ភ្នំពេញ៖ សត្វពស់ថ្លាន់១ក្បាលមានទំងន់ជាង១២គឺឡូក្រាមនិងមានប្រវែងជាង៣ម៉ែត្រត្រូវបានប្រជាពលរដ្ឋប្រទះឃើញវាកាត់មុខផ្ទះហើយបាននាំគ្នាចាប់យកមកប្រគល់ឱ្យអាជ្ញាធរសង្កាត់ភ្នំពេញថ្មី ។
កាលពីព្រឹកថ្ងៃទី០៩ ខែវិច្ឆិកាឆ្នាំ២០១៥នៅចំណុចមុខផ្ទះពលរដ្ឋម្នាក់ឈ្មោះសំ ជា ភេទប្រុស អាយុ៥៥ឆ្នាំ ស្ថិតក្នុងក្រុម១៤ ភូមិគោកឃ្លាង សង្កាត់ភ្នំពេញថ្មី ខណ្ឌសែនសុខ។
លោក សំ ជា បានអោយដឹងថា កាលពីយប់ថ្ងៃទី០៨វេលាម៉ោង០៩និង៣០នាទីគាត់បានឃើញសត្វពស់ថ្លាន់ខាងលើវានៅលើផ្លូវលំមុខផ្ទះរបស់គាត់ពេលនោះគាត់ក៍បាននាំគ្នាចាប់សត្វពស់ថ្លាន់នោះទុកលុះព្រឹកឡើងវេលាម៉ោង០៩និង២០ថ្ងៃទី០៩ខែឆ្នាំដដែលគាត់ក៍បានយកមកប្រគល់អោយអាជ្ញាធរសង្កាត់ភ្នំពេញថ្មីតែម្តង។ គាត់បន្តទៀតថាសត្វពស់ថ្លាន់នោះមានទំងន់ជាង១២គឺឡូក្រាមហើយមានប្រវែងជាង៣ម៉ែត្រ។
មន្រ្តីសាលាសង្កាត់ភ្នំពេញថ្មីបានអោយដឹងថាបន្ទាប់ពីទទួលបានដំណឹងថាមានប្រជាពលរដ្ឋចាប់បានសត្វពស់ថ្លាន់យកមកប្រគល់អោយគាត់ក៍បានរាយការណ៍ទៅខាងអភិរក្សសត្វព្រៃអោយមកយកទៅថែរក្សានៅសួនសត្វភ្នំតាម៉ៅ ៕
ដោយ៖ តុង សីហា
