មន្ត្រីបានថ្លែងថា អាកាសយានដ្ឋានបាលី កាលពីថ្ងៃទី៥ ខែវិច្ឆិកា ឆ្នាំ២០១៥ត្រូវបើកឲ្យដំណើរការឡើងវិញ ។ អាកាសយានដ្ឋាននេះបានរងការគំរាមកំហែងពីផ្សែង ផេះកម្អែភ្នំភ្លើងដែលនៅក្បែរនោះបានផ្ទុះក្នុងអំឡុងពេល២ថ្ងៃមុននេះ ធ្វើឲ្យជើងហោះហើររាប់រយជើង ចាំបាច់ត្រូវតែប្រកាសផ្អាកការចេញដំណើរ ។
ខ្យល់បក់បោកយ៉ាងរំភើយនាំមកជាមួយនូវផេះ និងផ្សែងពពកពីភ្នំភ្លើង Mount Rinjani ដែលជាភ្នំភ្លើងរស់មួយស្ថិតជិតដែនកោះ Lombok និងមិនឆ្ងាយប៉ុន្មានពីអាកាសយានដ្ឋានអន្តរជាតិ Ngurah Rai ។ ប៉ុន្តែនៅថ្ងៃព្រហស្បតិ៍ ទី៥ ខែវិច្ឆិកា ស្ថិតនៅពីលើអាកាសយានដ្ឋានទីក្រុងបាលី អាកាសធាតុស្រឡះល្អប្រសើរឡើងវិញ អាចបន្តការហោះហើរដោយគ្មានការព្រួយបារម្ភអ្វីឡើយ ។
លោក Yulfriadi Gona ប្រធានអាកាសយានដ្ឋានបានថ្លែងប្រាប់ AFP ថា អាកាសយានដ្ឋានត្រូវបើកឲ្យដំណើរការហោះហើរឡើងវិញចាប់ពីវេលាម៉ោង២និង៣០នាទីរសៀល ម៉ោងនៅក្នុងតំបន់ ។ ខ្យល់បានតម្រង់ទិសបក់បោកទៅកានភាគខាងត្បូង និងភាគនិរតី ដែលមានន័យថា ផេះភ្នំភ្លើង នឹងមិនត្រូវបានបក់មកកាន់ទីក្រុងបាលីម្តងទៀតឡើយ ។
អាកាសយានដ្ឋានអន្តរជាតិនេះត្រូវប្រកាសបិទកាលពីរសៀលថ្ងៃអង្គារមកម្ល៉េះ ។ មន្ត្រីបានប្រកាសបន្តបិទអាកាសយានដ្ឋាននេះមិនឲ្យមានការហោះហើរដែលយ៉ាងតិចណាស់ក៏រហូតដល់ព្រឹកថ្ងៃសុក្រ ទី៦ ខែវិច្ឆិកានោះដែរ ។ ប៉ុន្តែដោយសារស្ថានការណ៍មានលក្ខណៈប្រសើរកាលពីថ្ងៃទី៥ ខែវិច្ឆិកា ហើយក្រុមភ្នាក់ងារឧតុនិយមជាតិក៏បានបញ្ជាក់អំពីសុវត្ថិភាពនោះ ទើបខាងអាកាសយានដ្ឋានសម្រេចបន្តការហោះហើរមុនពេលកំណើត ។ នេះបើតាមការលើកឡើងរបស់លោក Yulfriadi Gona ប្រធានអាកាសយានដ្ឋានអន្តរជាតិទីក្រុងបាលី ។
ក្នុងចន្លោះចាប់ពីថ្ងៃអង្គារ រហូតដល់ថ្ងៃព្រហស្បតិ៍ ជើងហោះហើរប្រមាណ៧០០ជើង ក្នុងនោះមានជើងហោះហើរអន្តរជាតិ៣២០ជើងត្រូវប្រកាសលុបចោលការហោះហើរ ។
ការលុបចោលជើងហោះហើរក្នុងចំនួនច្រើនបែបនេះបានធ្វើឲ្យមានចលាចល ជាប់គាំងអ្នកដំណើររាប់ពាន់នាក់នៅក្នុងទីក្រុងបាលី ។ ក្នុងនោះមានទាំងជាប់គាំងដំណើរទស្សនកិច្ចរបស់លោកអនុប្រធានាធិបតីឥណ្ឌា លោក Mohammad Hamid Ansari ផងដែរ ។
ការចរាចរណ៍តាមដែនអាកាស ជានិច្ចកាលតែងតែរំខានដោយការផ្ទុះភ្នំភ្លើងនៅក្នុងប្រទេសឥណ្ឌូនេស៊ី ដែលជាប្រទេសមានភ្នំភ្លើងប្រមាណ១៣០ នៅទូទាំងប្រទេស ហើយភ្នំភ្លើងភាគច្រើនសុទ្ធតែភ្នំភ្លើងរស់នោះ ៕
ប្រែសម្រួល៖ ថាច់ យ៉ាត
