ខេត្តកណ្តាល៖ សមត្ថកិច្ចនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តកណ្តាលបានបញ្ជូនខ្លួននារីដៃដល់ដែលល្បួងក្មេងស្រីអាយុ៨ឆ្នាំ យកទៅសម្លាប់នៅក្នុងវាលស្រែប្លន់យកគ្រឿងអលង្កា ទៅកាន់សាលាដំបូងខេត្តកណ្តាលនៅថ្ងៃទី៩ ខែវិច្ឆិកា ឆ្នាំ២០១៥ ដើម្បីចាត់ការតាមច្បាប់ ។
មន្ត្រីនគរបាលព្រហ្មទណ្ឌកម្រិតធ្ងន់ខេត្តបានឲ្យដឹងថា នារីដៃដល់មានឈ្មោះ អឿន សុភាព ភេទស្រី អាយុ១៦ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅក្នុងភូមិទន្លាប់ខ្ពស់ជើង ឃុំដំណាក់អំពិល ស្រុកស្រុកអង្គស្នួល ខេត្តកណ្តាល ។ នារីដៃដល់ខាងលើនេះត្រូវបានសមត្ថកិច្ចនគរបាលស្រុកអង្គស្នួលឃាត់ខ្លួន កាលពីវេលាម៉ោង៧ព្រឹក ថ្ងៃទី០៧ ខែវិច្ឆិកា ឆ្នាំ២០១៥ បន្ទាប់ពីនារីវ័យជំទង់រូបនេះធ្វើសកម្មភាពល្បួងក្មេងស្រីអាយុ៨ឆ្នាំយកទៅក្នុងវាលស្រែ ហើយចាប់ច្របាច់.ក សម្លាប់ដើម្បីប្លន់យក ក្រវឹលមាស០១គូរ ទម្ងន់៣ហ៊ុន និងចិញ្ចៀនប្លាកទីន០១វង់ តម្លៃ៣០ដុល្លារ ។
មន្ត្រីនគរបាលព្រហ្មទណ្ឌបានបន្តថា ក្មេងស្រីរងគ្រោះមានឈ្មោះ គៀត សៀវលី អាយុ៨ឆ្នាំ ជនជាតិខែ្មរ ជាសិស្សរៀនថ្នាក់មេតិយ្យ បច្ចុប្បន្នរស់នៅផ្ទះជាមួយឪពុកម្តាយក្នុងភូមិទន្លាបខ្ពស់ជើង ឃុំដំណាក់អំពិល ស្រុកអង្គស្នូល ។
អធិការនគរបាលស្រុកអង្គស្នួលលោកវរសេនីយ៍ទោ មាន សំណាង បានបញ្ជាក់ថា នៅមុនពេលកើតហេតុ គឺនៅវេលារសៀកលថ្ងៃទី០៦ ខែវិច្ឆិកា ឆ្នាំ២០១៥ កុមារីរងគ្រោះបានពាក់ក្រវឹល និងចិញ្ចៀន ឈរលេងនៅខាងមុខផ្ទះរបស់ឈ្មោះ រស់ ពៅ ដែលស្ថិតនៅក្បែរវាលស្រែ ។ ពេលនោះនារីដៃដល់ដើរទៅជួបក៏បបួលក្មេងស្រីរងគ្រោះជិះកង់ទៅងូតទឹកប្រឡាយ ខណៈនោះកុមារីរងគ្រោះបានយល់ព្រមជិះកង់ទៅជាមួយជនដៃដល់ ។ ពេលជិះទៅដល់វាលស្រែស្ថិតក្នុងភូមិព្រៃសំរោង ឃុំដំណាក់អំពិល ស្រុកអង្គស្នួល ជនដៃដល់បាននាំកក្មេងស្រីរងគ្រោះដើរទៅចូលកណ្តាលវាលស្រែរួចធ្វើសកម្មភាពចាប់ច្របាច់.កកុមារីរងគ្រោះ រហូតស្លាប់បាត់បង់ជីវិត ។
លោកវរសេនីយ៍ទោ មាន សំណាង បានបញ្ជាក់ថា បន្ទាប់ពីកុមារីរងគ្រោះស្លាប់បាត់បង់ជីវិតហើយនោះ នារីដៃដល់បានដោះយកគ្រឿងអលង្កាក្មេងស្រីរងគ្រោះយកទៅលក់នៅឯផ្សារថ្នល់ទទឹងបានប្រាក់ចំនួន១១០.៥០០រៀល ទើបជិះកង់ត្រឡប់មកផ្ទះវិញជាធម្មតាធ្វើដូចជាគ្មានរឿងអ្វីកើតឡើង ។ ពេលមកដល់ផ្ទះនារីដៃដល់បានចូលរួមតាមស្វែងរកក្មេងស្រីរងគ្រោះជាមួយក្រុមគ្រួសារ និងអ្នកភូមិ រហូតប្រទះឃើញសាកសព ។
ក្រោយពីរកឃើញសាកសពក្មេងស្រីរងគ្រោះរួចមក សមត្ថកិច្ចនគរបាលជំនាញយុត្តិធម៌ស្រុកបានធ្វើការត្រួតពិនិត្យ និងបើកប្រតិបត្តិការស៊ើបអង្កេត រហូតឈានដល់ធ្វើការឃាត់ខ្លួននារីដៃដល់នាំទៅយកគ្រឿងអលង្កាដែលយកទៅលក់នោះពីអ្នកទទួលទិញមកវិញ ដើម្បីកសាងសំណុំរឿងចាត់ការតាមច្បាប់ ៕
ដោយ៖ ស្អាងជ័យ
