahore នេះផងដែរ ដោយសារតែបាក់រលំគ្រឹះព្រះវិហារមួយកន្លែងនោះ ។ មនុស្ស១៧នាក់បានបាត់បង់ជីវិត ក្នុងនោះមានទាំងកុមារផងដែរ បន្ទាប់ពីរោងចក្រមួយកន្លែងបានបាក់ស្រុក ក្រោយកើតមានហេតុការណ៍ផ្ទុះហ្គាល់ ស្ថិតនៅតំបន់ទីប្រជុំជន កាលពីខែកុម្ភៈ ឆ្នាំ២០១២ ៕
ប្រែសម្រួល៖ ថាច់ យ៉ាត
